Пра гэта піша выданьне «Новая газета. Европа».
25 верасьня Камардзін выступаў на «Маякоўскіх чытаньнях» — мерапрыемстве, дзе паэты чытаюць свае вершы каля помніка Ўладзіміру Маякоўскаму ў цэнтры Масквы. Арганізатары чытаньняў аб’явілі іх «антымабілізацыйнымі».
Камардзіна затрымалі днём 26 верасьня ў кватэры разам з Аляксандрай Паповай і Аляксандрам Менюковым. Паліцыянты не пусьцілі туды адваката, спаслаўшыся на тое, што праводзіцца «агляд памяшканьня». З кватэры Папову і Камардзіна вывелі ў кайданках, Менюкова — без кайданкоў. Усіх актывістаў павезьлі ў Сьледчы аддзел па Цьвярскім раёне Масквы.
Паводле зьвестак выданьня, сілавікі «вельмі моцна зьбілі Камардзіна і засунулі яму ў анальную адтуліну гантэлю». Яны запісалі на відэа згвалтаваньне Арцёма і паказвалі яго Аляксандры Паповай. Камардзін да гэтага часу ў паліцыі.
Папова расказала, што сілавікі зьдзекаваліся і зь яе. «На мне вельмі шмат супэрклею, таму што сілавікі прыляплялі мне на супэрклей стыкеры да твару, спрабавалі заклеіць рот, вырывалі валасы, штурхалі, пагражалі згвалтаваньнем упяцёх», — паведаміла яна.
Па якой крымінальнай справе праводзіліся апэратыўныя мерапрыемствы і як яна зьвязана з актывістамі, якія жывуць у кватэры — невядома.
У тэлеграм-канале «112» зьявілася відэа з «выбачэньнямі» затрыманых. У паведамленьні згадваюць таксама 21-гадовага Ягора Штоўбу і 26-гадовага Мікалая Дэйнэку. Дзе былі зьнятыя прабачэньні Штоўбы і Дэйнекі — невядома.