КХЛ прыпыніла матчы ў сувязі з каранавірусам
Кантынэнтальная хакейная ліга (КХЛ) прыняла рашэньне аб прыпыненьні розыгрышу на адзін тыдзень для арганізацыі і ўзгадненьня новага фармату правядзеньня другога этапу чэмпіянату з удзелам шасьці клюбаў.
Як паведамляецца на сайце КХЛ, дата аднаўленьня спаборніцтваў будзе вызначаная найбліжэйшым часам. Таксама як і інфармацыя аб правядзеньні чэмпіянату Моладзевай хакейнай лігі.
Сьвяткаваньне Дня Волі ў Менску перанесьлі праз каранавірус
Арганізацыйны камітэт БНР-102 вырашыў адклікаць заяўку на сьвяточны мітынг-канцэрт да Дня Волі ў Менску, які меркавалі правесьці ў нядзелю, 22 сакавіка.
Рашэньне прынятае, як піша сустаршыня Беларускай хрысьціянскай дэмакратыі Віталь Рымашэўскі, «дзеля бясьпекі людзей». Цяпер, дадае ён, галоўная задача — «прымусіць улады прыслухацца да рэкамэндацыяў Сусьветнай арганізацыі здароўя і прыняць у краіне элемэнтарныя меры дзеля абароны беларусаў ад каранавірусу».
ПАРЭ адмяніла вясновую сэсію з прычыны каранавірусу
Парлямэнцкая Асамблея Рады Эўропы праз каранавірус адмяніла вясновую пленарную сэсію, якая павінна была прайсьці ў Францыі 20-24 красавіка.
Пры прыняцьці рашэньня ўлічваліся рэкамэндацыі Сусьветнай арганізацыі аховы здароўя, абмежаваньні на ўезд і выезд, якія ўвялі некаторыя краіны, а таксама рэжым карантыну, які дзейнічае ў некаторых зь іх.
Раней ПАРЭ адклала сустрэчы ўсіх камітэтаў да канца сакавіка.
Прэзыдэнт Каталёніі заразіўся COVID-19 і самаізаляваўся
Кіраўнік рэгіянальнага ўраду Каталёніі, што ў складзе Гішпаніі, прэзыдэнт Кім Тора абвясьціў 16 сакавіка, што атрымаў станоўчы тэст на COVID-19. Днём раней новы каранавірус выявілі ў намесьніка старшыні каталянскага ўраду.
Цяпер 57-гадовы Кім Тора, як і намесьнік старшыні ўраду, працуе з дому ў самаізаляцыі, пачувае сябе нармальна.
У Каталёніі, як і ў астатняй Гішпаніі, у сувязі з пандэміяй COVID-19, абвешчанае надзвычайнае становішча, закрытыя забаўляльныя ўстановы і забароненыя масавыя сходы.
15 сакавіка COVID-19 выявілі ў жонкі прэм’ер-міністра Гішпаніі. Яна і ейны муж цяпер пачуваюць сябе добра, застаюцца ў рэзыдэнцыі ў Мадрыдзе. Вірус выявілі таксама ў двух міністраў (роўнасьці і рэгіянальных справаў), у астатняга гішпанскага ўраду тэсты адмоўныя.
Макрон прыпыніў усе рэформы ў Францыі праз каранавірус
Прэзыдэнт Францыі Эманюэль Макрон заявіў пра часовае прыпыненьне ўсіх рэформаў у краіне, акрамя пэнсійнай.
Выступаючы 16 сакавіка са зваротам да нацыі, Макрон заявіў, што ўрад Францыі падасьць парлямэнту на зацьверджаньне заканадаўства аб наданьні выканаўчай уладзе надзвычайных паўнамоцтваў — выключна каб суняць эпідэмію каранавірусу.
«Ніколі раней у мірны час Францыя не прымала такіх надзвычайных захадаў», — сказаў Макрон, дадаўшы: «Мы ў стане вайны».
Прэзыдэнт запэўніў, што ўрад зробіць усё неабходнае для зьберажэньня эканомікі Францыі, і бізнэс ня будзе страчаны.
«Ніводзін бізнэс, якога б маштабу ён ні быў, ня будзе па-за ўвагай перад рызыкай банкруцтва. Ніводзін француз не апынецца ў галечы», — заявіў Макрон.
Лідэры G7 назвалі каранавірус чалавечай трагедыяй і дамовіліся аб супрацоўніцтве ў барацьбе зь ім
Лідэры краінаў «Вялікай сямёркі» дамовіліся пра больш шчыльнае супрацоўніцтва і каардынацыю супольных намаганьняў для глябальнага рэагаваньня на пандэмію каранавірусу, гаворыцца ў супольнай заяве G7.
Акрамя аховы здароўя, намаганьні будуць накіраваныя на абарону працоўных месцаў, падтрымку сусьветнага гандлю і інвэстыцый, заахвочваньне супрацоўніцтва ў галіне навукі і дасьледаваньняў. У заяве лідэры G7 назвалі пандэмію COVID-19 «чалавечай трагедыяй і глябальным крызісам у галіне аховы здароўя, які таксама стварае сур’ёзныя рызыкі для сусьветнай эканомікі».
Лідэры «Вялікай сямёркі» паабяцалі:
- каардынаваць намаганьні па затрымцы распаўсюджваньня вірусу, «у тым ліку шляхам прыняцьця адпаведных мер па кіраваньні межамі»,
- умацоўваць сыстэмы аховы здароўя ў нашых іх і ва ўсім сьвеце,
- абʼядноўваць эпідэміялягічныя і іншыя дадзеныя для лепшага разуменьня і барацьбы зь вірусам, абменьвацца інфармацыяй у рэжыме рэальнага часу,
- падтрымліваць запуск сумесных дасьледчых праектаў для хуткай распрацоўкі, вытворчасьці і распаўсюджваньня мэтадаў лячэньня і вакцыны,
- каардынаваць свае дзеяньні з онлайн-плятформамі, каб забясьпечыць максымальны доступ грамадзкасьці да самай апошняй правільнай і актуальнай афіцыйнай інфармацыі сытуацыю з каранавірусам.
Сустветная арганізацыя здароўя адзначыла «хуткі рост» COVID-19
На брыфінгу 16 сакавіка генэральны дырэктар Сусьветнай арганізацыі здароўя (WHO) Тэдрас Аданом Гебрэесус адзначыў «хуткі рост» распаўсюду новага каранавірусу і такое ж паскарэньне захадаў супраць COVID-19 — як то закрыцьця школаў, скасаваньня спартовых гульняў і сходаў.
«Але мы ня бачылі досыць імклівага паскарэньня тэставаньня, ізаляцыі і пошуку кантактаў [тых, хто кантактаваў з інфікаванымі. — РС], што ёсьць асновай рэакцыі, — адзначыў кіраўнік WHO. — Меры сацыяльнага аддаленьня могуць дапамагчы паменшыць перадачу і даць магчымасьць сыстэмам аховы здароўя справіцца. Мыцьцё рук і кашаль у локці могуць зьнізіць рызыку для сябе і іншых.
Ды аднаго гэтага недастаткова, каб згасіць гэтую пандэмію. Адно камбінацыя [захадаў] зьменіць сытуацыю. Я працягваю паўтараць: усе краіны павінны ўжываць комплексны падыход.
А найбольш эфэктыўны спосаб прадухіліць заражэньне і выратаваць жыцьці — гэта разрыў ланцугоў перадачы. А для гэтага трэба правяраць і ізаляваць. Вы ня можаце змагацца з агнём з завязанымі вачыма. І мы ня можам спыніць гэтую пандэмію, калі не даведаемся, хто заражаны. У нас ёсьць простае пасланьне для ўсіх краінаў: тэсты, тэсты, тэсты. Тэстуйце кожны падазроны выпадак».
Ён таксама назваў пандэмію COVID-19 «вызначальным глябальным крызісам нагаша часу», які «пакажа лепшае і горшае ў чалавецтве», і заклікаў да еднасьці ў змаганьні зь вірусам.
Лічбы на раніцу 17 сакавіка
- У сьвеце зафіксавалі больш за 182,7 тысячы выпадкаў COVID-19: каля 81 тысячы ў Кітаі, 28 тысяч у Італіі, 15 тысяч у Іране, 10 тысяч у Гішпаніі, 8,3 тысячы ў Паўднёвай Карэі, 7,2 тысячы ў Нямеччыне, 6,6 тысячы ў Францыі, 4,7 тысячы ў ЗША.
- Ад хваробаў, якія выклікаў новы каранавірус, у сьвеце памерлі 7144 чалавекі: 3230 у Кітаі, 2158 у Італіі, 853 у Іране, 342 у Гішпаніі, 148 у Францыі, 93 у ЗША, 81 у Паўднёвай Карэі.
- Выпісалі здаровымі 79,9 тысячы пацыентаў, у цяжкім стане знаходзяцца 6,2 тысячы пацыентаў.
- У Беларусі пацьвердзілі 36 выпадкаў COVID-19, «на кантролі» — 2583 чалавекі.
16 сакавіка: асноўныя вынікі дня
- На вечар 16 сакавіка ў сьвеце зафіксавалікаля 180 тысячаў выпадкаў COVID-19: каля 81 тысячы ў Кітаі, 27,9 тысяч у Італіі, 14,9 тысяч у Іране, 9,4 тысяч у Гішпаніі, 8,2 тысяч ў Паўднёвай Карэі, 7,2 тысяч у Нямеччыне, 5,4 тысяч у Францыі, 4,2 тысячы у ЗША.
- У Беларусі пацьвердзілі 36 выпадкаў COVID-19, трох ужо выпісалі здаровымі і выпусьцілі дамоў, на кантролізастаюцца 2583 чалавекі — усе яны ня маюць прыкметаў інфэкцыі.
- Ад хваробаў, якія выклікаў новы каранавірус, у сьвеце памерлі 7100 чалавек: 3213 у Кітаі, 2158 у Італіі, 853 у Іране, 335 у Гішпаніі, 127 у Францыі, 75 у Паўднёвай Карэі, 75 у ЗША.
- Выпісалі здаровымі 78,3 тысячы пацыентаў
- Старшыня Эўракамісіі Урсула фон дэр Ляен прапанавала абмежаваць на 30 дзён уезд на тэрыторыю Эўразьвязу
- Прыпынены прыём дакумэнтаў на візы ў амбасадах і візавых цэнтрах Польшчы і Літвы ў сувязі з уведзеным у краінах карантынам
- Расея забараняе ўезд усім замежнікам, у тым ліку грамадзянам Беларусі
- Улады Казахстану абвясьцілі надзвычайнае становішча
- «Белавія» прыпыняе палёты ў Кішынёў і Рыгу. Усяго ў сьпісе ўжо каля 30 краін
- Міністэрства адукацыі Беларусі выдала першую рэкамэндацыю ў сувязі з пандэміяй каранавірусу: абмежаваць наведваньне, адмовіцца ад правядзеньня масавых мерапрыемстваў і па магчымасьці абмежаваць рух у саміх установах
Закупы ў часе каранавірусу: бяз панікі, але паліцы пусьцеюць
Больш за ўсё людзей цікавяць крупы, апусьцелі таксама паліцы з макаронай, рысам і чамусьці з манкай. Фотарэпартаж з Эўраопту на Казіміраўскай у Менску
Расея забараняе ўезд усім замежнікам, у тым ліку беларусам
Забарона будзе дзейнічаць ад 18 сакавіка да 1 траўня. Яна ня будзе тычыцца дымляматаў, экіпажаў самалётаў і некаторых іншых катэгорый замежнікаў.
Раней сёньня прэс-служба расейскага ўраду заявіла, што беларускі бок быў загадзя папярэджаны аб плянаваных мерах падчас тэлефоннай размовы 15 сакавіка прэм'ера РФ Міхаіла Мішусьціна і кіраўніка ўраду Беларусі Сяргея Румаса.
«Такога не было даўно». Рэпартаж зь беларуска-польскай мяжы
Польшча абмежавала ўезд на сваю тэрыторыю іншаземцам, у тым ліку і беларусам, з 15 да 24 сакавіка. Мы паглядзелі, што адбываецца ў пункце пропуску Брузгі — Кузьніца, і даведаліся, як беларусам выбрацца з Польшчы.
«Большасьць адмоваў — у сакавіку». Як сытуацыя з каранавірусам закранула ўязны і ўнутраны турызм
Праз сытуацыю з каранавірусам моцна цярпіць турыстычная галіна Беларусі. Найбольшыя страты нясуць кампаніі, якія працуюць на выезд. Сурʼёзны спад арганізаваных групаў прыпаў на сакавік і красавік. Аднак прадстаўнікі турыстычных кампаніяў спадзяюцца, што пры добрым раскладзе на летні сэзон турыстычны паток у Беларусь захаваецца.
На Горадзеншчыне з падазрэньнем на каранавірус шпіталізавалі двух кіроўцаў фураў
Двух кіроўцаў-«дальнабойнікаў» шпіталізавалі ў Горадзенскай вобласьці з падазрэньнем на каранавірус, піша «Гродзенская праўда».
Аднаго кіроўцу хуткая забрала з мяжы. Мужчына вяртаўся зь Італіі, у яго павысілася тэмпэратура.
Яшчэ адзін кіроўца зьвярнуўся за мэдычнай дапамогай сам. Апошнія два тыдні ён быў у Эўропе, у тым ліку наведваў Італію. Мужчына таксама мае прыкметы рэсьпіраторнай інфэкцыі.
Абодвух дальнабойшчыкаў шпіталізавалі ў інфэкцыйную больніцу.
Раней, на Горадзеншчыне быў лябараторна пацьверджаны адзін выпадак заражэньня каранавірусам.
У Літву і Польшчу ўжо не заедзеш, а вярнуцца можна. Пасажырскія перавозкі ў Расею ніхто не скасоўваў
Міжнародныя зносіны Беларусі з Украінай і дзяржавамі Эўразьвязу часова прыпыненыя. Аднак беларусы, якія апынуліся за мяжой, могуць вярнуцца на радзіму.
І цягнікі, і аўтобусы, і самалёты ў Расею пакуль не скасавалі — усе рэйсы выконваюцца, нягледзячы на заявы расейскага боку пра закрыцьцё мяжы зь Беларусьсю.
Чаму Лукашэнка рэагуе на каранавірус ня так, як усе навокал?
- Беларусь — адзіная краіна ў рэгіёне, якая не закрыла межаў, не ажыцьцявіла іншыя больш жорсткія захады супраць пашырэньня каранавірусу.
- Лукашэнка прынцыпова заняў іншую пазыцыю што да бяды, зь якой змагаецца ўвесь сьвет.
- Гэтая пазыцыя вынікае зь філязофіі, якую вызнае палітычны рэжым у Беларусі.
- Велізарнае абурэньне Лукашэнкі выклікала рашэньне Расеі закрыць мяжу зь Беларусьсю, бо гэта разбурае статус Беларусі як найбліжэйшага, эксклюзіўнага саюзьніка РФ.
Урад Расеі прыняў плян барацьбы з каранавірусам
Прэм’ер-міністар Расеі Міхаіл Мішусьцін распавёў 16 сакавіка пра тое, штó расейскія ўлады плянуюць зрабіць для барацьбы з пандэміяй каранавіруснай інфэкцыі COVID-19.
Поўны плян дзеяньняў кабінэту, як чакаецца, будзе прадстаўлены 18 сакавіка, але многія дэталі ўжо цяпер раскрыла расейская прэса. Ва ўрадзе пацьвердзілі прыняцьце некаторых зь пералічаных захадаў, якія тычацца бізнэсу.
Расейскі ўрад прапануе, сярод іншага:
- выдзеліць 300 мільярдаў рублёў для падтрымкі эканомікі і грамадзян;
- кампэнсаваць даходы грамадзян, якія знаходзяцца ў карантыне, за кошт працадаўцаў або бальнічных лістоў;
- зарэзэрваваць у бюджэце выплаты беспрацоўным;
- выплачваць пэнсіі і дапамогі авансам;
- абмежаваць або забараніць мерапрыемствы з удзелам больш за 1000 чалавек па ўсёй Расеі, у тым ліку міжнародныя спартовыя спаборніцтвы;
- працягнуць школьныя канікулы або ўвесьці добраахвотнае наведваньне школ;
- сфармаваць прэміяльны фонд для лекараў, якія вызначыліся ў барацьбе з каранавірусам;
- забяспечыць вытворчасць тэст-сыстэм для дыягностыкі каранавірусу;
- запусьціць сыстэму анлайн-абвесткі пра сытуацыю з каранавірусам;
- абнуліць пошліны на імпартныя лекі;
- зладзіць «падатковыя канікулы» для бізнэсу, у тым ліку для турапэратараў і авіяперавозчыкаў;
- даць кампаніям малога і сярэдняга бізнэсу квартальную адтэрміноўку па выплатах падаткаў;
- вылучыць бюджэтныя крэдыты рэгіёнам, якія выканалі пляны разьвіцьця эканомікі.
У Маскве тых, хто прыехаў зь Беларусі, абавяжуць прайсьці карантын 2 тыдні
Улады Масквы прынялі рашэньне пашырыць сьпіс краін «карантыннай зоны», пасьля вяртаньня з якіх неабходна самаізалявацца на 14 сутак. Пра гэтым паведамляецца ў панядзелак, 16 сакавіка, на сайце мэра расейскай сталіцы Сяргея Сабяніна.
«Патрабаваньне аб праходжаньні рэжыму самаізаляцыі дома на працягу 14 дзён распаўсюджваецца на грамадзян, якія прыбываюць з ЗША, Вялікабрытаніі, дзяржаў Эўрапейскага зьвязу, Украіны, Беларусі і ўсіх дзяржаў Эўропы, якія не ўваходзяць у ЭЗ», – гаворыцца ў паведамленьні.
Абутковыя прадпрыемствы Віцебску ўвялі карантын
На абутковых фабрыках «Белвест» і «Чырвоны кастрычнік» у Віцебску ўвялі карантын. Паведамленьні пра гэта зьявіліся на прахадных абодвух прадпрыемстваў, пішуць «Народныя навіны Віцебска».
Фабрыка «Чырвоны кастрычнік», якая ўваходзіць у холдынг «Марка», увяла карантын з 14 сакавіка па 3 красавіка. На «Белвесьце» канрантын увялі з 12 сакавіка, калі прадпрыемства пачне працаваць не паведамляецца.
Кіраўнік «Белвеста» Юрый Суманееў сказаў, што на прадпрыемстве меры перасьцярогі пачалі ўводзіць са студзеня і тройчы іх узмацнялі. Зараз прадпрыемства працягвае працаваць, але староньнім асобам уваход на яго забаранілі. На фабрыцы максымальна абмежавалі перамяшчэньне работнікаў, а падчас перамяшчэньняў яны мусяць насіць маскі. Прыборка ў памяшканьня праводзіцца тры разы на дзень.
Украіна скасоўвае цягнікі ў Беларусь. Чакаюць надзвычайнае становішча
Нацыянальны чыгуначны перавозьнік «Укрзалізниця» часова скасоўвае рух прыгарадных цягнікоў, якія хадзілі празь дзяржаўную мяжу зь Беларусьсю.
У прыватнасьці, ад сёньня скасаваныя рэйсы Ковель — Выжва — Ковель і Выжва — Хаціслаў — Выжва, а з 21 сакавіка Гомель — Сноўск — Гомель.
Апроч таго, ад сёньня абмяжоўваюць маршруты цягнікоў Ковель — Хаціслаў — Ковель, Сарны — Гарынь — Здалбунаў, Берасьце — Забалоцьце — Берасьце, Баранавічы — Удрыцк — Баранавічы, а пачынаючы з 21 сакавіка Чарнігаў — Ёлча — Чарнігаў. Гэтыя цягнікі хадзіць у Беларусь ня будуць.