Лінкі ўнівэрсальнага доступу

Апублікаваныя савецкія арыгіналы пакту Молатава-Рыбэнтропа


Вячаслаў Молатаў, Іосіф Сталін і Ёахім Рыбэнтроп у Крамлі

Упершыню апублікаваныя савецкія арыгіналы Дамовы аб ненападзе паміж СССР і Нямеччынай, падпісаныя 23 жніўня 1939 году. Раней гісторыкам былі даступныя толькі нямецкія фотакопіі так званага пакту Молатава-Рыбэнтропа.

Сканы дакумэнтаў, абнародаваныя гісторыка-дакумэнтальным дэпартамэнтам МЗС Расеі, зьявіліся 31 траўня на сайце фонду «Гістарычная памяць».

Як удакладніў дырэктар фонду Аляксандар Дзюкаў, самі тэксты ўжо публікаваліся ў 1990-я са спасылкай на архіў МЗС, аднак іх візуальныя вобразы публікуюцца ўпершыню.

Дакумэнты надрукаваныя на друкарскай машынцы, пад імі стаяць подпісы наркама замежных спраў СССР Вячаслава Молатава і міністра замежных спраў нацысцкай Нямеччыны Ёахіма фон Рыбэнтропа.

Падпісаньне пакту Молатава-Рыбэнтропа
Падпісаньне пакту Молатава-Рыбэнтропа

У сакрэтным дадатковым пратаколе да Дамовы аб ненападзе гаворыцца, што бакі дамовіліся «аб разьмежаваньні сфэр узаемных інтарэсаў ва Усходняй Эўропе» у выпадку «тэрытарыяльна-палітычнага пераўладкаваньня абласьцей, якія ўваходзяць у склад Прыбалтыйскіх дзяржаў і Польшчы».

Празь тыдзень пасьля падпісаньня — 1 верасьня 1939 году — нападам Нямеччыны на Польшчу пачалася Другая сусьветная вайна. А ўжо 17 верасьня на тэрыторыю Заходняй Беларусі, якая тады знаходзілася ў складзе Польшчы, увайшлі савецкія войскі. Такім чынам, польскія землі былі падзеленыя ў адпаведнасьці са «сфэрамі інтарэсаў».

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG