Лінкі ўнівэрсальнага доступу

Паэт, сябра Лукашэнкі, сын рэпрэсаванага. Хто такі Міхаіл Гуцэрыеў, які пагадзіўся пастаўляць нафту ў Беларусь


Міхаіл Гуцэрыеў у атачэньні кіраўніцтва Беларусі. Фота прэс-службы Аляксандра Лукашэнкі

Бізнэсовец уваходзіць у ТОП-20 расейскіх мільярдэраў. Яго актывы ацэньваюцца ў памеры больш як 6 мільярдаў даляраў.

Увечары 4 студзеня стала вядома пра аднаўленьне паставак нафты на беларускія нафтаперапрацоўчыя заводы. Пра гэта паведаміла БелТА са спасылкай на намесьніка старшыні канцэрну «Белнафтахім» Уладзімера Сізова. Помпавыя агрэгаты ўключылі а 17:05, пастаўкі нафты пачаліся на ААТ «Нафтан».
Пастаўляць нафту з Расеі ў Беларусь будуць кампаніі «Русснефть» і «Нефтиса», якія ўваходзяць у групу кампаніяў «Сафмар» Міхаіла Гуцэрыева, піша «Інтэрфакс».

Пастаўкі расейскай нафты ў Беларусь спыніліся 1 студзеня праз адсутнасьць новых дамоўленасьцяў паміж бакамі. Лукашэнка сазвоньваўся з Пуціным напярэдадні адключэньня паставак двойчы — 30 і 31 сьнежня. Аднак у выніку загадаў падначаленым шукаць новыя крыніцы паставак. Удзень 3 студзеня стала вядома, што на нафтаперапрацоўчых прадпрыемствах Беларусі застаецца сыравіны прыкладна на 10-14 дзён. Каб пазьбегнуць дэфіцыту паліва на ўнутраным рынку, Беларусь нават спыніла экспарт нафтапрадуктаў за мяжу.

Свабода сабрала некалькі фактаў пра Міхаіла Гуцэрыева, кампаніі якога пачалі пастаўкі такой важнай сыравіны.

Паходзіць з сям’і рэпрэсаваных

Міхаіл Гуцэрыеў нарадзіўся ў 1958 годзе ў Акцюбінску на тэрыторыі сучаснага Казахстана ў сям’і інгушоў, якая была рэпрэсаваная і дэпартаваная савецкімі ўладамі ў Казахстан. Пасьля сьмерці Сталіна сям’я будучага мільярдэра вярнулася на Каўказ, сярэднюю школу Міхаіл Гуцэрыеў скончыў у Грозным. Падчас першай чачэнскай вайны яна была зьнішчаная, у 2005 будынак цалкам аднавілі. Праект фінансаваў Гуцэрыеў.

Сябра саюзу пісьменьнікаў Расеі

Акрамя бізнэсу Гуцэрыеў актыўна займаецца напісаньнем вершаў. Яго зборнікі рэгулярна публікуюцца ў інтэрнэце і літаратурных выданьнях Расеі з 2014 году. Акрамя гэтага, на вершы Гуцэрыева напісана мноства песень, якія выконваюць зоркі расейскай эстрады. Сярод іх Іосіф Кабзон, Лайма Вайкуле, Стас Міхайлаў, Мікалай Баскаў і іншыя.

Уцякаў у Лёндан ад крымінальнага перасьледу

Гэта адбылося ў 2007 годзе. Агулам у сталіцы Вялікабрытаніі Міхаіл Гуцэрыеў пражыў тры гады. У 2010 ён вярнуўся спачатку ў Чачню, а затым і ў Маскву, дзе зноў пачаў кіраваць карпарацыяй «РуссНефть», якую ўзначальваў з 2002 году. Менавіта з яго кіраўніцтвам адной з самых буйных расейскіх дзяржаўных карпарацый зьвязваўся перасьлед.
Інфармацыя пра новыя ператрусы ў офісах кампаній Гуцэрыева зьявіліся ў сьнежні 2019, аднак былі хутка абвергнутыя.

Будуе ў Беларусі прадпрыемства за 2 мільярды даляраў

Акрамя нафты ў сфэру інтарэсаў Міхаіла Гуцэрыева ўваходзяць калійныя ўгнаеньні, ён валодае кампаніяй «Слаўкалій». У 2017 годзе гэтая кампанія пачала будаўніцтва прадпрыемства па здабычы калійных угнаеньняў у Любанскім раёне. Памер інвэстыцый ацэньваюць як 2,1 мільярдаў даляраў. Новае прадпрыемства стане прамым канкурэнтам дзяржаўнаму «Белкалію».
І гэта не адзіны праект Міхаіла Гуцэрыева ў Беларусі. З яго імем зьвязваюць прыняцьце знакамітага Дэкрэта № 8, вынікам якога стала адкрыцьцё ў Беларусі першай у СНД крыптавалютнай біржы. Беларускім партнэрам Гуцэрыева называюць Віктара Пракапеню.

Лецішча пад Менскам, верталёт у чырвона-зялёных колерах

У сакавіку 2019 году ў інтэрнэце зьявіліся фотаздымкі новага верталёта італьянскай вытворчасьці, які быў афарбаваны ў чырвона-зялёныя колеры. На фюзеляжы машыны таксама прысутнічае дзяржаўная беларуская сымболіка. Партал tut. by паведамляў, што верталёт коштам каля 12 мільёнаў даляраў набыла кампанія Міхаіла Гуцэрыева «Слаўкалій». Паводле неафіцыйнай інфармацыі ім можа карыстацца кіраўніцтва Беларусі, аднак пакуль Аляксандра Лукашэнку на борце гэтай машыны не заўважалі.
Вядома таксама, што на вялікім лецішчы пад Менскам, якое належыць Міхаілу Гуцэрыеву, ёсьць верталётная пляцоўка.

У СМІ таксама зьяўлялася інфармацыя пра тое, што Міхаіл Гуцэрыеў дарыў кіраўніцтву Беларусі аўтамабіль «Майбах», аднак афіцыйна гэта не пацьвярджалася. Са слоў мільярдэра вядома толькі, што ён дапамагаў арганізаваць для Лукашэнкі невялікі падарунак — канцэрт на «стары Новы год» з удзелам расейскіх сьпевакоў Рыгора Лепса, Мікалая Баскава і Наташы Каралёвай.

Расея спыніла пастаўкі нафты ў Беларусь. Што здарылася

  • 1 студзеня 2020 году Расея спыніла пастаўкі нафты ў Беларусь, але расейская нафта працягвае паступаць транзытам празь Беларусь у Эўропу.
  • Беларусь і Расея дагэтуль не дамовіліся пра пастаўкі нафты ў 2020 годзе, хоць Лукашэнка і Пуцін вялі перамовы 30 і 31 сьнежня.
  • 31 сьнежня Лукашэнка даручыў завозіць нафту з партоў Балтыі і залучыць альтэрнатыўныя пастаўкі праз магістральны нафтаправод «Дружба».
  • Гатоўнасьць транспартаваць нафту ў Беларусь ужо выказалі суседнія Латвія і Літва.
  • Беларускія НПЗ пакуль працуюць на леташніх запасах, аб’ёму якіх хопіць прыкладна на 20 дзён працы. Экспарт нафтапрадуктаў Беларусь часова прыпыніла.
  • Паводле неафіцыйных зьвестак «Інтэрфаксу», Беларусь прапанавала рэалізаваць варыянт разавай пастаўкі нафты з рэсурсаў незалежных пастаўшчыкоў з мэтай павелічэньня запасаў сыравіны на НПЗ на час правядзеньня перамоваў.
  • Менск і Масква дасюль не ўзгаднілі кампэнсацыю за расейскі падатковы манэўр. У беларускі бюджэт — 2020 закладзеныя страты ў памеры 951 млн рублёў.
  • Расея дагэтуль не кампэнсавала Беларусі страты за пастаўкі бруднай нафты ў красавіку 2019 году.

Беларусь — адзіная краіна ў сьвеце, якая багацее на суседзкай нафце, — эканаміст

Дзе браць нафту, калі не ў Расеі, і колькі страчвае Беларусь ад прыпыненьня паставак? Тлумачым разам з экспэртам

Усё пачалося з Пуціна. Кароткая гісторыя нафтагазавых канфліктаў Беларусі і Расеі

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG