Прэзыдэнт Расеі Ўладзімір Пуцін адчувае цяпер жэстачайшы антыбеларускі ціск», — заявіў Аляксандар Лукашэнка падчас звароту да дэпутатаў Палаты прадстаўнікоў і чальцоў Савету рэспублікі, паведамляе БелТА.
«Сёньня на прэзыдэнта Пуціна ціск жэстачайшы. І прытым ужо з блізкага атачэньня, антыбеларускага», — сказаў Лукашэнка.
Ён адзначыў, што Расея вельмі неаднародная ў пляне думак і інтарэсаў, і «гэта трэба разумець і ўспрымаць». «Гэта наша праца. І ў гэтым кірунку бяз гвалту мы павінны працаваць», — дадаў Лукашэнка.
«Пра якую далейшую інтэграцыю можна казаць, калі ня вырашаныя прынцыповыя пытаньні»
Што тычыцца працы над праграмай паглыбленьня інтэграцыі ў рамках «саюзнай дзяржавы» і пакетам «дарожных мапаў», Лукашэнка заявіў, што хоць яна і «на завяршальнай стадыі», але дасюль ня вырашаны шэраг прынцыповых пытаньняў, у прыватнасьці наконт газу і нафты.
«Пра якую можна казаць далейшую інтэграцыю (ідзецца аб паглыбленьні інтэграцыі. — РС), калі мы сёньня ня маем дамовы аб пастаўках прыроднага газу? Хоць пра гэта дамовіліся даўно. І нашы ўрады правалілі гэтыя дамоўленасьці. Не зь віны беларускага ўраду. То бок у нас заўтра новы год, а мы ня маем дамовы аб аб’ёме і цэнах паставак прыроднага газу», — сказаў Лукашэнка.
Таксама Лукашэнка падкрэсьліў, што нявырашанымі застаюцца і пытаньні аб нафце, у прыватнасьці сытуацыя з бруднай расейскай нафтай. Яшчэ адным праблемным пытаньнем ён назваў тое, што беларускім вытворцам пэрыядычна закрываюць рынак для пастаўкі тавараў.
«Нават элемэнтарнае пытаньне дагэтуль ня вырашанае — аб бруднай нафце. Мы нешта лічым, вырашаем. А яны робяць выгляд, што гэтай бруднай нафты не было. А мы ж правалілі ВУП у асноўным праз нафтавыя праблемы», — дадаў ён.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў