Лінкі ўнівэрсальнага доступу

У Берасьці каля 200 чалавек выйшлі «карміць галубоў» супраць акумулятарнага заводу. Ёсьць затрыманыя


Затрыманьне Рамана Кісьляка. Фота: Станіслаў Коршунаў, Tut.by

Жыхары Берасьця 10 траўня выйшлі на ўжо традыцыйную акцыю супраць запуску акумулятарнага заводу — два гады па нядзелях яны выходзяць «карміць галубоў» у цэнтар гораду. Акцыя прайшла без транспарантаў і лёзунгаў.

Як піша «Брестская газета», пасьля акцыі АМАП затрымаў праваабаронцу Рамана Кісьляка (відэа затрыманьня публікуюць у суполцы праціўнікаў заводу), а таксама мужчыну, якога некаторыя ўдзельнікі палічылі правакатарам — той прыйшоў на плошчу з партрэтам Аляксандра Лукашэнкі і дзяржаўным сьцягам, шыльдай з надпісам «Я/мы Лукашенко. Освободим патриотов Беларуси Тихановского и Петрухина». Таксама могуць быць затрыманыя яшчэ два ўдзельнікі акцыі — інфармацыя пра іхнае затрыманьне не пацьверджаная.

Tut.by адзначае, што Кісьляка затрымалі, калі ён здымаў на відэа затрыманьне мужчыны з партрэтам Лукашэнкі.

Паводле назіраньняў «Эўрарадыё», у акцыі ўдзельнічалі каля 200 чалавек, а паводле падлікаў Кісьляка, якія перадае БелаПАН, было 230. Цягам некалькіх дзён да акцыі былі затрыманыя актывісты Ўладзімер Мароз, Юры Калько, Дзяніс Малышэнка, Канстатцін Астапук, Алег Вялаў, Сяргей Пятрухін (апошні сустракае ў ізалятары дзень народзінаў). Блогер Аляксандар Кабанаў у лякарні пад назіраньнем міліцыянтаў.

Удзельнікі акцыі, сьцьвярджаў Кісьляк, намагаліся трымаць бясьпечную дыстанцыю, многія прыйшлі ў мэдычных масках у сувязі з пандэміяй каранавірусу.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG