Лінкі ўнівэрсальнага доступу

Беларускія казкі ў выкананьні Алега Хаменкі можна будзе паслухаць з айфонаў


Каб найхутчэй пацешыць дзетак казкамі з калекцыі лідэра гурту «Палац», кампанія KinderFox просіць дапамогі на краўдфандынгавай пляцоўцы «Вулей». Паспрыяць стварэньню мабільнага дадатку «Беларускія казкі» могуць усе.

Спампаваўшы дадатак на тэлефон ці пляншэт, можна будзе паслухаць казку ў выкананьні Алега Хаменкі, аздобленую ілюстрацыямі Юліі Рудзіцкай.

«Мабільныя дадаткі надзвычай папулярныя, а беларускі кантэнт тут прадстаўлены вельмі сьціпла, — кажа Алег Хаменка. — Таму для нас вельмі важна, каб у мабільных прыладах зьявіліся беларускія казкі. Бо казку трэба слухаць».

«Гэтыя казкі павінны стаць вядомыя па ўсёй Беларусі. Усе мы ведаем казкі расейскія, швэдзкія, Пушкіна і Андэрсэна. А вось беларускія казкі... Ну, адну ведаем, дзьве, тры, ня болей. Дзеці ня ведаюць казак. Ды што там дзеці — дарослыя ня ведаюць. І тое, што мы робім, — гэта папулярызацыя казкі», — кажа Хаменка.

Хаменка зьбірае фальклёр больш за два дзясяткі гадоў. Гэтаксама рупліва ён клапоціцца, каб ягоныя здабыткі жылі сучасным жыцьцём, а не ляжалі на паліцах архіваў.

Алег Хаменка ў інтэрфэйсе праграмы
Алег Хаменка ў інтэрфэйсе праграмы

Калекцыя Хаменкі ўжо выдавалася на кампакт-дыску. Пасьля ў праекце Unicef пад кіраўніцтвам Юліі Ляшкевіч аздобілі казкі ілюстрацыямі Юліі Рудзіцкай, выдалі кнігу і стварылі сайт.

Цяпер усё гэта стане мабільнай прыладай. Як хутка — залежыць ад цікавасьці да праекту саміх беларусаў. Першы пазытыўны вынік: пабачыўшы абвестку на краўдфандынгавым рэсурсе, да KinderFox зьвярнуліся распрацоўшчыкі, якія гатовыя зрабіць дадатак на базе больш папулярнай у Беларусі плятформы Android.

З 30 мільёнаў рублёў, якія патрэбныя для запуску прылады, за тры тыдні сабралі траціну — 10 мільёнаў.

«Мабільнымі прыладамі людзі карыстаюцца ўвесь час, — распавядае дырэктар KinderFox Андрэй Залатар. — Мы ўжо выпускалі падобныя дадаткі для айфонаў і айпэдаў, і бачым, што гэта вельмі папулярна».

Два гады таму KinderFox ужо выпусьціла мабільны дадатак для плятформы iOS «Родная азбука». Яго спампавалі каля шасьці тысяч чалавек.

Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG