Лінкі ўнівэрсальнага доступу

Праз два тыдні пасьля «разносу» сілавікоў Лукашэнка заявіў, што «практычна ня меў прэтэнзіяў» да МУС

абноўлена

Міністар унутраных спраў Юры Караеў, архіўнае фота

Аляксандар Лукашэнка 5 верасьня прыняў з дакладам міністра ўнутраных спраў Юрыя Караева. Як піша БелТА, ён асабліва падзякаваў новаму міністру за хуткае раскрыцьцё рабаваньня ювэлірнай крамы ў Менску.

«І трэба сказаць, што да нашых падразьдзяленьняў, якія лічацца за Міністэрствам унутраных справаў, я прэтэнзіяў практычна ня меў, — сказаў Лукашэнка Караеву. — Дзякуй Богу, што ў нас і абстаноўка была больш-менш спакойная ў краіне. Дай Бог так і далей».

Усяго два тыдні таму Лукашэнка ўчыніў «разнос» на нарадзе з прадстаўнікамі праваахоўных органаў, якую назваў «гістарычнай»: маўляў, «некаторыя ў пагонах прыбурэлі і абарзелі».

Тады ён вінаваціў у розных парушэньнях і злачынствах праваахоўнікаў усіх узроўняў — і сьледчых, і пракурораў, і супрацоўнікаў органаў унутраных спраў.

У прыватнасьці, падначаленых Караева ён «адрасна» вінаваціў у:

  • паверхневым дасьледаваньні заяваў аб злачынствах;
  • кепскім кантролі за законнасьцю пры разглядзе заяваў;
  • недастатковай дасьведчанасьці апэратыўнікаў аб крымінале на месцах;
  • беспакаранасьці злачынцаў, што вядзе да больш цяжкіх злачынстваў;
  • «палачна-галачкавым» падыходзе да ацэнкі дзейнасьці;
  • празьмерным ужываньні гвалту і спэцсродкаў супраць грамадзянаў;
  • злоўжываньнях пры барацьбе з гандлем наркотыкамі, падкіданьні наркотыкаў.

Караеў дапусьціў, што ў апазыцыйных СМІ ня ўсё брахня і паклёп

Міністар паабяцаў Лукашэнку, што «крыху ўзмоцніць» свой уплыў на дысцыпліну і «маральна-псыхалягічны клімат» у ведамстве, зоймецца паляпшэньнем якасьці збору доказаў у карупцыйных справах, узмоцніць працу са зваротамі грамадзянаў.

Паводле Караева, у МУС таксама будуць «пад больш вострым вуглом аналізаваць публікацыі ў СМІ пра працу органаў унутраных справаў, у тым ліку ў інтэрнэце і апазыцыйных мэдыя»:

«Яны ж таксама аднекуль гэтыя матэрыялы бяруць, і ня ўсе яны прыдуманыя або паклёп, — растлумачыў міністар Лукашэнку. — Недзе пад імі нейкія падставы, значыць, ёсьць. Каб не было беспакаранасьці і ўсёдазволенасьці тых, хто ад імя ўлады можа валодаць нейкімі прывілегіямі, як ім здаецца».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG