Лінкі ўнівэрсальнага доступу

Улады патрабуюць, каб «Айпаўэр» вярнуў грошы, на якія будаваўся акумулятарны завод


Акумулятарны завод пад Берасьцем, чэрвень 2019

Берасьцейскі аблвыканкам запатрабаваў ад ААТ «АйПаўэр» вярнуць сродкі, узятыя ў інавацыйным фондзе на будаўніцтва акумулятарнага заводу. Пра гэта сказаў на прэс-канфэрэнцыі старшыня Берасьцейскага аблвыканкаму Анатоль Ліс, піша «Виртуальный Брест».

«АйПаўэр» мусіць вярнуць грошы аблвыканкаму да 14 верасьня.

Паводле ўмоваў інвэстыцыйнай дамовы паміж аблвыканкамам і «АйПаўэр», прадпрыемства мусіла ўвесьці завод у эксплюатацыю да 31 ліпеня 2019 году. Гэтага не адбылося, і кампанія-інвэстар мусіць вярнуць грошы ўладам. Таму 14 жніўня аблвыканкам запатрабаваў «АйПаўэр» вярнуць грошы добраахвотна цягам месяца.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трываюць ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG