Лінкі ўнівэрсальнага доступу

Беларусы сабраліся пратэставаць супраць «інтэграцыі». Свабода будзе весьці жывую трансьляцыю


Ілюстрацыйнае фота

Днём 7 сьнежня ў Менску анансаваліся некалькі акцыяў пратэсту супраць «паглыбленьня інтэграцыі» Беларусі і Расеі. Пакуль ніводная акцыя не санкцыянаваная беларускімі ўладамі. Свабода будзе весьці жывую відэатрансьляцыю з цэнтру сталіцы ад 11:30.

На адну з акцыяў пратэсту ў гэты дзень заклікаў сустаршыня «Беларускай хрысьціянскай дэмакратыі» Павал Севярынец. На яшчэ адну, «жывы ланцуг», заклікала кампанія «Сьвежы вецер», якая 5 сьнежня выкаціла гарбуз да расейскай амбасады.

У гэты ж дзень, 7 сьнежня плянуецца сустрэча Аляксандра Лукашэнкі і Ўладзіміра Пуціна ў Сочы. Мяркуецца, што на сустрэчы яны будуць абмяркоўваць «паглыбленьне інтэграцыі» напярэдадні 20-й гадавіны стварэньня «саюзнай дзяржавы» Беларусі і Расеі. Што за дакумэнты яны маюць падпісаць і што за «дарожныя мапы» інтэграцыі абмяркоўваюць урады краінаў, не раскрываецца.

І ня толькі ў Менску

Яшчэ 30 лістапада супраць «паглыбленьня інтэграцыі» пратэставалі беларусы ЗША, якія выйшлі да штаб-кватэры ААН. Увечары 6 сьнежня мае прайсьці акцыя беларусаў у Брусэлі. На 7 і 8 сьнежня заплянаваныя і акцыі пратэсту беларусаў у іншых краінах:

Сачыце за падзеямі на svaboda.org.

«Паглыбленьне інтэграцыі» Беларусі і Расеі. Што важна ведаць

Аляксандар Лукашэнка і Ўладзімір Пуцін, ліпень 2019
Аляксандар Лукашэнка і Ўладзімір Пуцін, ліпень 2019
  • Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
  • Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
  • Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
  • У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
  • Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
  • 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
  • 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
  • Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
  • Акцыі супраць паглыбленьня інтэграцыі Беларусі і Расеі прайшлі ў Менску ​7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
  • 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».

Спэцпрапект «Чаму Беларусь не Расея»

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG