За леташні год цэны на сталічную нерухомасьць рэкордна вырасьлі. Паводле аналітыкі realt.by, у Менску кватэры ў новых дамах падаражэлі на 26%, жыльлё на другасным рынку — на 21%. Рыэлтары зафіксавалі рэкордныя цэны: напрыклад, квадратны мэтар найбольш вырас у аднапакаёвых кватэрах — да 2100 даляраў, агулам мэтар у новабудоўлі — да 1950 даляраў, у жыльлі на другасным рынку — да 1930 даляраў.
Менш у сталіцы стала і ўгодаў куплі нерухомасьці. Калі ў 2024 годзе іх было 20 тысяч, то ў 2025-м канчатковы вынік ацэньваюць у 16 800 угодаў.
З пачатку году рынак наагул спыніўся, попыт у студзені ўпаў да мінімуму. 5% кватэраў, паводле падлікаў аналітыкаў, патаньнела. За першыя два тыдні гэтага году аналітыкі налічылі толькі 238 угодаў, гэта ў 2,2 раза менш, чым месяцам раней.
Што з рэальнымі цэнамі
У абвестках прапановаў цэны звычайна вышэйшыя, чым па факце ўгоды, але, нягледзячы на стагнацыю пачатку студзеня, сярэднія значэньні ў Менску могуць уразіць.
- Мэтар у аднапакаёўцы — $2308
- Мэтар у двухпакаёўцы — $2263
- Мэтар у трохпакаёўцы — $2069
Што да канкрэтных кватэраў, аднапакаёўка ў новым комплексе «Менск-Мір» прадаецца за 288 526 рублёў, ці 98 500 даляраў. 57 квадратных мэтраў, рамонт давядзецца рабіць самому.
Аднапакаёўка ў новым комплексе «Вяршыня», што вырас паміж мікрараёнамі Малінаўкай і Каменнай Горкай, каштуе 322 212 рублёў, ці 110 000 даляраў. Кватэра ўжо адстроеная — рамантаваць ня трэба, квадрат тут каштуе 2500 даляраў.
За новую эўрадвухпакаёўку ў жыльлёвым комплексе «Паўночны Бераг» просяць 392 513 рублёў, гэта $134 000. У кватэры гатовы рамонт, яна невялікая, усяго 40 квадратаў. Вынікае, што квадрат тут каштуе $3350.
На другасным рынку цэны меншыя. Двухпакаёўка на вуліцы Карастаянавай, недалёка ад цэнтру, абыдзецца ў 248 982 рублі, ці $85 000. Значыць, квадратны мэтар тут — $1824.
Два гады таму, калі цэны толькі пачыналі расьці, такую кватэру можна было знайсьці за $62 000.
Трохпакаёўка ў новым раёне «Менск-Мір» каштуе 512 610 рублёў, ці $175 000. Жыльлё ўжо з рамонтам.
Трохпакаёўка на другасным рынку абыдзецца таньней. Напрыклад, сталінка ў раёне Трактарнага заводу каштуе 321 919 рублёў, ці $109 900.
Летась расьлі цэны і ў іншых беларускіх гарадах. Напрыклад, у Магілёве сярэдняя цана квадратнага мэтру ў чэрвені сягнула $911, што на 18,8% больш, чым у 2024 годзе. У Гомлі мэтар у чэрвені каштаваў у сярэднім $882, што вышэй, чым было ў 2024 годзе, на 23,9%.
«Гэта быў проста хапун»
Свабода на ўмовах ананімнасьці пагаварыла зь некалькімі рыэлтарамі. Зь іхных словаў, доля іншаземцаў сярод тых, хто набывае кватэры за высокую цану, — невялікая. Яны, напрыклад, ня будуць браць «хрушчоўку» ці «панэльку ў Каменнай Горцы». Большасьць жа сярод тых, хто купляе кватэры, — беларусы. Гэта зьвязана і з крэдытамі на жыльлё, і з ростам попыту з 2023 году.
«Гэта проста хапун, які працягваецца з 2023 году. Рынак нерухомасьці ў нас ня вельмі хутка рэагуе на зьмены. Многія бралі крэдыт і іх не засмучалі досыць высокія стаўкі, бо стабільна зьмяншаўся ў кошце даляр, што кампэнсавала і рост цэнаў на жыльлё, і ня вельмі выгадныя крэдытныя стаўкі. Іншаземцаў мала, яны могуць набываць нейкую элітную нерухомасьць. Што нерухомасьць купляюць толькі багатыя расейцы — гэта міт, яны ня будуць скупляць сацыяльныя панэлькі, каб здаваць іх у арэнду», — расказаў адзін з рыэлтараў.
Цяпер, зь ягоных словаў, попыт спыніўся, і гэта адбылося «празь неадэкватныя цэны».
«Скончыліся людзі, якім трэба нешта вырашаць з нерухомасьцю. На сёньня мы маем кватэры за неадэкватную цану. На рынку засталіся людзі, якія цягнуць з продажам. А зь іншага боку — скончыліся людзі, якія плянавалі нешта купіць», — дадае суразмоўца.
«Нявыгадна было захоўваць грошы ў далярах»
З словаў старшай навуковай супрацоўніцы Beroc Анастасіі Лузгіной, на падаражэньне нерухомасьці паўплывалі рост даходаў, даступнасьць крэдытаў, а таксама той факт, што ўкладаць сродкі ў даляры было нявыгадна цягам году: даляр таньнеў адносна беларускага рубля.
«Людзі думалі, куды ўкласьці рэсурсы. Хто меў вялікія ашчаджэньні, мог з улікам крэдытаў укласьціся ў набыцьцё кватэры. Гэта варыянт інвэстыцыі, а ў Беларусі ня так разьвіты фінансавы рынак, інструмэнты для інвэстыцыяў абмежаваныя, а купля жыльля — адна з магчымасьцяў. Беларускі рубель умацоўваўся адносна даляра, і пры росьце даходаў адбыўся такі эфэкт, што цэны ў далярах растуць, а ў рублях — не, а часам, наадварот, зьніжаюцца», — прыводзіць прыклад эканамістка.
То бок на пачатку мінулага году, калі даляр быў даражэйшы, кватэра ў далярах каштавала адну суму, пасьля даляр пачаў таньнець, таму ў далярах цана вырасла, а ў рублях засталася той жа.
Пакуль жа рыэлтары не чакаюць абвалу ці значнага зьніжэньня цэнаў. Хутчэй, цэны стабілізуюцца, як прагназуюць суразмоўцы.
Форум