Лінкі ўнівэрсальнага доступу

Лукашэнка параіў есьці тлустае «супраць каранавірусу». Мэдыкі раяць адваротнае


Аляксандар Лукашэнка на Верхнядзьвінскім маслазаводзе, 2011 год
Аляксандар Лукашэнка на Верхнядзьвінскім маслазаводзе, 2011 год

Аляксандар Лукашэнка даў чарговую параду супраць каранавірусу, якая не супадае з рэкамэндацыямі Сусьветнай арганізацыі здароўя. Да трактароў, хакею, лазьні і гарэлкі дадалася тлустая ежа.

У інтэрвію тэлеканалу «Мир», якое цытуе «Звязда», Аляксандар Лукашэнка заявіў, што самаізаляцыя дома, да якой заклікаюць мэдыкі шматлікіх краінаў (у тым ліку Мінздароўя Беларусі) не зьяўляецца эфэктыўнай у барацьбе з пандэміяй каранавірусу. Каб змагацца з інфэкцыямі ён параіў часьцей бываць на сьвежым паветры, займацца спортам і добра харчавацца.

«Учора адзін вельмі разумны расеец, я паслухаў, кажа: трэба фізычна змагацца зь ім, — казаў Лукашэнка пра каранавірус. — Я думаю, як жа фізычна? Трэба сябе засьцерагчы ад небясьпекі. Спортам займацца трэба і на сьвежым паветры быць. Трэба лёгкім дапамагчы.

Мы, маўляў, на дыеце сядзелі, а патрэбная тлустая ежа. І я таксама абмяжоўваў сябе. А сьметанкавае масла трэба зараз есьці, аказваецца, тлушч дапамагае лёгкім змагацца зь вірусамі. Калі спэцыяліст, вучоны кажа, напэўна, ня дурань. Вось я з досьведу свайго яго ў гэтым падтрымліваю».

На якога навукоўца спасылаецца Лукашэнка, невядома. Але Сустветная арганізацыя здароўя (WHO) раіць у час пандэміі каранавірусу пазьбягаць тлустай ежы, а таксама занадта салодкага або салёнага рацыёну, каб зьменшыць рызыку залішняй вагі (якую сярод іншага зьвязваюць з дадатковымі пагрозамі ў выпадку інфэкцыі), праблемаў з сэрцам, інсультаў, дыябэту і раку.

WHO заклікае спажываць умераную колькасьць тлушчоў і алеяў, аддаваць перавагу ненасычаным тлушчам (рыбе, соі, аліўкавым, сланечнікавым і кукурузным алеям, а ня тлустаму мясу, маслу, сыру, какосаваму або пальмаваму алею). Зь мяса раяць аддаваць перавагу «беламу» (птушынаму), а не «чырвонаму», з малочных прадуктаў — нізкай тлушчавасьці або абястлушчаныя.

Фаст-фуду, піцаў і іншай «вулічнай» і «рэстараннай» ежы, багатай на тлушчы, таксама рэкамэндуюць пазьбягаць. Каб перакусіць, WHO раіць сьвежую садавіну і гародніну замест тлустага або салодкага.

Каранавірус у Беларусі і ў сьвеце. Як разьвіваюцца падзеі >>

Што трэба ведаць пра новы каранавірус з Кітаю

  • Невядомы раней вірус выявілі ў кітайскім горадзе Ўхань у сьнежні 2019 году.
  • Афіцыйнай назвай хваробы ад новага каранавірусу з Кітаю стала COVID-19 (coronavirus disease).
  • Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
  • Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.

  • Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
  • Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг. ​

Найважнейшыя пытаньні і адказы пра каранавірус

Беларускія мэдыкі, якія загінулі падчас пандэміі COVID-19. СЬПІС ПАМЯЦІ

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG