Лінкі ўнівэрсальнага доступу

У Расеі затрымалі больш за 700 удзельнікаў акцый супраць мабілізацыі


 Акцыі пратэсту супраць мабілізацыі ў Пецярбургу
Акцыі пратэсту супраць мабілізацыі ў Пецярбургу

Больш за 700 удзельнікаў акцый пратэсту супраць мабілізацыі былі затрыманыя ў суботу ў Расеі. Больш за палову зь іх — у Маскве і Пецярбургу. Такія зьвесткі «ОВД-инфо» на вечар 24 верасьня.

Правесьці акцыі заклікаў рух «Весна». Аб месцы правядзеньня акцый было абвешчана толькі сёньня.

Паводле дадзеных «ОВД-инфо», у Маскве былі затрыманыя больш за 300 чалавек, у Пецярбургу больш за 100. Акцыі як такія не пасьпелі пачацца, паліцыя стала затрымліваць людзей яшчэ да заяўленага часу іх пачатку. У Маскве людзей затрымлівалі на Чыстых прудах.

Як паведамляе «ОВД-инфо», у Маскве сярод затрыманых была непаўналетняя інвалід па зроку.

Затрыманьні працягнуліся ў Зарадзьдзі, куды дайшлі некалькі дзясяткаў удзельнікаў шэсьця.

У Пецярбургу людзей затрымлівалі на Садовай вуліцы. АМАП ужываў дубінкі і электрашокеры.

Паводле відавочцаў, людзей на акцыях было менш, чым на пратэстах у дзень аб’яўленьня мабілізацыі — 21 верасьня.

Акцыі пратэсту, анансаваныя «Весной», прайшлі сёньня таксама ў іншых гарадах Расеі. У шэрагу гарадоў — дзясяткі затрыманых, напрыклад у Навасібірску іх каля 70.

Усе акцыі не былі ўзгоднены з уладамі — акцыі пратэсту ў Расеі не ўзгадняюць з сакавіка 2020 году на падставе пандэміі каранавіруснай інфэкцыі.

Пасьля акцый пратэсту 21 верасьня ў Расеі былі затрыманыя больш за 1000 чалавек. Многім з затрыманых маладых мужчын уручылі позвы ў ваенкаматы.

  • 21 верасьня 2022 году прэзыдэнт Расеі Ўладзімір Пуцін аб’явіў у краіне мабілізацыю насельніцтва на вайну ва Ўкраіне і падпісаў адпаведны ўказ. Прэзыдэнт назваў яе частковай, аднак у адкрытай частцы ўказу ніякімі парамэтрамі, за выключэньнем прадугледжаных заканадаўствам, яна не абмежаваная. З многіх рэгіёнаў паступаюць паведамленьні аб масавым прызыве людзей.

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў.
  • Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка даў інтэрвію расейскай прапагандыстцы Вользе Скабеевай, зь якога вынікала, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 1 жніўня Лукашэнка сказаў, што больш як палова тактычнай ядзернай зброі, якую заплянавана разьмясьціць на беларускай тэрыторыі, ужо «завезена і разгрупавана» па краіне. Ён ня раз заяўляў, што ўжыве ядзерную зброю ў выпадку агрэсіі супраць Беларусі.
  • У чэрвені 2023 году ўкраінскія войскі пачалі контранаступальныя апэрацыі на ўсходзе і поўдні краіны. Расейскія войскі падрыхтавалі добра ўмацаваныя лініі абароны, таму прасоўваньне контранаступу ішло са значнымі стратамі.
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы правялі некалькі масавых абстрэлаў украінскіх гарадоў, у Дніпры, Кіеве, Харкаве і іншых месцах дзясяткі людзей загінулі і атрымалі раненьні. Украінскі бок у адказ абстраляў расейскі Белгарад, некалькі чалавек загінулі.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG