Лінкі ўнівэрсальнага доступу

Пандэмія каранавірусу ў Беларусі і ў сьвеце. Як разьвіваюцца падзеі

абноўлена

Шпіталь для лячэньня пацыентаў з каранавірусам, уладкаваны ў школьнай спартовай залі ў Бішкеку, Кіргізстан

Коратка

Карысныя парады

10:09 28.2.2020

COVID-19 у сьвеце і ў Беларусі. Галоўнае

10:15 28.2.2020

Першыя выпадкі заражэньня каранавірусам 27 лютага выяўвілі ня толькі ў Беларусі, а і ў Літве​, Нідэрляндах, Нігерыі і Новай Зэляндыі. Агулам COVID-19 зафіксвавалі ў 46 краінах сьвету.

На раніцу 28 лютага ў сьвеце было зафіксавана каля 83,4 тысячы выпадкаў заражэньня COVID-19. Зь іх 78,9 тысячы ў Кітаі, 2 тысячы ў Паўднёвай Карэі, больш за 650 у Італіі, звыш дзьвюх соцень у Іране і Японіі. Таксама сем соцень выпадкаў зафіксавалі на круізным ляйнэры Diamond Princess, што працяглы час стаяў ля берагоў Японіі.

Ад хваробаў, выкліканых вірусам, памерлі 2858 чалавек (2788 у Кітаі, 26 у Іране, 13 у Паўднёвай Карэі).

За апошні дзень зафіксавалі 335 новых выпадкаў у Кітаі, 256 — у Паўднёвай Карэі. За дзень памерлі 44 чалавекі — усе ў Кітаі.

Што трэба ведаць пра новы каранавірус з Кітаю

  • УЖЫВУЮ Каранавірус у Беларусі і ў сьвеце. Як разьвіваюцца падзеі
  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Проста чханьне — не сымптом каранавірусу.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​


Найважнейшыя пытаньні і адказы пра каранавірус

Як зьмяняецца колькасьць хворых у Беларусі і суседніх краінах. Толькі графікі

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

10:20 28.2.2020

Каранік: у першага пацыента тэмпэратура не вышэй за 37,4°

Міністар здароўя Ўладзімір Каранік раніцай 28 лютага расказаў, што ў першага ў Беларусі пацыента з COVID-19 «мінімальныя прыкметы парушэньня здароўя», перадае БелТА.

Студэнт з Ірану вучыцца ў БНТУ, жыў у прыватнай кватэры, цяпер шпіталізаваны. Тэмпэратура ў яго не падымаецца вышэй за 37,4°С.

Пацыента, кажа міністар, выклікалі на абсьледаваньне ў 33-ю паліклініку ў Менску, сам ён ня скардзіўся на здароўе на той момант. Мэдыкаў насьцярожыла крыху падвышаная тэмпэратура (37,3°С) і пачырваненьне ў горле. Яго даставілі ў інфэкцыйную лякарню, дзе пацьвердзілі наяўнасьць каранавірусу.

Пад назіраньне мэдыкаў трапіў ня толькі хворы, але і тыя, з кім ён вучыўся. Усе яны «адчуваюць сябе абсалютна задавальняльна», запэўнівае міністар.

10:23 28.2.2020

БНТУ, студэнт якога заразіўся COVID-19, пераводзяць на індывідуальнае навучаньне

У сувязі з тым, што ў студэнта Беларускага нацыянальнага тэхнічнага ўнівэрсытэту выявілі новы каранавірус, БНТУ пераводзяць на індывідуальнае навучаньне, піша БелТА са спасылкай на міністра здароўя.

10:39 28.2.2020

У Берасьці пад назіраньнем сям’я, якая прыехала з Італіі

Вайскоўцы на вуліцах Міляну, дзе зафіксавалі ўспышку каранавірусу
Вайскоўцы на вуліцах Міляну, дзе зафіксавалі ўспышку каранавірусу

Міністар здароўя расказаў, што ў Берасьці пад назіраньнем мэдыкаў цяпер сям’я, якая прыехала зь Міляну. Цяпер у іх ня выявілі прыкметаў каранавіруснай інфэкцыі.

У гэтай сям’і — студэнтка Мілянскага ўнівэрсытэту. У ейнай суседкі па пакоі выявілі прыкметы каранавірусу. Сям’я сама зьвязалася зь Мінздароўя Беларусі яшчэ ў Італіі, атрымала рэкамэндацыі. З дапамогай амбасады сям’ю даставілі ў Беларусь машынай да мяжы, ад мяжы ў Берасьці даставілі «хуткай» у Берасьцейскую інфэкцыйную лякарню.

10:42 28.2.2020

Як паведаміў Свабодзе адзін са студэнтаў Механіка-тэхналягічнага факультэту БНТУ, дзе навучаецца студэнт з Ірану, хворы на каранавірус, цяпер мэдыкі шчыльна працуюць зь яго групай. Вядома, што заняткаў на факультэце сёньня няма. Самі студэнты чакаюць загадаў ад адміністрацыі ВНУ.

10:50 28.2.2020

У менскім аэрапорце ўжо чатыры санітарна-карантынныя пункты

«У аэрапорце ўжо чатыры санітарна-карантынныя пункты, дзе праводзіцца забор біяматэрыялу ў пасажыраў, што прылятаюць, — перадае БелТА словы прэс-сакратаркі Нацыянальнага аэрапорту Раміны Саматханавай. — Там працуюць мэдыкі. У нас па ўсёй тэрыторыі аэравакзальнага комплексу усталяваныя дэзынфэктары, рэгулярна праводзяцца клінінгавыя і дэзынфэкцыйныя мерапрыемствы ў вызначаным парадку. Увесь пэрсанал, задзейнічаны ў абслугоўваньні пасажыраў і паветраных судоў, абсталяваны індывідуальнымі сродкамі абароны».

Раней памежнікі расказвалі, што правяраюць грамадзянаў з прыкметамі вірусных захворваньняў і на «наземных» пунктах пропуску. Памежнікі сьцьвярджаюць, што гэта не ўплывае на прапускную здольнасьць.

10:56 28.2.2020

«У яго жонка была хворая, ён ад яе падхапіў» — што кажуць студэнта пра іранца з каранавірусам

«Сам іранец казаў, што ён пачуваецца някепска, у яго тэмпэратура. Але казаў, што ў яго жонка хворая. Напэўна, ён ад яе падхапіў, — распавёў Свабодзе студэнт БНТУ. — Сытуацыя спакойная. Я ўвогуле на расслабоне. Мы давяраем нашай дзяржаве. Групу, у якой вучыўся іранец, паклалі ў Бараўляны на два тыдні. Забралі іх ранкам сёньня. Ізалявалі.

Унівэрсытэт пераведзены на індывідуальнае навучаньне. Студэнты, якія не кантактавалі з гэтай групай, чакаем, што нам скажуць рабіць далей. Напэўна, праз 1-2 гадзіны будзем ведаць».

Іншы студэнт паведаміў, што ўвесь другі курс унівэрсытэту забралі ў Бараўляны зранку. Выкладчыкі таксама пераведзеныя на карантын.

11:11 28.2.2020

Студэнт на карантыне: «Ляжым, адпачываем»

«Нас прывезьлі ў шпіталь, памералі тэмпэратуру і зьмясцілі ў ізаляваны корпус. Кажуць, мы тут будзем пад наглядам два тыдні. Усе абсалютна здаровыя. Так што ляжым, адпачываем», — распавёў Свабодзе адзін са студэнтаў.

Другі дадае: «Мы зваршчыкі, нам страх невядомы. Настрой выдатны, ніхто ўвогуле не хвалюецца».

11:22 28.2.2020

Улады ня бачаць падставаў для закрыцьця межаў

@Shutterstock
@Shutterstock

«На сёньня эпідэміялягічная сытуацыя абсалютна кантраляваная, падставы закрываць межы, як у нас некаторыя радыкальныя галовы кажуць, няма», — цытуе «Інтэрфакс» міністра аховы здароўя.

Галоўная задача — забясьпечыць кантроль на зьнешнім контуры Беларусі за ўсімі, хто прыяжджае, падкрэсліў міністар. Ён таксама зьвярнуў увагу, што Сусьветная арганізацыя аховы здароўя з шэрагу прычынаў таксама не рэкамэндуе закрыцьцё межаў.

«Па-першае, гэта будзе стымуляваньне бескантрольнай незаконнай міграцыі. Калі людзям трэба, яны ўсё роўна заедуць у краіну, але абмінуць пункты кантролю. І гэта можа прывесьці да некантраляванага распаўсюду інфэкцыі. Па-другое, транзытныя пункты, дзе пасажыраў застане рашэньне аб закрыцьці межаў, могуць самі стаць новымі рассаднікамі новых ачагоў», — патлумачыў міністар.

11:55 28.2.2020

Заняткі ў БНТУ не адмянілі

«Пакуль ніякіх камэнтароў. Заняткі ў БНТУ не адмененыя»,— сказаў першы прарэктар Георгій Вяршына. Пакуль тут наагул ціха. Калі быў перапынак, студэнтаў было шмат — пераходзілі ў іншыя корпусы, сыходзілі.

12:05 28.2.2020

Як засьцерагчыся ад каранавірусу

Парады Сусьветнай арганізацыі здароўя такія:

  • Рэгулярна і вельмі старанна мыйце рукі са сродкам, які зьмяшчае спірт, альбо вадой з мылам.
  • Старайцеся знаходзіцца на адлегласьці ня меней за 1 м ад суразмоўцаў, якія кашляюць ці шморгаюць носам.
  • Не дакранайцеся да вачэй, носа і рота. На руках можа быць вірус
  • Прыкрывайце рот і нос локцем ці сурвэткай, калі кашляеце і чхаеце. Выкарыстаную сурвэтку трэба адразу выкінуць.
  • Калі ў вас тэмпература, кашаль ці вы цяжка дыхаеце, адразу зьвяртайцеся да доктара. Заставайцеся дома, калі пачуваецеся кепска.
  • Заставайцеся дома, калі вы пачуваецеся кепска, нават калі ў вас вельмі невыразныя сымптомы. Не кантактуйце зь іншымі людзьмі і не наведвайце публічных месцаў.
  • Сачыце за апошняй інфармацыяй пра сытуацыю зь вірусамі ў вашай краіне.
12:12 28.2.2020

Ліст ад Мінздароўя?

У распараджэньне Свабоды трапіў ліст, які нібыта рассылае Мінздароўя на беларускія прадпрыемствы. У лісьце просяць тэрмінова разьмясьціць дазатары з антысэптыкамі і інфармацыйныя стэнды ў месцах масавага скопішча людзей. Пацьвердзіць сапраўднасьць ліста пакуль не ўдалося.

12:20 28.2.2020

Лукашэнка пракамэнтаваў сытуацыю з каранавірусам

Ад раніцы 28 лютага Аляксандар Лукашэнка выступае на зьезьдзе праўладнай Фэдэрацыі прафсаюзаў Беларусі. Ён пасьпеў расказаць пра інфляцыйныя чаканьні, нежаданьне банкрутаваць прадпрыемствы, пасьпяховае ўтварэньне першасных прафсаюзных арганізацыяў, барацьбу зь несваечасовымі выплатамі заробкаў і іншае.

Як перадае БелТА, сярод іншага ён згадаў і COVID-19: заявіў, што «ня бачыць неабходнасьці закрываць межы празь зьяўленьне каранавірусу ў краіне». Маўляў, «гэта пустое».

Каранавірус, каранавірус у Беларусі, каранавірус у сьвеце, коронавирус, коронавирус в Беларуси, коронавирус в мире, Лукашенко про коронавирус

12:26 28.2.2020

Што адбываецца ў БНТУ, дзе ў студэнта выявілі каранавірус

12:35 28.2.2020

Абвестка на адной зь менскіх аптэк — на трох мовах. Беларускай сярод іх няма

13:04 28.2.2020

Каранавірус у сьвеце: У Манголіі ізалявалі прэзыдэнта. Першы выпадак у Брытаніі. Рынкі абваліліся

Па ўсім сьвеце каранавірус стаў прычынай сьмерці ўжо, як найменш, 2800 чалавек. Заразіліся — звыш 83-х тысяч, на ўсіх кантынэнтах, за выключэньнем Антарктыды. Па-за межамі мацерыковага Кітаю зарэгістравана звыш 4400 выпадкаў заражэньня.

Сусьветныя рынкі працягваюць рэзкае падзеньне на тле распаўсюджваньня новага тыпу каранавірусу, заражэньне якім зафіксавана ўжо больш як у 50 краінах. Сёньня адзначана падзеньне катыровак на азіяцкіх біржах — усьлед за зьніжэньнем індэксаў у чацьвер на рынках у ЗША і дзяржавах Эўропы.

Падрабязьней тут.

13:16 28.2.2020

ТЭСТ: Ці шмат вы ведаеце пра вірусы?

Ці шмат вы ведаеце пра вірусы і пра гісторыю чалавечага змаганьня зь імі? Праверце сябе.

13:27 28.2.2020

У Менскай інфэкцыйнай лякарні карантын

Ад 9 раніцы 28 лютага ў Менскай гарадзкой клінічнай інфэкцыйнай лякарні абвясьцілі карантын, піша Tut.by. Уваход на тэрыторыю забаронены, у тым ліку для наведваньня хворых. Таксама прыпыненыя кансультатыўныя прыёмы хворых (акрамя дыспансэрных аддзяленьняў гепатыту і ВІЧ для атрыманьня лекаў).

13:29 28.2.2020

Каранавірус у сьвеце: Першы выпадак пацьверджаны ў Літве

Першы выпадак новага каранавірусу (COVID-19) быў зарэгістраваны сёньня ў Літве. Вынікі тэстаў пацьвердзілі заражэньне пацыенткі, якая вярнулася з італьянскай Вэроны 24 лютага, паведамляе Міністэрства аховы здароўя Літоўскай Рэспублікі.

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Яшчэ на гэтую тэму

XS
SM
MD
LG