13 студзеня прайшла пятая такая сустрэча, якую праводзіць прэзыдэнт Рэспублікі Польшча, і першая з таго часу, як Караль Наўроцкі ўступіў на пасаду.
На ёй сярод іншых былі нядаўна вызваленыя зь беларускіх трумаў былыя палітвязьні.
У Бельвэдэрскім палацы прэзыдэнт Рэспублікі Польшча Караль Наўроцкі прыняў удзел у сустрэчы з нагоды Каляд і Новага года са Сьвятланай Ціханоўскай і прадстаўнікамі беларускага грамадзтва.
«З гэтага месца, як прэзыдэнт Рэспублікі Польшча, я хацеў бы падзякаваць усім свабодным беларусам за ваш цяжкі, доўгі шлях да незалежнасьці і сувэрэнітэту, які запатрабаваў столькіх ахвяр, многія з вас ахвяравалі сваім зьняволеньнем пры рэжыме Лукашэнкі. І на гэтым шляху Польшча ніколі вас не пакіне», — падкрэсьліў Караль Наўроцкі.
«Я глыбока веру, што дзякуючы гэтым сустрэчам паміж прэзыдэнтам Польшчы і беларускаю меншасьцю, з лідэрамі беларускай апазыцыі, але і зь вязьнямі, мы рухаемся ў тым кірунку, якога мы ўсе жадаем — адносін паміж дзьвюма незалежнымі, сувэрэннымі дзяржавамі, Польшчай і Беларусьсю, дзеля агульнага дабра і нашых адносін, і проста дзеля лепшага сьвету», — дадаў ён.
Прэзыдэнт Наўроцкі запэўніў, што ў Польшчы існуе кансэнсус і кампраміс адносна стаўленьня палякаў, прэзыдэнта Польшчы і ўраду да незалежнасьці і сувэрэнных памкненьняў беларусаў.
Караль Наўроцкі таксама адзначыў, што адносна пытаньня палітычных вязьняў рэжыму Лукашэнкі ён дамагаўся іх вызваленьня ў міжнародных і дыпляматычных перамовах.
Ён адзначыў, што палітвязень Анджэй Пачобут, якога ён узнагародзіў найвышэйшай польскай узнагародай — Ордэнам Белага Арла, застаецца сымбалем.
«Няхай гэта будзе сымбалем таго, што свабодная, незалежная і сувэрэнная Польшча і яе прэзыдэнт ніколі не забудуць палякаў, якія знаходзяцца ў зьняволеньні ў беларускіх турмах», — падкрэсьліў ён.
Сьвятлана Ціханоўская падзякавала і ў адказ заявіла, што «беларусы ніколі не былі чужымі палякам, гэтаксама як і Польшча — заўжды была побач зь беларусамі».
«Беларусы як нацыя фармаваліся ў складзе Вялікага княства і Рэчы Паспалітай, разам з палякамі змагаліся за незалежнасьць ад Расеі. Шмат чаму вучыліся ў польскай „Салідарнасьці“. Нас яднаюць Касьцюшка і Каліноўскі, Міцкевіч і Ажэшка, Орда і Агінскі...
Сёньня мы, беларусы, глядзім на Польшчу з захапленьнем, а часам нават і з зайздрасьцю. Вы для нас больш чым сусед і саюзьнік, вы для нас — прыклад. Менавіта такой мы б хацелі бачыць Беларусь — моцнай, свабоднай і сувэрэннай дзяржавай, якая служыць сваім грамадзянам, а не чужой імпэрыі».
Ціханоўская заявіла, што цяпер многія беларусы знаходзяцца вымушана ў выгнаньні, але гэта часова:
«Мы абавязкова вернемся дадому. Нягледзячы на ўсе спробы рэжыму зьнішчыць нас — мы працягваем рабіць сваю справу. Мэдыі аднаўляюць працу і выходзяць на новую аўдыторыю. „Белсат“ запускае новыя праграмы. Праграма Каліноўскага набірае таленавітых студэнтаў і рыхтуе кадры для новай Беларусі. Нашы праваабаронцы дапамагаюць рэпрэсаваным. Бізнэсоўцы разьвіваюць сусьветнавядомыя кампаніі. Мы захоўваем нашу мову і культуру. „Купалаўцы“ зьбіраюць поўныя залы. Беларускія спартоўцы, як Марыя Жодзік ці Крысьціна Ціманоўская, перамагаюць у польскіх спаборніцтвах».
Ціханоўская таксама ў сваім выступе выказала пра падтрымку Ўкраіне ў яе «гераічным змаганні за свабоду» і гонар за беларускіх добраахвотнікаў.
Форум