Але пры кожным абстрэле расейцы цэляць выключна ў жылы сэктар ці аб’екты інфраструктуры.
Расея нанесла 15 авіяцыйных і адзін ракетны ўдар
Генэральны штаб Узброеных сіл Украіны паведаміў, што Расея працягвае абстрэльваць з авіяцыі і артылерыі населеныя пункты Херсонскай, Запароскай, Данецкай, Луганскай і Днепрапятроўскай абласьцей.
«За апошнія суткі праціўнік нанёс 15 авіяцыйных і адзін ракетны ўдар, зьдзейсьніў больш як сорак абстрэлаў з рэактыўных сыстэм залпавага агню», — паведаміў сьпікер Генштабу Ўкраіны Аляксандар Штупун.
Кіраўнік Днепрапятроўскай абласной вайсковай адміністрацыі Валянцін Рэзьнічэнка паведаміш, што ўсю сёньняшнюю ноч ад расейскіх «Градаў» цярпела Нікапальшчына.
«Расейцы накрылі агнём тры грамады — Нікапальскую, Марганецкую і Чырвонагрыгораўскую. Людзей не зачапіла», — напісаў Валянцін Рэзьнічэнка ў сваім тэлеграм-канале.
Паводле яго, у Нікапалі пашкоджана каля дзесяці шматпавярховых і прыватных дамоў. У Чырвонагрыгораўскай грамадзе пацярпела дачнае таварыства, без электрычнасьці засталіся амаль тысяча сямей.
На ўсходзе ўкраінцы адбіваюць атакі расейцаў, расейцы паведамляюць аб наступах украінцаў
Кіраўнік Луганскай абласной вайсковай адміністрацыі Сяргей Гайдай паведаміў, што ўкраінскія войскі адбілі дзьве атакі расейцаў каля Андрэеўкі і Белагораўкі. Паводле яго, украінскія войскі, хоць і марудна, але прасоўваюцца наперад на Сватаўскім і Крэмянным кірунках Луганскай вобласьці.
У Генэральным штабе адзначылі, што Расея практычна няспынна абстрэльвае з артылерыі ўсе прыфрантавыя населеныя пункты Данецкай вобласьці. Паводле абласных уладаў, за ўчора ў Данецкай вобласьці загінулі 4 мірныя жыхары і 9 атрымалі раненьні.
У той жа час Міністэрства абароны Расеі паведаміла, што расейскія войскі адбілі атакі ўкраінцаў, якія нібыта спрабавалі наступаць на Ліманскім кірунку ў Луганскай вобласьці.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
