Лінкі ўнівэрсальнага доступу

Анкета пасьля лета. Алена Анісім: «Найбольшы страх у мяне выклікае пагроза страты незалежнасьці Беларусі»


Алена Анісім з мэдалём у гонар 100-годзьдзя абвяшчэньня незалежнасьці БНР

У восеньскім праекце Свабоды мы прадстаўляем анкеты цікавых і вядомых людзей. Наша сёньняшняя рэспандэнтка — Алена Анісім.

Хто гэта?

Дэпутатка палаты прадстаўнікоў Нацыянальнага сходу, старшыня Таварыства беларускай мовы, філёляг. Працавала ў Інстытуце мовы і літаратуры Акадэміі навук, была актыўнай удзельніцай адраджэнскага моладзевага руху 1980-х. Маці трох сыноў.

1. Калі вы адчувалі найбольшае ў жыцьці шчасьце?

Найбольшае ў жыцьці шчасьце адчувала пры нараджэньні сыноў, асабліва першага.

2. Які ваш найбольшы страх?

Найбольшы страх у мяне выклікае пагроза страты незалежнасьці Беларусі.

Алена Анісім у офісе ТБМ
Алена Анісім у офісе ТБМ

3. Які ваш самы раньні ўспамін?

Самы раньні ў мяне ўспамін прыблізна, як мела каля 1 году ці паўтара. Памятаю, як мама пераносіла мяне ў нашу новую хату, укруціўшы ў сваю вязаную кофту чырвонага колеру.

4. Якая рыса вам найбольш не падабаецца ў сабе?

Мне ня вельмі падабаецца, калі я часам «падтарможваю», не заўсёды так хутка публічна рэагую на нейкія падзеі, як адчуваю.

5. Якая рыса вам найбольш не падабаецца ў іншых?

Мне вельмі не падабаецца хлусьня і двурушнасьць.

6. Якая ў вас была самая няёмкая сытуацыя ў жыцьці?

Пра самую няёмкую сытуацыю ў жыцьці помніцца, калі мне было гадоў шэсьць. Бацькі мяне вазілі на санках у школу за 3 км зімою. А ў нашай вёсцы была пачатковая школа. Я ж мусіла езьдзіць з бацькамі ў суседнюю вёску, бо яны там настаўнічалі. Аднойчы мяне старэйшыя дзяўчаты папрасілі купіць дзёньнік, далі грошы. Гэта было 14 капеек, здаецца. А я па дарозе іх недзе згубіла. Было крыўдна да сьлёз. Давялося расказаць бацькам, а я ж лічыла сябе ўжо вялікай. Думала, спраўлюся сама і куплю дзёньнік бязь іх ведама. А выйшла зусім ня так.

7. Якая ў вас ёсьць самая дарагая вам рэч?

Самая дарагая для мяне рэч у маральным і матэрыяльным пляне — бацькоўскі дом.

8. Якую б вы хацелі мець супэрздольнасьць?

Я б хацела мець магчымасьць выконваць жаданьні блізкіх мне людзей.

9. Што робіць вас няшчаснай?

Няшчаснай мяне робяць праблемы зь фізычным здароўем маім асабістым і маіх родных, а таксама крызісныя сытуацыі ў краіне.

На Дзень Волі 25 сакавіка 2018 году
На Дзень Волі 25 сакавіка 2018 году

10. Якая ў вас самая непрыгожая звычка?

Не заўсёды заглядаю ў люстэрка перад важнымі сустрэчамі. Часта гэта забываюся зрабіць. Пасьля шкадую, папракаю сама сябе.

11. Якую вы маеце заганную прыемнасьць?

Я люблю салодкае, марожанае, цукеркі. Часам ігнарую голас здаровага сэнсу і вечарам, калі вельмі хочацца, магу зьесьці шмат салодкага.

12. У каго вам найбольш хацелася б папрасіць прабачэньня і чаму?

У сваіх дзяцей, бо не змагла пераканаць іх у неабходнасьці атрымаць вышэйшую адукацыю.

13. Найлепшы пацалунак у вашым жыцьці?

Першы пацалунак кожнага з сыноў у маленстве.

14. Найбольшае ў жыцьці расчараваньне?

Найбольшае расчараваньне — вынікі рэфэрэндуму 1995 году і далейшыя падзеі ў 1996-м.

15. Калі б вы маглі нешта зьмяніць у мінулым жыцьці, што б гэта было?

Я б хацела, каб мой бацька пражыў больш.

16. Калі б вы маглі трапіць у мінуласьць, дзе б вы хацелі апынуцца?

Найлепшая мінуласьць для мяне — гэта маё дзяцінства.

17. Калі вы былі найбліжэй да сьмерці?

Магчыма, гэта было падчас апэрацыі.

18. Якая адна рэч павысіла б якасьць вашага жыцьця?

Выключна моцнае здароўе — гарант добрага жыцьця.

Алена Анісім з былым старшынём ТБМ Алегам Трусавым, 2015 год
Алена Анісім з былым старшынём ТБМ Алегам Трусавым, 2015 год

19. Ваша найбольшае дасягненьне?

Спадзяюся, што самае вялікае дасягненьне ў мяне яшчэ наперадзе.

20. Што вам не дае спаць па начах?

Па начах не даюць заснуць розныя жыцьцёвыя сытуацыі маіх выбаршчыкаў, калі я ня ў стане ім дапамагчы.

21. Што вам запомнілася зь мінулага лета?

Самае запамінальнае з гэтага лета — паездка ў камандзіроўку ў Страсбург і вандроўка зь Менскім ТБМ разам з Аляксеем Фраловым па мясьцінах Станіслава Манюшкі з нагоды яго 200-годзьдзя.

22. Што б вы хацелі, каб пра вас памяталі?

Я б хацела, каб пра мяне памяталі празь нешта добрае, што я зрабіла камусьці канкрэтна ці ў грамадзкім жыцьці наогул.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG