Праваабаронцы «Вясны» атрымалі інфармацыю, што 24 сакавіка на волю выйшаў памочнік старшыні Калегіі Эўразійскай эканамічнай камісіі Дзьмітры Шадко.
Акалічнасьці вызваленьня праваабаронцам невядомыя.
Дзьмітрыя Шадко затрымалі 9 сакавіка ў Маскве супрацоўнікі ФСБ. Паводле інфармацыі праваабаронцаў, амаль адразу яго перавезьлі ў Менск.
На гэтым тыдні зьявілася інфармацыя, што яго абвінавачваюць паводле арт. 289 Крымінальнага кодэксу — «Акт тэрарызму». Шадко нібыта знаёмы зь беларусамі, якіх затрымалі па справе дывэрсіі на аэрадроме ў Мачулішчах.
Таксама на волю выйшлі яшчэ два чалавекі, якіх затрымалі нібыта праз датычнасьць да дывэрсіі ў Мачулішчах, — гэта Ільля Кабанаў і Руслан Масьлянкоў. Іх затрымалі 4 сакавіка, паведамляюць праваабаронцы.
Хто такі Дзьмітры Шадко
Дзьмітры Шадко нарадзіўся ў 1979 годзе ў Менску. Скончыў БДУІР і Акадэмію кіраваньня пры прэзыдэнце. Працаваў у Цэнтральным камітэце Беларускага патрыятычнага саюзу моладзі, памочнікам генэральнага дырэктара, вядучым спэцыялістам ЗАТ «ТКД Юніспектр», адказным сакратаром, намесьнікам галоўнага рэдактара і галоўным рэдактарам часопіса «Планета».
У 2011 годзе Шадко стаў намесьнікам міністра інфармацыі, а празь некалькі гадоў — першым намесьнікам міністра сувязі і інфарматызацыі. На гэтай пасадзе ён прабыў да траўня 2019 году, потым падаў у адстаўку.
Апошнім часам Шадко займаў пасаду памочніка Міхаіла Мясьніковіча, старшыні Калегіі Эўразійскай эканамічнай камісіі (орган Эўразійскага эканамічнага саюзу, куды ўваходзяць Армэнія, Беларусь, Кіргізстан, Расея, Казахстан).
Шадко доўгі час быў зьвязаны з «ралевікамі» і час ад часу ўдзельнічаў у іхных імпрэзах — ён нібыта асабіста знаў некаторых людзей, якіх затрымалі ў справе дывэрсіі ў Мачулішчах.
«Ралевікі» (ролевы рух, або рух ролевых гульняў) — субкультура людзей, якія гуляюць у ролевыя гульні.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў