Уладзімер Глод, Менск Сход Нацыянальнага алімпійскага камітэту Беларусі, які павінны быў прайсьці ў Менску 8 і 9 ліпеня, адмянілі. Рашэньне, пра якое стала вядома толькі ўвечары ў сераду, выглядае цалкам нечаканым, паколькі ў пятніцу, 9 ліпеня, сябры НАКу павінны былі сабрацца ў рэзыдэнцыі свайго прэзыдэнта – Аляксандра Лукашэнкі. На гэтым паседжаньні магло разглядацца пытаньне пра трохразовага алімпійскага чэмпіёна, дэпутата Палаты прадстаўнікоў і сябра дэпутацкай групы “Рэспубліка” Ўладзімера Парфяновіча.