Лінкі ўнівэрсальнага доступу

Анкета на лета. Аўтар песьні «Радыё Свабода»: «Чатыры ўдалыя радкі вартыя жыцьця»


Фэлікс Аксёнцаў, 2017 год

У летнім праекце Свабоды мы прадстаўляем анкеты цікавых і вядомых людзей. Наш сёньняшні рэспандэнт — паэт Фэлікс Аксёнцаў.

Хто гэта?

Фэлікс Аксёнцаў — аўтар песьні «Радыё Свабода», якая ад часу свайго стварэньня ў 1990-м (музыка Вячаслава Кораня) стала гітом і гімнам пакаленьня. Ён таксама пісаў тэксты да альбомаў рок-гурту Ulis — «Чужаніца» (1989), «Краіна доўгай белай хмары» (1991), «Танцы на даху» (1993). Супрацоўнічае з гуртом «Крама». Апублікаваў некалькі зборнікаў вершаў па-расейску. Разам з музыкам Андрэем Лагутковым выдаў рок-альбом «Второй пилот» (2019). Друкаваўся ў беларускіх літаратурных часопісах і альманахах. У 1996 годзе зьехаў зь Менску ў Ванкувэр (Канада).

1. Калі вы адчувалі найбольшае ў жыцьці шчасьце?

Я па-сапраўднаму шчасьлівы, толькі калі пішуцца вершы. Радасьць, асалоду, задавальненьне я здольны адчуваць і зь іншых нагодаў, а вось шчасьце — толькі падчас кароткіх сполахаў натхненьня.

2. Які ваш найбольшы страх?

Што новых вершаў больш ня будзе. Я ніколі ня ведаю, ці апошні верш я пішу, ці першы. Пэрыяды маўчаньня доўжацца месяцамі, і гэта сумныя, шэрыя часы.

3. Які ваш самы раньні ўспамін?

Блакітнае неба над стадыёнам «Дынама» ў Менску. Я ў калясцы, а мой дзед коціць яе побач з прыступкамі, якія вядуць ад вуліцы Ўльянаўскай, уздоўж стадыёну — угору да вуліцы Кірава.

4. Якая рыса вам найбольш не падабаецца ў сабе?

Вядома ж, такая рыса ёсьць. Але, мяркую, ня варта распавядаць пра яе публічна, бо яна можа быць і скарыстаная супраць мяне.

5. Якая рыса вам найбольш не падабаецца ў іншых?

Імкненьне кантраляваць сваё атачэньне, а найгорш — кантраляваць як мага больш людзей; няўтольная патрэба ў дамінацыі. Гэта асноўная рыса дыктатараў, гуру і пасьпяховых кіраўнікоў вялікіх бізнэсаў.

6. Якая ў вас была самая няёмкая сытуацыя ў жыцьці?

Калі мяне аштрафавалі на канадзкай мытні за нейкае незадэкляраванае лабудзьдзё.

7. Якая ў вас ёсьць самая дарагая вам рэч?

Канадзкі пашпарт.

8. Якую б вы хацелі мець супэрздольнасьць?

Імгненна вывучаць мовы — францускую, нямецкую, гішпанскую, партугальскую, італьянскую...

9. Што робіць вас няшчасным?

Жыцьцё ва ўмовах несвабоды, карупцыі, таталітарызму, самаўпраўства. Гэта тычыцца ня толькі грамадзтва — нават і лякальная бізнэс-мадэль на працы можа быць цалкам фэадальнай ці фашыстоўскай.

10. Якая ў вас самая непрыгожая звычка?

Ня ведаю, шчыра кажучы.

11. Якую вы маеце заганную прыемнасьць?

Быў моцна залежны ад тытуню, а цяпер — ад чорнай кавы. Нават маем у хаце барыста-машыну.

12. У каго вам найбольш хацелася б папрасіць прабачэньня і чаму?

Ва ўсіх, хто пакутаваў празь мяне. Амаль усё, што мы робім, ды нават тое, што ня робім у жыцьці, — спараджае пакуты. Безумоўна, навокал нас — самсара, а не Галівуд. Але прабачэньня прасіць трэба.

13. Найлепшы пацалунак у вашым жыцьці?

На лаўцы ў менскім парку імя Янкі Купалы. Такі быў сапраўдны, што да нас падышоў савецкі міліцыянт і сувора параіў болей так не рабіць.

14. Найбольшае ў жыцьці расчараваньне?

Сёмая гульня фінальнай сэрыі кубку Стэнлі ў 2011 годзе, якую Ванкувэр ушчэнт прайграў Бостану.

15. Калі б вы маглі нешта зьмяніць у мінулым жыцьці, што б гэта было?

Я б навучыўся граць на гітары яшчэ ў дзяцінстве.

16. Калі б вы маглі трапіць у мінуласьць, дзе б вы хацелі апынуцца?

Абраў бы 60-я гады ў Лёндане, і каб апынуцца ў адным з тагачасных рок-гуртоў. Бадай, ня выжыў бы, але ж «мае» сапраўдныя час і месца — там.

17. Калі вы былі найбліжэй да сьмерці?

Мо калі трапіў у дарожна-транспартнае здарэньне за стырном у Ванкувэры ў траўні 2005-га. Але, хутчэй за ўсё, я нават і не заўважыў таго выпадку, калі сьмерць была найбліжэй. Яна заўжды побач.

18. Якая адна рэч павысіла б якасьць вашага жыцьця?

Грошы. Я ня сквапны чалавек, і яны ў мяне не затрымліваюцца.

19. Ваша найбольшае дасягненьне?

Тэкст песьні «Краіна Доўгай Белай Хмары».

20. Што вам не дае спаць па начах?

Кафэін і праца.

21. Што б вы хацелі, каб пра вас памяталі?

Нейкі вершык ці тэкст песьні. Нават чатыры радкі. Чатыры ўдалыя радкі вартыя жыцьця.

***

Вэрсія песьні «Радыё Свабода» 1990 году

Жывое выкананьне 1993 году

Вэрсія 2003 году

***

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG