Лінкі ўнівэрсальнага доступу

Бабарыка заявіў, што сабраў у ініцыятыўную групу звыш 7000 чалавек, Цапкала — 555


Віктар Бабарыка (зьлева) і Валерый Цапкала
Віктар Бабарыка (зьлева) і Валерый Цапкала

Былы кіраўнік Белгазпрамбанку Віктар Бабарыка заявіў 15 траўня, што сабраў у ініцыятыўную групу для вылучэньня сябе кандыдатам у прэзыдэнты звыш 7 тысяч чалавек і працягвае збор людзей.

Віктар Бабарыка заклікаў людзей працягваць далучацца да ініцыятыўнай групы — час яшчэ ёсьць, бо Цэнтральная выбарчая камісія прымае заявы да канца працоўнага дня 15 траўня.

У групу Бабарыкі пакуль запісалася менш чалавек, чым у дзейнага кіраўніка дзяржавы Аляксандра Лукашэнкі — у таго звыш 11 тысяч. У сьпісе ініцыятыўнай групы Валерыя Цапкалы, як сказаў Свабодзе адзін з тых, хто суправаджаў яго пры падачы заяўкі, 555 чалавек. У старшыні ЛДПБ Алега Гайдукевіча група ўжо зарэгістраваная, у яго больш за 4 тысячы сяброў.

Але і 7 тысяч Бабарыкі — вельмі шмат па беларускіх мерках. Столькі апазыцыйныя кандыдаты яшчэ не зьбіралі, і гэта нават больш, чым было ў Лукашэнкі ў 2006 годзе.

На выбарах 2015 году ў ініцыятыўную групу Тацяны Караткевіч увайшлі 1993 чалавекі, у групу Сяргея Гайдукевіча — 2484 (трох выключылі), у групу Мікалая Ўлаховіча — 1426, у групу Лукашэнкі — 10 577 чалавек.

Таксама тады былі апазыцыйныя кандыдаты, якія ня трапілі ў бюлетэнь, бо, паводле ЦВК, не сабралі 100 тысяч подпісаў: у групе Сяргея Калякіна — 1511 (аднаго выключылі), у групе Анатоля Лябедзькі было 977 чалавек, у групе Віктара Цярэшчанкі — 946.

У 2010 годзе самая вялікая ініцыятыўная група была ў Сяргея Гайдукевіча — 10 443 чалавекі (але ён сам зьняў сваю кандыдатуру), а ў Аляксандра Лукашэнкі было 8403. Уладзімер Някляеў тады сабраў у ініцыятыўную групу 3271 чалавека, Андрэй Саньнікаў — 2001, а астатнія зарэгістраваныя кандыдаты мелі ад 1299 да 1698 чалавек у ініцыятыўных групах.

У 2006 годзе Лукашэнка меў у ініцыятыўнай групе 6212 чалавек, Гайдукевіч — 3073, Аляксандар Мілінкевіч — 5135, Аляксандар Казулін — 3347.

У 2001 годзе Лукашэнка меў 3830, Гайдукевіч — 2134, Уладзімер Ганчарык — 4054, Сямён Домаш — 3697, а найбольшую групу з 6069 чальцамі меў Віктар Цярэшчанка, якога не зарэгістравалі кандыдатам.

Статыстыкі пра памер ініцыятыўных групаў у 1994 годзе ў адкрытым доступе не знайшлося, але вядома, што тады група Лукашэнкі была меншай, чым у 2001 годзе. І меншай, чым цяпер заяўляе Бабарыка.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG