Лінкі ўнівэрсальнага доступу

У Гомлі праходзіць пікет з удзелам блогераў і кандыдатаў у дэпутаты. ФОТА

абноўлена

Блогер Сяргей Ціханоўскі і актывістка кампаніі «Маці 328» Тацяна Канеўская падчас пікету

У Гомлі на вуліцы Хатаевіча, што ў 10 хвілінах ад цэнтру гораду, пасьля 16-й гадзіны распачаўся пікет з удзелам дзевяці апазыцыйных кандыдатаў у дэпутаты.

На замову арганізатараў пікета прыватная замоўленая фірма змантавала сцэну для выступаў, але ахоўнікі супермаркета «Эўраопт» заявілі, што пікет — узгоднены, а сцэна — не. Ды разабралі яе.

Па стане на 17 гадзін на пляцоўцы каля супэрмаркету сабраліся каля 200 чалавек. Каля крамы — каля 20 супрацоўнікаў міліцыі ў цывільным. Выступаюць кандыдаты ў дэпутаты, яны кажуць пра несправыядлівыя выбары і праблемы ў грамадзтве.

Кандыдат у дэпутаты фэрмэр Юры Ганцэвіч не даехаў да пікету — яго трактар затрымалі супрацоўнікі ДАІ і адагналі на штрафстаянку.

Калі затрымалі кандыдата-фэрмэра Юрыя Ганцэвіча, давераныя асобы кандыдата Алены Давыдавай — Юры Уласаў і Аляксей Елісееў — паехалі падтрымаць фэрмэра і раабрацца, за што яго затрымалі. «Іх двух зьбіла і затрымала міліцыя», — паведаміў Свабодзе блогер Сяргей Ціханоўскі.

Менскі блогер MozgOn, пра якога паведамлялася, што яго затрымалі, усё ж прыехаў на акцыю.

Акцыю анансаваў у сваім YouTube-канале «Страна для жизни» блогер Сяргей Ціханоўскі. Анонс пікета ў інтэрнэце меў больш за 40 тысяч праглядаў.

«У Беларусі няма сумленных выбараў, не зьмяняецца ўлада, няма незалежных судоў, няма свабоды сходаў; намі кіруюць людзі, якіх мы не выбіраем; прымаюцца законы, якія шкодзяць нашай краіне. Неўзабаве мы можам стаць часткай іншай дзяржавы, і нас пра гэта нават не спытаюць. Мы павінны ўзяць на сябе адказнасьць, калі мы хочам перамен», — казаў у запрашэньні на сустрэчу Сяргей Ціханоўскі.

Блогер падкрэсьліў, што акцыя цалкам узгодненая, законная і санкцыянаваная, бо на яе падалі заяўкі кандыдаты ў дэпутаты. Увечары 14 лістапада ён паведаміў пра спробу свайго затрыманьня.

Пікеты ля супэрмаркета «Эўраопт» замовілі шэраг кандыдатаў у дэпутаты — Тацяна Канеўская (рух «Маці 328»), незалежныя кандыдаты Юры Ганцэвіч і Алена Давыдава, сябра БНФ Васіль Раманаў і актывіст АГП Уладзімер Няпомняшчых ды іншыя.

Парлямэнцкія выбары-2019 у Беларусі. Што варта ведаць

Асноўны дзень галасаваньня на выбарах у Палату прадстаўнікоў сёмага скліканьня — ніжнюю палату Нацыянальнага сходу — 17 лістапада. Датэрміновае галасаваньне праходзіла ад 12 да 16 лістапада. Папярэднія вынікі сталі вядомыя 18 лістапада, ніводзін апазыцыянэр ня трапіў у Нацыянальны сход.

  • За 5 дзён датэрміновага галасаваньня на парлямэнцкіх выбарах у Беларусі, паводле ЦВК, прагаласавала 35,77% выбарнікаў. Незалежныя назіральнікі заяўляюць пра завышэньне яўкі больш чым у 2 разы.
  • Агулам у Палату прадстаўнікоў трапляе 110 дэпутатаў. Дэпутаты ніжняй палаты выбіраюцца паводле выбарчых акругаў, а не партыйных сьпісаў. Праўладная «Белая Русь» прапаноўвала выбіраць прынамсі палову дэпутатаў паводле партыйных сьпісаў (як, напрыклад, ва Ўкраіне), але ўлады гэтую ідэю адхілілі.
  • Галасаваць на выбарах у Палату маюць права усе паўналетнія грамадзяне Беларусі. Галасаваньне добраахвотнае і ня можа быць прымусовым. Скардзіцца на прымус да галасаваньня можна ў пракуратуру ці ў райвыканкамы.
  • Цяперашнія выбары адбыліся датэрмінова, хоць фармальна датэрміновымі ня лічацца. Тэрмін паўнамоцтваў дэпутатаў Палаты прадстаўнікоў — 4 гады. Але калі паміж выбарамі 2012 і 2016 гадоў прайшло 1449 дзён (3 гады, 11 месяцаў і 19 дзён), то паміж выбарамі 2016 і 2019-га пройдзе ўсяго 1162 дні (3 гады, 2 месяцы і 6 дзён).
  • Лукашэнка першапачаткова прапаноўваў правесьці выбары ў Палату на 7 лістапада — Дзень Кастрычніцкай рэвалюцыі. Старшыня ЦВК Лідзія Ярмошына тлумачыла, што гэтак ня варта рабіць. Урэшце на гэты дзень прызначылі выбары ў Савет Рэспублікі.
  • Выбары ў Савет Рэспублікі — верхнюю палату Нацыянальнага сходу — прайшлі 7 лістапада без удзелу звычайных беларусаў. Па 8 дэпутатаў ад вобласьці і яшчэ 8 ад Менску выбралі на абласных сходах дэпутаты гарадзкіх і раённых саветаў, яшчэ 8 дэпутатаў мае права прызначаць (але звычайна прызначае ня ўсіх) асабіста Аляксандар Лукашэнка. Ніводную кандыдатуру не адхілілі.
  • Фракцый у Палаце прадстаўнікоў няма. Апазыцыя амаль не трапляе ў Нацыянальны сход. Так, у Палаце прадстаўнікоў шостага скліканьня толькі 2 са 110 дэпутатаў — не прыхільнікі Лукашэнкі: Ганна Канапацкая ад Аб’яднанай грамадзянскай партыі і беспартыйная Алена Анісім, старшыня Таварыства беларускай мовы. У Савеце Рэспублікі апазыцыі няма.
  • Нацыянальны сход дзейнічае з 1996 году — пасьля таго як Лукашэнка распусьціў Вярхоўны Савет XIII скліканьня. Выбары дэпутатаў Нацыянальнага сходу першага скліканьня не праводзіліся, Лукашэнка проста прызначыў туды ляяльных яму дэпутатаў Вярхоўнага Савету.
  • Нацыянальны сход амаль не распрацоўвае законапраектаў (часьцей гэта робяць міністэрствы і ведамствы) і амаль ніколі не галасуе супраць. Рэкорд шостага скліканьня Палаты прадстаўнікоў — 10 галасоў (9%) супраць звужэньня паўнамоцтваў сваёй палаты.
  • Краіны Заходняй Эўропы і ЗША не прызнавалі свабоднымі і дэмакратычнымі ніякія выбары і рэфэрэндумы ў Беларусі пасьля 1994 году. На ўсіх выбарах назіральнікі адзначалі шматлікія парушэньні, пасьля давалі рэкамэндацыі, але Лукашэнка прасіў яго «не павучаць».
  • На выбары 17 лістапада выстаўлялі кандыдатаў прынамсі 7 апазыцыйных партыяў і шэраг рухаў. На ранейшых выбарах далёка ня ўсіх апазыцыянэраў рэгістравалі кандыдатамі або чальцамі выбарчых камісій.
  • На пачатак датэрміновага галасаваньня з 560 зарэгістраваных засталося 516 кандыдатаў. 33 самі зьнялі свае кандыдатуры, яшчэ адносна 13 скасавалі рэгістрацыю за парушэньні (6 зь іх — ад апазыцыйнай «Эўрапейскай Беларусі»). Ніводнай безальтэрнатыўнай акругі няма
  • Выбары каштавалі бюджэту каля 23 млн беларускіх рублёў. Лукашэнка кажа, што выбары «павінны прайсьці як сьвята», а Нацыянальны сход мае стаць «дыскусійнай пляцоўкай для дыялёгу дэпутатаў з рознымі поглядамі». Старшыню ЦВК Лідзію Ярмошыну «палохала цішыня» вакол выбараў, а 99% беларусаў лічаць, што ня могуць паўплываць на органы ўлады.
  • Як сьцьвярджае ЦВК, яўка на выбары склала 77,22%. На трох мінулых выбарах у Палату называлася яўка каля 74%, а рэкорд быў у 2004 годзе, калі называлася яўка 89,84%.
  • Паводле папярэдніх вынікаў, у Палату прадстаўнікоў ​прайшлі 66 мужчын і 44 жанчыны​; 30 дзейных дэпутатаў, 2 чалавекі ва ўзросьце да 30 гадоў, ніводнага апазыцыянэра.
  • Сярод вядомых беларусаў, якія трапляюць у Палату прадстаўнікоў, былая міністарка інфармацыі Лілія Ананіч, «Міс Беларусь-2018» Марыя Васілевіч, кіраўнік «Белай Русі» Генадзь Давыдзька, старшыня ЛДПБ Алег Гайдукевіч.
  • Незалежныя беларускія назіральнікі фіксавалі парушэньні на датэрміновым галасаваньні і ў асноўны дзень выбараў (731 парушэньне і 622 скаргі, у тым ліку 341 — толькі за 17 лістапада), кожнага трэцяга незалежнага назіральніка выдалілі з участка. Асноўным парушэньнем называецца адсутнасьць адкрытага падліку бюлетэняў і забарона на капіяваньне выніковага пратаколу ўчастковай камісіі. Назіральнікі АБСЭ назвалі выбары неадпаведнымі важным міжнародным дэмакратычным стандартам. Місіі СНД і ШАС назвалі выбары «празрыстымі і дэмакратычнымі».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG