Лінкі ўнівэрсальнага доступу

ЦВК адмовіла блогеру Ціханоўскаму ў рэгістрацыі ініцыятыўнай групы, Лукашэнку і Гайдукевіча зарэгістравалі


Сяргей Ціханоўскі

ЦВК Беларусі вырашыла, што блогер Сяргей Ціханоўскі няправільна аформіў дакумэнты, на заяве няма ягонага подпісу. Ён сам адбывае пакараньне, 15 сутак арышту.

Цэнтарвыбаркам на паседжаньні 15 траўня адмовіў у рэгістрацыі ініцыятыўнай групы па вылучэньні кандыдатам у прэзыдэнты Сяргея Ціханоўскага.

Дакумэнты на рэгістрацыю ініцыятыўнай групы падавала ягоная жонка Сьвятлана Ціханоўская на падставе даверанасьці, атрыманай яшчэ ў студзені гэтага году. Як сказала яна падчас паседжаньня, там адзначана, што яна ўпаўнаважаная быць прадстаўніцай мужа ва ўсіх дзяржаўных інстанцыях, мае права падпісваць і падаваць ад яго імя любыя дакумэнты.

Як матывавала прапанову адмовіць у рэгістрацыі загадчыца прававой, аналітычнай і мэтадычнай работы ЦВК Галіна Мкртчан, падчас падачы дакумэнтаў патрабуецца прысутнасьць заяўніка, а ён адбывае адміністрацыйны арышт. Старшыня Цэнтарвыбаркаму Лідзія Ярмошына аргумэнт падначаленай падтрымала. Усе чальцы камісіі прагасавалі супраць рэгістрацыі ініцыятыўнай групы Ціханоўскага.

Заява аб рэгістрацыі Віталя Зялкоўскага таксама была адхіленая з прычыны няправільна аформленых дакумэнтаў, ён прыслаў іх па электроннай пошце, сам у камісію не прыйшоў: паводле Ярмошынай, не праявіў рэальнага жаданьня ўдзельнічаць у кампаніі.

Тым часам ініцыятыўныя групы Аляксандра Лукашэнкі і Алега Гайдукевіча без праблем зарэгістравалі.

«Прапаную зарэгістраваць ініцыятыўную групу Аляксандра Рыгоравіча Лукашэнкі пад нумарам 1» — прапанавала Ярмошына. Пярэчаньняў не прагучала.

Ініцыятыўная група дэпутата Алега Гайдукевіча была зарэгістраваная пад нумарам 2, пытаньняў да больш чым 4 тысячам сябраў ягонай групы не было.

ЦВК таксама зарэгістравала групы гомельскага фермера-блогера Юрыя Ганцэвіча і прадстаўніка Аб'яднанай грамадзянскай партыі Ўладзімера Няпомняшчых.

Заявы на рэгістрацыю ініцыятыўных групы па вылучэньні кандыдатамі ў прэзыдэнты на вечар 14 траўняпадало 34 чалавекі. Па законе ўсе ахвотныя стаць кандыдатам на прэзыдэнта павінны не пазьней 18.00 15 траўня падаць у ЦВК дакумэнты на рэгістрацыю ініцыятыўнай групы ў складзе не менш за 100 чалавек.

Хто такі Сяргей Ціханоўскі

Відэаблогера Сяргея Ціханоўскага затрымалі 6 траўня пасьля двух дзён міліцэйскага перасьледу. На наступны дзень на ягоным Youtube-канале выйшла відэа, на якім Ціханоўскі гаворыць пра намер стаць кандыдатам у прэзыдэнты Беларусі.

Дзясяткі чалавек у розных гарадах Беларусі затрымалі і асудзілі за акцыі ў падтрымку Сяргея Ціханоўскага.

Затрыманьні падчас акцыі ў Гомлі ў падтрымку Ціханоўскага, 7 траўня
Затрыманьні падчас акцыі ў Гомлі ў падтрымку Ціханоўскага, 7 траўня

Што пра яго вядома:

  • яму 41 год, жыве ў Гомлі, жанаты, мае дзяцей;
  • мае Youtube-канал з амаль 150 тысячамі падпісантаў, самае папулярнае відэа на якім мае 719 тысяч праглядаў;
  • на канале ён крытыкуе беларускія ўлады і расказвае аб праблемах жыхароў розных рэгіёнаў Беларусі; пэрыядычна ладзіць сустрэчы з падпісантамі;
  • выступае за пашырэньне мясцовага самакіраваньня ў Беларусі;
  • у сакавіку сабраў за адзін стрым 1600 даляраў на арэнду аўтадома, на якім пачаў езьдзіць у розныя гарады на запрашэньне падпісантаў;
  • неаднаразова браў удзел у палітычных акцыях пратэсту і быў караны ўладамі за гэта, у тым ліку правёў Новы год за кратамі за ўдзел у акцыях супраць «паглыбленьня інтэграцыі» Беларусі і Расеі;
  • да таго, як заняўся блогам «Страна для жизни», здымаў рэкляму і музычныя кліпы са сваёй студыяй вытворчасьці відэакантэнту «Компас» (казаў журналістам, што сам больш не займаецца гэтым, але кампанія працуе), купляў «кулацкі дом» у вёсцы пад Гомлем і зьбіраўся зрабіць там гатэль;
  • раней меркаваў стаць адным з «кандыдатаў пратэсту» Міколы Статкевіча.

Прэзыдэнцкія выбары — 2020 у Беларусі. Што важна ведаць

УЖЫВУЮ Выбары-2020. Як праходзіць прэзыдэнцкая кампанія падчас пандэміі

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак. Кандыдат у прэзыдэнты на выбарах-2010 Мікола Статкевіч зьбіраўся зарэгістраваць 30 «кандыдатаў пратэсту», каб мець магчымасьць зьбіраць людзей на вуліцах, але ня ўдзельнічаць ў саміх выбарах. Яго і амаль усіх ягоных паплечнікаў не дапусьцілі да збору подпісаў — зарэгістравалі толькі групу Ўладзімера Няпомняшчых.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“». 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG