Лінкі ўнівэрсальнага доступу

«Няма нічога падобнага». Нацбанк Беларусі пракамэнтаваў словы Мядзьведзева пра адзіную валюту і эмісійны цэнтар


Нацыянальны банк Рэспублікі Беларусь, ілюстрацыйнае фота

Пра гэта напярэдадні, цытуючы словы прэм’ер-міністра Расеі Дзьмітрыя Мядзьведзева, паведаміла афіцыйнае інфармагенцтва ТАСС.

«Паводле яго (Дзьмітрыя Мядзьведзева. — РС), ня ўзгоднена дарожная мапа, прысьвечаная далейшай інтэграцыі, уключаючы стварэньне наднацыянальных органаў, адзіную валюту і адзіны эмісійны цэнтар», — паведаміла ў панядзелак 23 сьнежня расейскае інфармацыйнае агенцтва ТАСС.

Пры гэтым улады Беларусі, у тым ліку прэм’ер-міністар Сяргей Румас, неаднаразова заяўлялі, што на гэтым этапе інтэграцыі пытаньні палітычнага характару, у тым ліку стварэньня наднацыянальных органаў і адзінай валюты, не абмяркоўваюцца.

Свабода зьвярнулася па камэнтар у прэс-службу Нацыянальнага банку Беларусі. Там пацьвердзілі, што на цяперашнім этапе перамоваў паміж кіраўніцтвам Беларусі і Расеі пытаньне адзінай валюты і адзінага эмісійнага цэнтру не падымаецца. А паведамленьне агенцтва ТАСС назвалі не зусім карэктным.

«У тым пакеце дарожных мапаў, якія цяпер разглядаюцца і ўзгадняюцца, няма ніякіх згадак пра адзіны эмісійны цэнтар і адзіную валюту альбо нешта падобнае», — паведамілі Свабодзе ў Нацыянальным банку Беларусі.

«Паглыбленьне інтэграцыі» Беларусі і Расеі. Што важна ведаць

Аляксандар Лукашэнка і Ўладзімір Пуцін, ліпень 2019
Аляксандар Лукашэнка і Ўладзімір Пуцін, ліпень 2019
  • Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
  • Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
  • Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
  • У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
  • Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
  • 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
  • 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
  • Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
  • Акцыі супраць паглыбленьня інтэграцыі Беларусі і Расеі прайшлі ў Менску ​7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
  • 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».

Спэцпрапект «Чаму Беларусь не Расея»

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG