Чарговы суд над экс-сілавікамі, якіх улады назвалі «манкуртамі»: абвінавачваюць у незаконных дзеяньнях са зброяй і боепрыпасамі

Судовыя працэсы праходзяць паралельна і ў закрытым рэжыме, паведамляе «Вясна».

Летась на АНТ выйшаў фільм «„Манкурты“: сакрэтная апэрацыя КДБ», у якім гаворыцца, што затрыманых Гаркача, Сідаракіна і Старчанку КДБ вінавацяць у спробе вывазу зь Беларусі падпалкоўніка Камітэта дзяржбясьпекі Аляксея Храловіча.

У чым абвінавачваюць былых сілавікоў?

Вячаслава Сідаракіна і Сяргея Старчанку:

• паводле ч. 3 арт. 295 Крымінальнага кодэксу (незаконныя дзеяньні ў дачыненьні да агнястрэльнай зброі, боепрыпасаў і выбуховых рэчываў);
• паводле ч. 1 і ч. 2 арт. 333-1 КК (Незаконнае перамяшчэньне праз мытную мяжу ЭАЭС або дзяржаўную мяжу Беларусі атрутных рэчываў, радыяактыўных матэрыялаў, агнястрэльнай зброі і боепрыпасаў);

Юрыя Гаркача:

• паводле ч. 2 арт. 295 Крымінальнага кодэксу (незаконныя дзеяньні ў дачыненьні да агнястрэльнай зброі, боепрыпасаў і выбуховых рэчываў)

ГЛЯДЗІЦЕ ТАКСАМА:

Арышт праз год пасьля падзей, закрытыя суды, рэкордныя тэрміны. Як рэжым помсьціць сілавікам, якія адмовіліся ўдзельнічаць у гвалце

Вячаслаў Сідаракін зьяўляўся спэцыялістам у падрыўной дзейнасьці. У фільме «Манкурты» гаварылася, што ён супрацоўнічаў зь Ігарам Макарам і ўдзельнічаў у падрыхтоўцы магчымых тэрактаў, сабраў дома ў свайго сваяка велізарны арсэнал зброі і боепрыпасаў. Як паведамлялася ў фільме, яго затрымалі разам з саўдзельнікам Юрыем Гаркачом і сваяком Сяргеем Старчанкам.

ГЛЯДЗІЦЕ ТАКСАМА:

Падпалкоўніка КДБ Храловіча асудзілі на 10 гадоў калёніі за тое, што нібыта перадаваў інфармацыю тэлеграм-каналам

«Справа Храловіча»

38-гадовага экс-падпалкоўніка КДБ Аляксея Храловіча асудзілі 30 сакавіка ў Менскім гарадзкім судзе на 10 гадоў калёніі ва ўмовах узмоцненага рэжыму і штраф у памеры 500 базавых велічыняў паводле ч. 2 арт. 356 Крымінальнага кодэксу (здрада дзяржаве, зьдзейсьненая службовай асобай, якая займае адказнае становішча).

Згодна зь інфармацыяй, паказанай у фільме «Апэрацыя КДБ „Манкурты“», Храловіч меў дачыненьне да перадачы Сьцяпану Пуцілу ў лістападзе 2020 аўдыё размоваў прэс-сакратаркі Лукашэнкі Натальлі Эйсмант з рознымі службовымі асобамі. Менавіта ў гэтых аўдыё вялася размова пра абставіны гібелі Рамана Бандарэнкі. Але ў гэтым жа фільме сьцьвярджалася, што размовы — інсцэніроўка, пра якую Храловіч ня ведаў.

ГЛЯДЗІЦЕ ТАКСАМА:

Зьявіўся запіс размовы пра рэйд у Новую Баравую з галасамі, падобнымі да Эйсмант і Балабы

У гэтай жа справе затрымалі і ўжо асудзілі на 18 гадоў калёніі палітзьняволенага спэцсувязіста Генштабу Ўзброеных сіл Дзяніса Урада.

ГЛЯДЗІЦЕ ТАКСАМА:

Капітана, які паведаміў пра ўжываньне войска супраць пратэстоўцаў, асудзілі на 18 год