Лінкі ўнівэрсальнага доступу

«Я на баку людзей». Лукашэнка пракамэнтаваў затрыманьні на акумулятарным заводзе

абноўлена

Будаўніцтва заводу iPower пад Берасьцем

Аляксандар Лукашэнка падчас візыту ў Берасьце 6 верасьня заявіў, што «пабачыў парушэньні» на будаўніцтве акумулятарнага заводу iPower, піша БелТА. Пратэсты супраць гэтых парушэньняў трываюць ад пачатку 2018 году.

«Думаю, ня буду вельмі арыгінальным у сваім меркаваньні: я, вядома, на баку людзей, — сказаў Лукашэнка пра акумулятарны завод. — Тут зьявіліся ўжо і арыштаваныя, і затрыманыя, і крымінальныя справы, і іншае. На жаль, яны зьявіліся тады, калі ўся інфармацыя стала здабыткам прэзыдэнта».

Лукашэнка заявіў, што як толькі да яго паступіла інфармацыя аб праблемах, зьвязаных з будаўніцтвам акумулятарнага завода, яе сталі старанна пераправяраць. Але «не разабраўшыся ў сытуацыі, махаць мячом непрымальна», падкрэсьліў ён.

«Калі я пераправерыў інфармацыю, я ўбачыў, што тут людзі, якія перажываюць за экалёгію, сваё жыцьцё, жыцьцё дзяцей, у асноўным маюць рацыю, — дадаў Лукашэнка. — І я ўбачыў правапарушэньні — з боку і асобных дзяржаўных службоўцаў, і асобных дзяльцоў, якія паабяцалі пабудаваць наогул жа патрэбны нам аб'ект».

Але будаўніцтва заводу не скасавалі

Лукашэнка дадаў, што калі акумулятарны завод у Берасьці і запускаць, то ён мусіць адпавядаць экалягічным стандартам. Ён адзначыў, што ў Беларусі яшчэ не было акумулятарнага заводу, а праект берасьцейскага быў добрым.

«Але гэта таго ня варта, каб гнабілі людзей і гадзілі экалёгію, — сказаў Лукашэнка пра праект заводу. — Мы пачынаем вычышчаць, вымываць краіну, і на табе — лыжка дзёгцю.

Таму я бачыў там крымінальныя справы і жорстка даручыў адпаведным службовым асобам заняцца гэтым пытаньнем. Калі зразумелі, што прэзыдэнт трымае на кантролі, рукамі разьвялі і адправілі ў месцы не такія аддаленыя некалькі чалавек. Астатнія ва ўцёках — шукаем. Дакладней, мы ведаем, дзе яны — прывязем дадому, гэта не пытаньне. І спытаем на ўсю катушку».

Лукашэнка дадаў, што мясцовым жыхарам трэба даць правесьці ўласную экспэртызу заводу, і «толькі яны будуць вырашаць, ці быць гэтаму заводу і якім будзе гэты завод».

Але таксама Лукашэнка адзначыў, што праз пратэсты супраць заводу «нехта палітычна хоча пагрэць рукі: ужо ўладу мяняць будуць, бо завод кепскі». У разважаньнях пра гэта ён зьвязаў Чарнобыльскую катастрофу з ростам нацыяналізму, што, паводле Лукашэнкі, «гэта прывяло да развалу Савецкага Саюзу і шмат-шмат бедаў прынесла народам, асабліва беларусам».

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трываюць ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG