Лінкі ўнівэрсальнага доступу

ужывую Пандэмія каранавірусу ў Беларусі і ў сьвеце. Як разьвіваюцца падзеі

абноўлена

Рэклямны бігборд у Кішынэве (Малдова), якія заклікае жыхароў заставацца дома, 10 красавіка

Коратка

  • На раніцу 10 красавіка ў сьвеце зафіксавалі звыш 1,6 мільёна выпадкаў COVID-19: 469 тысяч у ЗША, 153 тысячы ў Гішпаніі, 143 тысячы ў Італіі, па 118 тысяч у Нямеччыне і Францыі, каля 83 тысяч у Кітаі, больш за 66 тысяч у Іране, 65 тысяч у Вялікай Брытаніі, больш за 42 тысячы ў Турэччыне.
  • Ад хваробаў, якія выклікаў новы каранавірус, у сьвеце памерлі 95 739 чалавек. Зь іх 18 279 у Італіі, 16 697 у ЗША, 15 447 у Гішпаніі, 12 210 у Францыі, 7 978 у Вялікай Брытаніі, 4 110 у Іране, 3 340 у Кітаі.
  • Выпісалі 357 тысяч пацыентаў, якіх вылекавалі ад COVID-19. «Актыўных выпадкаў» хваробы застаецца больш за 1,152 млн, зь іх 49 тысяч у цяжкім стане.
  • У Беларусі, паводле афіцыйных зьвестак на 10 красавіка, пацьверджаны 1981 выпадак COVID-19, памерлі 19 чалавек, выпісаныя здаровымі 169 пацыентаў, за суткі выяўленыя 495 новых выпадкаў. Лекары ананімна заяўляюць, што ня ўсім хворым ставяць адпаведны дыягназ.
  • Карта распаўсюду каранавірусу ў Беларусі
  • Як зьмянялася колькасьць хворых у Беларусі. Інфаграфіка
  • Як каранавірус пашыраецца ў сьвеце. Карта

Карысныя парады

14:13

Беларускі графік па-ранейшаму незвычайна выглядае ў параўнаньні зь іншымі эўрапейскімі краінамі з блізкім насельніцтвам

13:02

Мінздароўя пра пашырэньне каранавірусу. УЖЫВУЮ

12:51

«Патрывайце, пакуль не да вас». Як у часы эпідэміі жывуць людзі з хранічнымі хваробамі

У Беларусі некалькі сотняў тысяч людзей з хранічнымі захворваньнямі: звыш 350 тысяч з цукровым дыябэтам; больш за 70 тысяч з бранхіяльнай астмай, шмат людзей з хранічнымі бранхітамі, абструкцыйнай хваробай лёгкіх, дзясяткі тысяч пакутуюць на рэўматоідны артрыт, гіпэртанію, сардэчна-сасудзістыя ды іншыя захворваньні. У сувязі з новым каранавірусам яны знаходзяцца ў групе рызыкі, бо хвароба для іх асабліва небясьпечная.

Пра тое, як зьмянілася іх жыцьцё ў сувязі з пандэміяй, у матэрыяле Свабоды. Чытайце па спасылцы>>

12:48

10 масак у адны рукі — як улады зьбіваюць каранавірусны ажыятаж. Сьпіс абмежаваньняў

Міністэрства здароўя Беларусі разаслала аптэкам ліст за подпісам намесьніцы міністра Алены Богдан, якім з 10 красавіка па 1 ліпеня абвешчаныя абмежаваньні па продажу некаторых лекаў і сродкаў абароны ад інфэкцый.

Цяпер у аптэках пакупнікам у адны рукі можна набыць ня больш за:

  • 40 таблетак парацэтамолу,
  • 40 таблетак арпэтолу,
  • 20 капсул прэпарата флустоп,
  • 2 дэзынфэктары для рук аб’ёмам да 100 мл,
  • дызынфэктар аб’ёмам менш за 1 літар — 1 штуку,
  • 10 масак,
  • 5 пар пальчатак.
12:46

Беларусы падчас пандэміі сталі менш езьдзіць грамадзкім транспартам, хадзіць у кіно і рэстарацыі, — Google

Сэрвіс Google Maps працягнуў публікаваць дэталёвы аналіз паводзінаў карыстальнікаў падчас пандэміі каранавірусу. Новая справаздача (PDF) ёсьць і пра Беларусь. Паводле Google, па стане на 5 красавіка беларусы, калі параўноўваць са «звычайнымі паводзінамі», сталі:

  • на 30% менш хадзіць у рэстарацыі, кавярні, забаўляльныя цэнтры, музэі, кінатэатры і бібліятэкі;
  • на 4% менш хадзіць у крамы, на кірмашы і ў аптэкі;
  • на 19% больш хадзіць у паркі і сквэры;
  • на 25% менш карыстацца грамадзкім транспартам;
  • на 9% менш знаходзіцца на працоўных месцах;
  • на 3% больш знаходзіцца дома (цалкам чытайце тут).
12:45

Закрытая труна і не цалаваць цела: ва Ўкраіне вызначылі правілы пахаваньня памерлых ад каранавірусу

Міністэрства аховы здароўя Ўкраіны апублікавала рэкамэндацыі, як хаваць хворых з COVID-19:

  • праводзіць крэмацыю целаў памерлых ад каранавірусу ва ўкраінскім Міністэрстве аховы здароўя не патрабуюць;
  • але пры гэтым пахаваньне ці крэмацыя мусяць праходзіць у шчыльна зачыненай труне;
  • сваякам і прысутным на пахаваньні забаронена цалаваць цела памерлага;
  • на рытуальным абрадзе могуць прысутнічаць ня больш за 10 чалавек;
  • пры гэтым прысутныя павінны захоўваць бясьпечную дыстанцыю ў 1,5 мэтра;
  • цела перад пахаваньнем павінны апрацаваць дэзынфэкцыйным растворам і зьмясьціць у гермэтычны пакет-мех (цалкам чытаце тут).
12:43

Калі больш рашуча рэагаваць на пандэмію, эканоміка адновіцца хутчэй, — дасьледаваньне «гішпанкі» ў ЗША

Дасьледаваньне пандэміі грыпу 1918 году паказвае, што тыя гарады ЗША, якія агрэсіўней баранілі здароўе людзей, спраўней адбудоўвалі эканоміку. Дасьледаваньне яшчэ не прайшло рэцэнзаваньня, аднак на сайце Масачусэцкага інстытуту тэхналёгій (MIT) публікуюцца яго галоўныя высновы. Далей чытайце па спасылцы>>

12:39

Ужо 19 памерлых. У Беларусі прызналі 1981 выпадак каранавірусу, плюс 495 за дзень

Міністэрства аховы здароўя ў сваім Telegram-канале апублікавала статыстыку выпадкаў COVID-19 у Беларусі на 10 красавіка.

  • 1793 пацыентаў з каранавірусам шпіталізаваныя;
  • зь іх 72 маюць патрэбу ў штучнай вэнтыляцыі лёгкіх;
  • 169 выздаравелі;
  • памерлі 19 інфікаваных каранавірусам;
  • разам гэта дае 1981 прызнаных выпадкаў — плюс 495 выпадкаў за дзень.

Мінздароўя адзначае, што павелічэньне колькасьці хворых «паступовае і кантраляванае», а «большасьць выпадкаў гэта кантакты 1 і 2 узроўняў». Раней міністэрства сьцьвярджала, што паміралі «ў асноўным» пацыенты «з мноствам хранічных захворваньняў», цяпер — што ўсе 19 памерлых з выяўленай каранавіруснай інфэкцыяй мелі таксама хранічныя захворваньні.

Днём раней Мінздароўя паведамляла пра 1486 выпадкаў: 1331 шпіталізаваных, 16 памерлых, 139 выпісаных здаровымі, 420 новых выпадкаў за дзень.

11:50

У радзільні 3-й менскай лякарні знаходзяцца чатыры цяжарныя з COVID-19

У радзільні 3-й гарадзкой клінічнай лякарні Менску знаходзяцца на лячэньні чатыры цяжарныя з пацьверджанай каранавіруснай інфэкцыяй, паведаміла Мінздароўя ў афіцыйным Тэлеграм-канале.

Паводле Мінздароўя, іх стан стабільны. Адна з жанчын паступіла з тэмпэратурай, кашлем і дыхавіцай. Цяпер зь ёй усё добра, стан яе здароўя боязі не выклікае.

Акрамя жанчын з пацьверджаным дыягназам COVID-19, у радзільным аддзяленьні знаходзяцца і некалькі цяжарных, якія зьяўляюцца кантактамі першага ўзроўню.

11:17

«У сувязі з эпідэміялягічнай сытуацыяй». Міністэрства абароны пракамэнтавала чуткі пра «вайсковыя шпіталі для хворых на каранавірус»

«Гаворкі пра стварэньне палявых шпіталяў няма, — расказала Свабодзе афіцыйная прадстаўніца Мінабароны Натальля Гаўрусік. — Гэта абсталяваныя вайсковымі спэцыялістамі раёны ізаляцыі. Ва ўзброеных сілах ёсьць свая санітарна-эпідэміялягічная служба. Яшчэ на мінулым тыдні вайсковыя мэдыкі правялі трэніроўкі ўладкаваньня такіх ізалятараў.

Дзесьці яны паўтаралі працэс уладкаваньня такога ізалятара ў казармах, недзе ён быў зроблены ў намётах на палігоне. Мы адпрацоўвалі гэта ў сувязі з эпідэміялягічнай сытуацыяй у краіне. На выпадак яе пагаршэньня было вырашана яшчэ раз усё адпрацаваць. Такія ізалятары нельга назваць палявымі шпіталямі».

Па словах прадстаўніцы Мінабароны, гаворка пра тое, каб у такія ізалятары зьмяшчаць цывільных асобаў альбо вайскоўцаў, не вядзецца. Пакуль гэтыя аб’екты не функцыянуюць і неабходнасьці ў гэтым няма.

У ведамстве дадаюць, што раён ізаляцыі, абсталяваны пад Лепелем, ужо разабраны. Пакуль застаюцца аб’екты ў Барысаве (там раён ізаляцыі быў зроблены ў казарме), а таксама на палігоне Лосьвіда ля Віцебску.

У Мінабароне заяўляюць, што па стане на вечар 9 красавіка выпадкаў захворваньня на каранавірус сярод беларускіх вайскоўцаў няма.

10:05

«Ні масак, ні антысэптыкаў, ні пітной вады». Дзяўчына трапіла ў шпіталь і стала там кантактам першага ўзроўню па каранавірусе

«Я хвалявалася, бо ў мяне слабы імунітэт, я нават ня вельмі пераймалася, што ў мяне можа быць каранавірус», — так кажа Дар’я Рублеўская. Цяпер яна ў менскім скурна-вэнэралягічным дыспансэры, перапрафіляваным пад пацыентаў з каранавірусам і кантакты розных узроўняў.

Практыка, калі пацыентаў з яркімі сымптомамі кладуць разам з тымі, у каго сымптомы слабыя, як у Дар’і, ці ўвогуле з «кантактамі», Дар’і здаецца ня самай прымальнай. Так пацыенты могуць трапіць у карантын ці, яшчэ горш, падхапіць каранавірус, ужо знаходзячыся ў шпіталі, мяркуе Дар’я.

Чытаць гутарку >>

09:34

У Брытаніі ад каранавірусу памёр кампазытар і паэт зь Менску Дзьмітры Сьмірноў

У шпіталі гораду Ўотфард у Вялікай Брытаніі ад каранавіруснай інфэкцыі памёр кампазытар і паэт, ураджэнец Менску Дзьмітры Сьмірноў. Пра гэта паведамілі яго родныя.

Дзьмітрыю Сьмірнову быў 71 год. Ён нарадзіўся ў Менску ў сям’і опэрных сьпевакоў, скончыў Маскоўскую кансэрваторыю. У Вялікую Брытанію эміграваў у 1991 годзе.

Аўтар опэр паводле твораў Уільяма Блэйка, араторыі «Песьня песьняў» ды іншых вакальна-інструмэнтальных твораў. Быў адным з ініцыятараў і арганізатараў АСМу — Асацыяцыі сучаснай музыкі.

Сьмірноў таксама апублікаваў некалькі кніг вершаў пад псэўданімам Сьмірноў-Садоўскі, перакладаў паэзію — як з ангельскай на расейскую (Уільям Блэйк), так і з расейскай на ангельскую (Міхаіл Лермантаў). Аўтар кніг пра музыку і біяграфіі Блэйка.

09:34

Каранавірусныя выбарчыя гульні ў Польшчы

10 траўня 2020 кіроўную партыю Права і справядлівасьць у Польшчы чакае палітычнае выпрабаваньне. На гэты дзень назначаныя прэзыдэнцкія выбары, на якіх яна спадзяецца пераабраньня цяперашняга прэзыдэнта Анджэя Дуды.

Парлямэнцкія выбары 2019 году аказаліся напалову пасьпяховымі для Качыньскага: кааліцыя, узначаленая партыяй Права і справядлівасьць, атрымала большасьць месцаў у Сэйме, але мінімальна прайграла апазыцыі ў Сэнаце.​ Што будзе цяпер, разважае Ян Максімюк.

09:32

МВФ папярэджвае: сьвет сутыкаецца з «найгоршым эканамічным спадам з часоў Вялікай дэпрэсіі»

Кіраўніца МВФ Крысталіна Геаргіева сказала, што «рост усясьветнай эканомікі рэзка адмоўны ў 2020 годзе, »калі 170 з 180 чальцоў МВФ адчуваюць зьніжэньне даходаў на душу насельніцтва.

«На самай справе мы чакаем найгоршых эканамічных наступстваў пасьля Вялікай дэпрэсіі», — сказала Геаргіева на прэс-канфэрэнцыі ў Вашынгтоне напярэдадні вясновых сустрэч МВФ і Усясьветнага банку на наступным тыдні.

Гэтыя сустрэчы таксама пройдуць віртуальна з прычыны абмежаваньняў, накладзеных у сувязі з COVID-19. Геаргіева сказала, што «існуе велізарная няпэўнасьць наконт прагнозу» і працягласьці пандэміі, і сытуацыя «можа пагоршыцца».

МВФ чакае толькі «частковага аднаўленьня» налета, нават пры ўмове, што вірус зьнікне ў канцы гэтага году, што дазволіць аднавіць звычайны бізнэс, калі будуць зьняты абмежаваньні, створаныя для стрымліваньня распаўсюду.

09:30

Зянон Пазьняк: Пытаньне аб крымінальнай справе супраць Лукашэнкі за бязьдзейнасьць магла б паставіць Палата прадстаўнікоў

Адкрывальнік Курапатаў, адзін са стваральнікаў БНФ і старшыня Кансэрватыўна-Хрысьціянскай партыі БНФ, які ў 1996 годзе быў вымушаны зьехаць зь Беларусі ў палітычную эміграцыю, Зянон Пазьняк падзяліўся са Свабодай сваім бачаньнем сытуацыі ў вялікім інтэрвію.

Сьцісла

  • Амэрыка, як і Эўропа, страціла дарагі час.
  • Параўнаньне ЗША зь Беларусьсю можа быць толькі ў працы мэдыкаў. Беларускія лекары працуюць ахвярна, ня маючы патрэбных сродкаў забесьпячэньня, ня кажам ужо пра малую аплату.
  • Самая страшная небясьпека для Беларусі — гэта маскоўскі лябараторны штам сацыяльнага каранавірусу «Лукашэнка А. Р.»
  • Праца маёй жонкі належыць да той жа катэгорыі, што і праца мэдыкаў. Бездапаможных людзей без дапамогі не пакінеш.
  • Ужо паведамлялася, што адна беларуска памерла. Падазрэньне на каранавірус ёсьць цяпер у адной вядомай асобы.

Чытаць цалкам >>

09:24

Тысячы амэрыканцаў патрабуюць ад Кітаю пакрыць шкоду ад каранавірусу

Як падлічылі аналітыкі, рахунак ЗША да Кітаю за няслушныя дзеяньні на пачатковым этапе эпідэміі можа скласьці 1,2 трыльёна даляраў.

Менш чым за месяц больш за 5 тысяч грамадзян ЗША далучыліся да калектыўнай позвы, пададзенай у суд у Флорыдзе, аўтары якога патрабуюць ад кітайскага ўраду кампэнсацыі за шкоду, прычыненую COVID-19. Пазоўнікі сьцьвярджаюць, што панесьлі велізарныя страты праз халатнасьць Пэкіну, які дапусьціў распаўсюд каранавірусу па ўсім сьвеце. Падобныя групавыя позвы таксама былі пададзеныя ў суды ў Нэвадзе і Тэхасе.

«Наш пазоў тычыцца тых, хто фізычна пацярпеў у выніку ўзьдзеяньня вірусу... ён таксама тычыцца камэрцыйнай дзейнасьці Кітаю, зьвязанай з гандлем на рынках, дзе прадаецца мяса дзікіх жывёл», — заявілі прадстаўнікі юрыдычнай фірмы Berman Law Group.

08:47

Мэркель пабачыла «пробліск надзеі», Джонсана перавялі з інтэнсыўнай тэрапіі ў звычайную палату

Злучаныя Штаты застаюцца на першым месцы паводле агульнай колькасьці выяўленых выпадкаў каранавірусу — рост не спыняецца, але штодзённая колькасьць новых выпадкаў стабілізавалася на ўзроўні 31–34 тысяч. Штодзень у ЗША фіксуюць звыш 1900 сьмерцяў інфікаваных, але гэты паказьнік перастаў расьці паскоранымі тэмпамі. Ды нават пры гэтым ЗША могуць выйсьці на першае месца паводле сьмерцяў ад COVID-19 да канца тыдня.

У Італіі і Гішпаніі паступова спадае і колькасьць новых выпадкаў на дзень, і колькасьць штодзённых сьмерцяў — за 9 красавіка там памерлі адпаведна 610 і 655 інфікаваных. І там, і там колькасьць «актыўных выпадкаў» працягвае расьці, але ўжо не такімі хуткімі тэмпамі, як раней.

У Нямеччыне за мінулы дзень выявілі каля 5 тысяч новых выпадкаў і 258 сьмерцяў, але колькасьць «актыўных выпадкаў» зьмяншаецца ад 6 красавіка. Канцлерка Ангела Мэркель заявіла, што бачыць «пробліск надзеі»: пакуль удаецца не дапусьціць перагрузкі сыстэмы аховы здароўя і згладзіць крывую росту.

У Вялікай Брытаніі пакуль не назіраецца стабільнага запавольваньня распаўсюду каранавірусу, а колькасьць штодзённых сьмерцяў паступова расьце. Прэм’ер Борыс Джонсан быў пераведзены з палаты інтэнсіўнай тэрапіі ў звычайную, знаходзіцца «на раньняй стадыі выздараўленья».

08:45

Чым могуць абярнуцца абмежаваньні свабодаў у часе пандэміі

Ва ўсім сьвеце ўлады ўводзяць беспрэцэдэнтныя абмежаваньні грамадзянскіх свабодаў, намагаючыся прадухіліць распаўсюд каранавірусу. Але праваабарончыя арганізацыі папярэджваюць, што некаторыя ўрады выкарыстаюць надзвычайнае становішча для ўзмацненьня сваёй ўлады.

08:44

Як мяняліся словы Лукашэнкі пра каранавірус з ростам колькасьці хворых у Беларусі

08:43

У ЗША пачалі праграму выратаваньня эканомікі ад наступстваў каранавірусу на 2,3 мільярда даляраў

Фэдэральная рэзэрвовая сыстэма ЗША абвесьціла пра запуск праграмы пазыкаў на суму 2,3 трыльёна даляраў для амэрыканскіх прадпрыемстваў, мясцовых органаў улады і хатніх гаспадарак, якія пацярпелі ад каранавірусу ў краіне.

Старшыня ФРС Джэром Паўэл заявіў, што ягоная служба мае намер выкарыстоўваць свае паўнамоцтвы рашуча, актыўна і агрэсіўна, пакуль не зьявіцца ўпэўненасьць, што эканоміка ЗША пачала аднаўляцца

Загрузіць яшчэ

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Яшчэ на гэтую тэму

XS
SM
MD
LG