Увечары 15 траўня колькасьць заяваў на рэгістрацыю ініцыятыўных групаў для вылучэньня кандыдатаў у прэзыдэнты на выбарах 2020 году дасягнула 55.
На вечар 14 траўня было вядома пра 34 ініцыятыўныя групы (некаторым ужо адмовілі ў рэгістрацыі), днём 15-га дакумэнты ў Цэнтральную выбарчую камісію занесьлі:
- былы дыплямат і былы кіраўнік Парку высокіх тэхналёгіяў Валер Цапкала,
- банкір Віктар Бабарыка, які сабраў рэкордна шматлікую для апазыцыйных кандыдатаў ініцыятыўную групу,
- сябра праўладнай Камуністычнай партыі і індывідуальны прадпрымальнік Андрэй Іваноў,
- брат былога дэпутата Палаты прадстаўнікоў і лідэра аргкамітэту партыі «Свабода» Сяргея Скрабца, намесьнік старшыні гэтага аргкамітэту Аляксандар Скрабец,
- бізнэсовец і старшыня партыі «Грамада» Сяргей Чэрачань,
- індывідуальны прадпрымальнік і старшыня руху «За свабоду» Юры Губарэвіч,
- сустаршыня Беларускай хрысьціянскай дэмакратыі Вольга Кавалькова,
- бізнэсоўка і былая дэпутатка Палаты прадстаўнікоў Ганна Канапацкая,
- індывідуальны прадпрымальнік Уладзімер Правальскі,
- сустаршыня ініцыятывы «Гавары праўду» Андрэй Дзьмітрыеў,
- выканаўца абавязкаў старшыні Абʼяднанай грамадзянскай партыі Мікалай Казлоў,
- старшыня праўленьня жыллёва-будаўнічага каапэратыву № 956 і відэаблогер Павел Сьпірын,
- Музыка Алесь Таболіч,
- Сьвятлана Ціханоўская,
- індывідуальны прадпрымальнік Юры Чудзіновіч,
- вахтар ТАА «Экструзійныя тэхналёгіі» Юры Новікаў,
- жонка Мікалая Статкевіча Марына Адамовіч,
- рамесьнік Міхаіл Валынец,
- пэнсіянэр Валеры Перавошчыкаў.
У сьпісах ЦВК ёсьць таксама ініцыятыўная група Алега Нявейкава. Пра яго вядома, што гэта беспартыйны сацыяльны работнік, які даглядае інваліда І групы, што ён нарадзіўся ў 1973 годзе і жыве ў вёсцы Касьцюкоўка пад Гомлем. Не пазначаны нават кіраўнік ініцыятыўнай групы. Ніякіх зьвестак пра яго ў інтэрнэце няма.
Мікола Статкевіч пацьвердзіў Свабодзе, што гэта не адзін з «кандыдатаў пратэсту».
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
