Лінкі ўнівэрсальнага доступу

Каб вызначыць, ці зламалі яму руку, абаронца Курапатаў мусіць сплаціць амаль 2 тысячы рублёў


Леанід Кулакоў, архіўнае фота

1870 рублёў будзе каштаваць судова-мэдычная экспэртыза траўмы рукі абаронцу Курапатаў Леаніду Кулакову, які пацярпеў ад наезду наведніцы рэстарацыі «Поедем поедим».

«Адкуль у мяне такія грошы? Рука не згінаецца, я не магу працаваць кіроўцам, жыву на капейкі. Суд гэта добра ведае», — абураецца Леанід Кулакоў.

Кошт экспэртызы ён лічыць завышаным і зьвязвае яго зь перасьледам уладамі абаронцаў Курапат.

Інцыдэнт здарыўся летась у чэрвені. Леаніда Кулакова падчас пікетаваньня рэстарацыі «Поедем поедим» зьбіў аўтамабіль, за рулём якога была Злата Савостава.

Яна не адмаўляла ў судзе, што сьвядома паехала ў бок пікетоўцаў, якія стаялі на дарозе ў рэстарацыю: «Думала, што яны расступяцца».

У Кулакова выявілі пералом рукі і наклалі гіпс. Актывіст ацаніў нанесеную яму шкоду ў 120 тысяч рублёў.

Дыягназ «пералом» у судзе пацьвердзіў хірург 27-й паліклінікі, які лячыў актывіста.

Але судмэдэкспэрт зь Менскай абласной управы Дзяржкамітэту судовых экспэртыз заявіў, што ў абласным шпіталі, паглядзеўшы дакумэнты Кулакова, сказалі, што пералому не было.

Пасьля гэтых паказаньняў судзьдзя Натальля Петух вырашыла прызначыць новую экспэртызу траўмы рукі.

Леанід Кулакоў ня верыць, што, аплаціўшы экспэртызу, атрымае бесстароньні вынік. І не разумее, чаму суд не разгледзеў дакумэнты і рэнтгенаўскі здымак, якія ёсьць у 27-й паліклініцы, дзе яму лячылі пералом.

Чаму экспэртыза такая дарагая?

Гадзіна працы судмэдэкспэрта каштуе 20–28 рублёў, пазначана на сайце Дзяржаўнага камітэту судовых экспэртызаў.

«Атрымліваецца, экспэртыза траўмы, якую я атрымаў, запатрабуе каля 70 гадзін працы экспэрта, альбо 8 працоўных дзён. Чаму гэтак шмат?» — дзівіцца актывіст.

У Дзяржкамітэце сказалі, што названы Леаніду Кулакову кошт — арыенціровачны.

«Канчатковы будзе выстаўлены пасьля правядзеньня ўсіх экспэртыз і вывучэньня дакумэнтаў. Могуць прызначыць яшчэ дасьледаваньні, за якія прыйдзецца заплаціць. Усе нашы расцэнкі зацьверджаныя старшынём», — сказала супрацоўніца Дзяржкамітэту судовых экспэртызаў Ганна Прохарчык.

Пікетаваньне рэстарацыі «Поедем поедим» каля Курапатаў доўжыцца з чэрвеня 2018 году. Калі скласьці разам усе прысуджаныя пікетоўцам штрафы — выйдзе больш як 50 тысяч рублёў. Некалькі чалавек у пікеце пацярпелі ад агрэсіўных наведнікаў.

У сваю чаргу, дырэкцыя рэстарацыі летась патрабавала завесьці на актывістаў крымінальную справу за хуліганства. У сьнежні ёй адмовілі ў завядзеньні справы, але пазьней пракуратура Менскай вобласьці пастанавіла правесьці дадатковую праверку заявы. Вынікі праверкі пакуль невядомыя.

Пратэсты супраць рэстарацыі ля Курапатаў. ​Што важна ведаць

Што адбываецца. Грамадзкія і палітычныя актывісты з чэрвеня 2018 году пікетуюць рэстаран «Поедем поедим», што месьціцца ля Курапатаў. За 50 мэтраў ад гэтага месца ў 1930-я адбываліся масавыя расстрэлы. Карнікі НКВД расстралялі тут, па розных ацэнках, ад 30 тысяч да 250 тысяч чалавек.

З чаго ўсё пачалося. Будоўля забаўляльнага комплексу пад назвай «Бульбаш-хол» пачалася ў 2012 годзе ў ахоўнай зоне Курапатаў. У 2014-м ахоўную зону зьменшылі. Гісторыя будаўніцтва і змаганьня тут.

Рэстаран каля Курапат не парушаў зоны аховы? МАПЫ

​1 чэрвеня 2018 рэстаран «Поедем поедим» пачаў рэклямавацца ў інтэрнэце я, а ўвечары 5 чэрвеня меркавана пачаў працаваць.

З таго часу грамадзкія актывісты штодня пікетуюць рэстаран, патрабуючы яго закрыцьця і сьцьвярджаючы, што ён парушае ахоўную зону вакол народнага мэмарыялу і не адпавядае нормам грамадзкай маралі.

Як праходзяць пратэсты. Са сьцягамі і плакатамі абаронцы Курапатаў блякавалі транспарт, які накіроўваўся на тэрыторыю рэстарана. За гэта рэгулярна атрымліваюць штрафы ад ДАІ за парушэньне ПДД, а таксама іх штрафуюць і садзяць на суткі за несанкцыянаванае пікетаваньне. Некаторыя актывісты маюць ужо па некалькі дзясяткаў штрафаў.

За час пікетаваньня «Поедем поедим» неаднаразова адбываліся сутычкі паміж актывістамі і наведнікамі ды ахоўнікамі рэстарана, заблякаваныя аўтамабілі, наяжджалі на пікетоўцаў, актывісту нават зламалі руку.

Рэакцыя ўласьнікаў. Не дачакаўшыся рэакцыі ўладальнікаў рэстарана на патрабаваньне закрыць або перанесьці ўстанову, 18 ліпеня абаронцы Курапатаў заклікалі да байкоту ўсіх рэстаранаў аднаго з сузаснавальнікаў рэстарацыі бізнэсоўца Леаніда Зайдэса.

20 ліпеня на сустрэчы з журналістамі Зайдэс адмовіўся закрываць «Поедем поедим», але прапанаваў даць грошы на мэмарыялізацыю Курапатаў. Гэта не задаволіла пікетоўцаў, і яны працягнулі пікетаваньне.

Хто адказны за рэстаран у Курапатах. Сьпіс асобаў

Прадстаўнікі партый і рухаў, якія ўдзельнічаюць у Курапацкай вахце, зацьвердзілі сьпіс чыноўнікаў, уладальнікаў, агрэсіўных наведнікаў рэстарацыі «Поедем поедим», якім яны абвясьцілі пэрсанальны байкот. Усяго ў сьпісе 35 прозьвішчаў.

Бізнэсовец Аркадзь Ізраілевіч падаў у суд на незалежнае выданьне «Новы час» і аўтара расьсьледаваньня пра забудову ў Курапатах Дзяніса Івашына, які дапусьціў юрыдычную сувязь паміж ім і рэстаранам.

​7 адказаў на наіўныя пытаньні пра рэстаран ля Курапатаў і пратэсты супраць яго

Ня першы чын у Курапатах. Першая грамадзкая абарона Курапатаў адбывалася ў 2001–2002 гг., калі моладзь пратэставала супраць пашырэньня кальцавой дарогі праз урочышча. На пачатку 2017-га актывісты адстаялі Курапаты ад будоўлі бізнэс-цэнтру.

Сталінскія рэпрэсіі і Курапаты

У Беларусі масавыя рэпрэсіі пачаліся яшчэ з прыходам да ўлады бальшавікоў — у 1917 годзе. А скончыліся, калі памёр Сталін — у 1953-м. Дасьледчыкі мяркуюць, што іх зазналі як мінімум 600 тысяч чалавек. Паводле іншых ацэнак, гэтая лічба дасягае 1,4 мільёна. Але дакладная колькасьць невядомая — КДБ дагэтуль не раскрыў архівы.

Сталінскія рэпрэсіі ў Беларусі — асноўнае, што трэба ведаць
пачакайце

No media source currently available

0:00 0:02:38 0:00

Паводле розных падлікаў, ад 30 да 250 тысяч чалавек карнікі НКВД расстралялі з 1937 па 1941 год у Курапатах — лясным масіве пад Менскам.

Асноўнае пра Курапаты

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG