Лінкі ўнівэрсальнага доступу

У цэнтры Менску на Дзень Волі затрымалі палітыкаў і музыкаў. ФОТА, ВІДЭА

абноўлена

Затрыманьні на Кастрычніцкай плошчы

Прынамсі восем чалавек, уключна з палітыкамі Мікалаем Казловым і Віталём Рымашэўскім, затрыманыя на Кастрычніцкай плошчы ў цэнтры Менску 25 сакавіка. За некалькі кварталаў ад яе затрыманыя музыкі Лявон Вольскі, Ігар Варашкевіч, Зьміцер Вайцюшкевіч і Павел Аракелян, якія рыхтаваліся да імправізаванага выступу на Камсамольскай вуліцы.

Ніякіх акцыяў на дзень або вечар 25 сакавіка ў Менску не анансавалі, але ў цэнтры сталіцы зранку дзяжурылі аўтазакі і «людзі ў цывільным». Апэратыўна атрымаць камэнтар менскай міліцыі не ўдалося.

Затрыманьні, пра якія вядома:

  1. Алена Талстая
  2. Віталь Рымашэўскі
  3. Мікалай Казлоў
  4. Віктар Кавалькоў (айцец Вікенцій)
  5. Юры Палейка
  6. Міхаіл Савіцкі
  7. Андрэй Рогаў
  8. Сяргей Кісель
  9. Лявон Вольскі
  10. Мар’яна Вольская
  11. Зміцер Вайцюшкевіч
  12. Ігар Варашкевіч
  13. Павел Аракелян​
  14. Жанчына зь бел-чырвона-белым сьцягам

Абноўлена 21:40: З Цэнтральнага РАУС вызвалілі ўсіх затрыманых музыкаў і актывістаў. На дадзены момант затрыманая толькі Талстая — яе павезьлі на Акрэсьціна. На вызваленых не складалі пратаколы аб правапарушэньнях, толькі пратаколы аб затрыманьнях і прафіляктычных гутарках. Ці будуць суды і штрафы, невядома. Як расказаў Свабодзе Рымашэўскі, у адрозьненьне ад затрыманьня 24 сакавіка або Дню Волі мінулага году, на гэты раз зь ім абыходзіліся карэктна, бяз гвалту.

Абонўлена, 22:44: У цэнтры Менску схапілі жанчыну зь бел-чырвона-белым сьцягам.

Актывістка прыкавала сябе да слупа

Яшчэ да 18-й гадзіны на Кастрычніцкай плошчы затрымалі актывістку апазыцыйнага Руху салідарнасьці «Разам» Алену Талстую, яна прыкавала сябе кайданкамі да слупа, бо «Дзень Волі — у няволі».

Актывістка Алена Талстая прыкавала сябе да слупу на Кастрычніцкай плошчы
Актывістка Алена Талстая прыкавала сябе да слупу на Кастрычніцкай плошчы

Яе затрымалі
Яе затрымалі

Палітыкаў, якія не заклікалі да несанкцыянаваных мерапрыемстваў, затрымалі

На Кастрычніцкую плошчу завітаў былы старшыня Аб’яднанай грамадзянскай партыі Анатоль Лябедзька, пазьней да яго падышлі цяперашні старшыня АГП Мікалай Казлоў і сустаршыня Беларускай хрысьціянскай дэмакратыі Віталь Рымашэўскі. Яны падкрэсьлілі, што не заклікаюць да несанкцыянаваных захадаў — проста ідуць пакласьці кветкі да дому, дзе была абвешчаная незалежнасьць Беларускай Народнай Рэспублікі (вул. Валадарскага, 9).

Момант затрыманьня Рымашэўскага і Казлова
Момант затрыманьня Рымашэўскага і Казлова

Казлова і Рымашэўскага затрымалі менш як празь пяць хвілінаў без усялякіх тлумачэньняў. Падчас затрыманьня было бачна, што ў машыне «людзей у цывільным» ужо быў адзін затрыманы — сьвятар Беларускай аўтакефальнай праваслаўнай царквы айцец Вікенці.

Каля 18:15 затрымалі яшчэ аднаго чалавека ў бел-чырвона-белым шаліку на падыходзе да плошчы, ён не пасьпеў назвацца. Праз тры хвіліны затрымалі яшчэ двух чалавек — зь бел-чырвона-белым сьцяжком на плошчу выйшаў мужчына, які назваўся Міхаіл Савіцкі, да яго падышоў паразмаўляць яшчэ адзін мужчына, затрымалі абодвух. Пасьля быў затрыманы прынамсі яшчэ адзін чалавек.

Прадстаўнік праваахоўнікаў папрасіў журналістаў і назіральнікаў адыйсьці далей ад праспэкту, каб «не перашкаджаць людзям хадзіць па Кастрычніцкай плошчы».

На Камсамольскай затрымалі Вольскага, Варашкевіча, Вайцюшкевіча, Аракеляна

Лявон Вольскі зь сябрамі зьбіраліся прагуляцца з музычнымі інструмэнтамі пешаходнымі вуліцамі ў цэнтры.

У 18.24 музыкаў Лявона Вольскага, Зьмітра Вайцюшкевіча, Ігара Варашкевіча і Паўла Аракеляна затрымалі на скрыжаваньні вуліц Камсамольскай і Рэвалюцыйнай. Затрыманая таксама жонка Лявона Мар’яна Вольская.

Адзін з арганізатараў канцэртаў #БНР100 і #БНР101 Антон Матолька запусьціў на Petitions.by збор подпісаў пад зваротам да Менгарвыканкаму і Міністэрству ўнутраных справаў з патрабаваньнем растлумачыць, чаму затрымалі музыкаў.

На скрыжаваньні засталіся дзясяткі чалавек, якія хорам прасьпявалі гіты Вольскага і гурту N.R.M «Тры чарапахі», «Паветраны шар», «Простыя словы» і іншыя песьні. Прадстаўнік міліцыі пагражаў ім затрыманьнямі і гвалтам, але людзі мірна разышліся.

Вуліца Валадарскага застаўленая аўтазакамі ад праспэкту Незалежнасьці.

Аўтазакі на вуліцы Валадарскага
Аўтазакі на вуліцы Валадарскага

Што важна ведаць пра Дзень Волі — 2019

  • 1 сакавіка — Аляксандар Лукашэнка вусна забараніў сьвяткаваць Дзень Волі канцэртам на стадыёне «Дынама», як таго хацелі арганізатары #БНР100 — кажа: «Ідзіце на Бангалёр».
  • 23 сакавіка ў Горадні — канцэрт у Калоскім парку з удзелам Зьмітра Вайцюшкевіча, Лявона Вольскага, гуртоў Nizkiz, «Крама», «Дай дарогу!» і Dzieciuki. Ад 3 да 5 тысяч гледачоў.
  • 23–24 сакавіка — акцыі беларусаў у Варшаве, Вільні, Кіеве, Нью-Ёрку, Празе ды іншых гарадах.
  • 24 сакавіка ў Менску — мітынг-канцэрт у Кіеўскім сквэры з удзелам «Дай дарогу», N.R.M., «Разьбітага сэрца пацана» ды іншых. Ад 1500 (паводле міліцыі) да 5–7 тысячаў (паводле арганізатараў) гледачоў. Затрыманыя Натальля Басалыга-Гарачка і Зьміцер Дашкевіч.
  • 25 сакавіка ў Гомлі — акцыя памяці герояў БНР.
  • 25 сакавіка ў Віцебску — адзіночны пікет Барыса Хамайды, які расцанілі як «парушэньне парадку ўтрыманьня населеных пунктаў».
  • 25 сакавіка ў розных гарадах — людзі вывешвалі бел-чырвона-белыя сьцягі на заклік арганізатараў #БНР101, уладам не спадабалася.
  • 25 сакавіка ў Менску на Кастрычніцкай плошчы — акцыя Алены Талстой (прыкавала сябе да слупа), затрыманьні палітыкаў і мінакоў. Праз тры гадзіны вызваленыя ўсе, акрамя Талстой, пратаколаў аб парушэньнях не складалі.
  • 25 сакавіка ў Менску на пешаходных вуліцах — затрыманьні музыкаў (Аракелян, Вайцюшкевіч, Варашкевіч і Вольскі), якія анансавалі, што зьбіраюцца прагуляцца і ўзяць з сабой музычныя інструмэнты. Пасьля затрыманьня дзясяткі людзей сьпявалі хорам песьні Вольскага, міліцыя пагражала затрыманьнямі і гвалтам. Праз тры гадзіны музыкі вызваленыя.
  • 25 сакавіка ў розных гарадах — салюты ў гонар Дня Волі.

Што яшчэ пачытаць, паслухаць, паглядзець пра БНР

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG