Лінкі ўнівэрсальнага доступу

Суд у Канадзе прысудзіў $84 млн сем’ям шасьці пасажыраў зьбітага ў Іране ўкраінскага «Боінгу»


На месцы падзеньня Boeing 737-800, Тэгеран.

Суд у канадзкай правінцыі Антарыё пастанавіў спагнаць з Ірану суму, эквівалентную 84 мільёнам даляраў ЗША, на карысьць семʼяў шасьці пасажыраў зьбітага над Тэгеранам пасажырскага «Боінгу» «Ўкраінскіх авіяліній».

Рашэньне было вынесенае 31 сьнежня, аднак вядома пра яго стала толькі ў панядзелак, — перадае канал CBC.

Самалёт з 176 пасажырамі і членамі экіпажа на борце быў зьбіты ў чэрвені 2020 году зэнітнай ракетай Корпусу вартавых ісламскай рэвалюцыі — ваенізаванага фармаваньня, якое валодае значнай палітычнай уладай у Іране.

Іран настойваў, што самалёт быў зьбіты памылкова ў чаканьні авіяўдару з боку ЗША. Спэцыяльная сьледчая група ў Канадзе палічыла, што хоць Тэгеран і не плянаваў зьбіваць самалёт спэцыяльна, яго афіцыйныя асобы ўсё роўна нясуць адказнасьць за тое, што здарылася.

З 176 чалавек на борце 55 былі грамадзянамі Канады, а яшчэ 30 чалавек мелі сталы дазвол на жыхарства ў краіне. У судах знаходзяцца яшчэ некалькі аналягічных пазоваў. Паміж Канадай і Іранам няма дыпляматычных адносінаў, прадстаўнікі Тэгерану ў працэсе ня ўдзельнічалі.

Агенцтва Reuters раней адзначала, што гэта можа ўскладніць спагнаньне грошай з Ірану. Адвакат семʼяў разьлічвае, што ўдасца арыштаваць актывы ісламскай рэспублікі ў Канадзе або за мяжой.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG