155 новых выпадкаў, 6 прызнаных сьмерцяў. Афіцыйная статыстыка COVID-19 у Беларусі на 14 ліпеня
Паводле Міністэрства аховы здароўя, на 14 ліпеня ў Беларусі:
- агулам 65 269 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 474 памерлі, з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 55 799 пацыенты паправіліся і выпісаныя пасьля COVID-19;
- гэта значыць, за дзень выявілі яшчэ 155 выпадкаў і прызналі яшчэ 6 сьмерцяў, выпісалі 307 чалавек;
- такім чынам, колькасьць «актыўных выпадкаў» — 8996; «актыўных выпадкаў» стала больш на 158, хоць за дзень да таго вырасла на 66;
- ад пачатку эпідэміі ў краіне зрабілі 1 144 696 тэстаў і 3116 на дзень, зь якіх 4,97% былі станоўчымі (хоць днём раней было 6,9 тысячы тэстаў і 2,63% станоўчых, два дні таму — 11,5 тысячы тэстаў і 1,44% станоўчых);
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляюць.
Гэтым лічбам выказваюць недавер валянтэры і некаторыя мэдыкі, лічбы зьдзіўляюць знаёмых з законамі матэматычнай статыстыкі.
ЦВК апублікаваў рэкамэндацыі Міністэрства здароўя для прадухіленьня пашырэньня COVID-19 пры галасаваньні на выбарах
У пераліку 14 рэкамэндацый:
- арганізаваць перад пачаткам працы апытаньне кожнага чальца ўчастковай камісіі пра стан здароўя. Да працы ўчастковай камісіі дапускаць асобаў без прыкмет рэсьпіраторнай інфэкцыі (падвышаная тэмпэратура цела, кашаль, чханьне і інш.);
- забясьпечыць наяўнасьць і выкарыстаньне чальцамі ўчастковай камісіі сродкаў засьцярогі (маска, пальчаткі, пры магчымасьці тваравы шчыток), сродкаў дэзынфэкцыі для апрацоўкі рук і паверхняў;
- забясьпечыць выкананьне прынцыпу сацыяльнага дыстанцыяваньня пры расстаноўцы сталоў і крэслаў чальцоў участковай камісіі, месцаў для назіральнікаў, паміж выбарнікамі, забясьпечыўшы адлегласьць, ня меншую за адзін мэтар, адзін ад аднаго;
- забясьпечыць наяўнасьць у месцах агульнага доступу (калідоры, фае і інш.) сродкаў для дэзынфэкцыі скуры / антысэптыку для апрацоўкі рук і кантроль рэгулярнай запраўкі дазатараў;
- па магчымасьці арганізаваць падзел патокаў асобаў, якія ўваходзяць і якія выходзяць, разьмясьціўшы адпаведныя паказальнікі на падлозе, дзьвярах або сьценах;
- рэкамэндаваць выбарнікам пры наведваньні ўчастку для галасаваньня знаходзіцца ў сродках індывідуальнай засьцярогі (масцы, пальчатках), а таксама выкарыстоўваць гэтыя сродкі пры арганізацыі для іх галасаваньня па месцы знаходжаньня (дома). На просьбу чальца ўчастковай камісіі выбарнік ссоўвае маску і паказвае твар, каб быць ідэнтыфікаваным;
- рэкамэндаваць выбарнікам прадʼяўляць дакумэнт, які пацьвярджае асобу, у разгорнутым выглядзе, дэманструючы неабходныя старонкі самастойна, безь перадачы ў рукі чальца ўчастковай камісіі;
- рэкамэндаваць выбарнікам выкарыстоўваць уласныя аўтаручкі для подпісаў аб атрыманьні бюлетэня ў сьпісе грамадзян, якія маюць права ўдзельнічаць у выбарах, а таксама для запаўненьня бюлетэня;
- забясьпечыць апрацоўку аўтаручак антысэптыкам пасьля кожнага выбарніка;
- арганізаваць правядзеньне рэгулярнай апрацоўкі (не радзей за 6 разоў цягам дня выбараў) сродкамі дэзынфэкцыі дзьвярных ручак, поручняў, паверхняў у кабінах для галасаваньня, сталоў ды іншых кантактных паверхняў. У дні датэрміновага галасаваньня забясьпечыць таксама правядзеньне вільготнай прыборкі памяшканьня, дзе праводзіцца галасаваньне, падчас перапынку з 14 да 16 гадзін;
- рэкамэндаваць трымаць дзьверы ў памяшканьне для галасаваньня і іншыя памяшканьні, празь якія перамяшчаюцца выбарнікі, адчыненымі;
- арганізаваць рэгулярнае праветрываньне памяшканьняў (безь перапыненьня працэсу галасаваньня). У дні датэрміновага галасаваньня забясьпечыць праветрываньне ў перапынку з 14 да 16 гадзін;
- пасьля завяршэньня галасаваньня апрацаваць звонку скрыню для галасаваньня дэзынфэкцыйным сродкам, а пры арганізацыi галасаваньня па месцы знаходжаньня выбарніка апрацоўваць скрыню для галасаваньня пасьля наведваньня кожнага выбарніка;
- галасаваньне па месцы знаходжаньня выбарніка па магчымасьці праводзіць без уваходжаньня ў жылое памяшканьне і з захаваньнем прынцыпу сацыяльнага дыстанцыяваньня, прытрымліваючыся адлегласьці ня менш за адзін мэтар адзін ад аднаго.
Рэкордную колькасьць новых выпадкаў COVID-19 зарэгістравалі ў ЗША
Рэкордная колькасьць новых выпадкаў COVID-19 — 77 000 — выявілі ў ЗША 16 ліпеня. Каля 1000 чалавек загінулі за гэты дзень. У Флорыдзе, Паўднёвай Караліне і Тэхасе была самая вялікая колькасьць выпадкаў за адзін дзень.
Усяго ў Злучаных Штатах зафіксавалі каля 3,6 мільёна выпадкаў COVID-19. Памерлі 138 тысяч чалавек.
Службы аховы здароўя ЗША папярэджваюць, што колькасьць новых выпадкаў неўзабаве можа дасягнуць 100 000 штодзень. У той жа час нашэньне маскі зьяўляецца абавязковым у палове штатаў.
Гандляры ў масках і антысэптыкі для кліентаў. Як выглядае Віцебск у першы дзень «Славянскага базару». ФОТА
У дзень афіцыйнага адкрыцьця «Славянскага базару» 16 ліпеня на вуліцах Віцебску людзей стала больш пасьля пятай гадзіны ўвечары. Чацьвер — працоўны дзень, а турыстаў на фэстывалі сёлета няшмат.
Арганізатары «Славянскага базару» не абвяшчалі абавязковы масачны рэжым на фэстывальных мерапрыемствах, большасьць якіх у гэтым годзе мае вулічны фармат. Рэкамэндацый рассаджваць гледачоў праз аднаго таксама не прагучала. Ці захоўваюць адлегласьць слухачы, якія зьбіраюцца перад адкрытымі гарадзкімі пляцоўкамі, ніхто не адсочвае. Чытайце рэпартаж па спасылцы.
Каранавірус яшчэ тут. Як цяпер моляцца ў беларускіх храмах
Кіраўнік Беларусі Аляксандар Лукашэнка ня раз абвяшчаў перамогу над каранавірусам. Афіцыйная статыстыка Мінздароўя паказвае пасьлядоўнае зьніжэньне новых выпадкаў заражэньня COVID-19. Аднак шмат у якіх краінах сьвету заяўляюць пра новыя ўспышкі захворваньня.
Свабода паглядзела, як жывуць найбуйнейшыя храмы абласных цэнтраў Беларусі. Чытайце і глядзіце фота па спасылцы.
159 новых выпадкаў і 6 сьмерцяў. Афіцыйная статыстыка COVID-19 у Беларусі на 17 ліпеня
Паводле Міністэрства аховы здароўя, на 17 ліпеня ў Беларусі:
- агулам 65 782 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 491 памерлі; з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 57 370 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 159 выпадкаў і прызналі яшчэ 6 сьмерцяў, выпісалі 455 чалавек;
- такім чынам, колькасьць «актыўных выпадкаў» — 7921; «актыўных выпадкаў» стала менш на 302;
- ад пачатку эпідэміі ў краіне зрабілі 1 172 880 тэстаў, 10 600 за дзень, зь якіх станоўчы вынік далі 1,5% — амаль рэкордна малы адсотак (11 ліпеня было 1,41%).
У сьвеце выявілі рэкордны сутачны прырост заражэньня COVID-19
У сьвеце за суткі выявілі рэкордную колькасьць тых, хто заразіўся на каранавірус — 237,7 тысяч чалавек, паведаміла Сусьветная арганізацыя здароўя.
Папярэдні максымум быў зарэгістраваны крыху менш за тыдзень таму: 12 ліпеня прырост новых выпадкаў склаў 230,3 тысячы.
Больш за ўсё колькасьць новых выпадкаў зарэгістравалі ў ЗША — 67,1 тысячы. Сьледам за імі ідуць Бразылія і Індыя з 39,9 тысячы і 34,9 тысячы выпадкаў адпаведна.
Памерлі ад каранавірусу ў сьвеце за дзень 5682 чалавека. Паводле дадзеных САЗ, колькасьць заражаных каранавіруснай інфэкцыяй у сьвеце перавысіла 13,61 млн, больш за 585,7 тысяч чалавек памерлі.
Згодна з апошнімі дадзенымі ўнівэрсытэту Джонза Гопкінза, усяго заразіліся звыш 14,1 млн чалавек, з іх больш за 602,6 тысячы памерлі.
Новыя дасьледаваньні паказваюць, што рызыка не залежыць ад групы крыві
Вынікі новых дасьледаваньняў сьведчаць, што людзі з крывёй тыпу А (другая група) ня схільныя да большай рызыкі захварэць, як меркавалася раней, піша The New York Times.
У пачатку пандэміі COVID-19 дасьледчыкі знайшлі папярэднія доказы, што другая група крыві можа быць важным фактарам рызыкі — як для заражэньня вірусам, так і для цяжкага працяканьня хваробы.
Але за апошнія некалькі месяцаў, вывучыўшы тысячы дадатковых пацыентаў з COVID-19, навукоўцы паведамляюць пра значна слабейшую сувязь з групай крыві.
Два дасьледаваньні — адно ў Масачусэцкім шпіталі агульнага профілю, а другое ў прэсьвітэрыянскай лякарні Калюмбіі ў Нью-Ёрку — не знайшлі, што кроў тыпу А павялічвае верагоднасьць заражэньня людзей COVID-19.
У новых справаздачах ёсьць доказы таго, што носьбіты крыві тыпу О (першая група) могуць быць троху менш схільныя да заражэньня. Але эфэкт настолькі малы, што людзі не павінны на гэта разьлічваць. «Ніхто не павінен думаць, што ён абаронены», — сказаў Нікалас Татанэты, навуковец з Калюмбійскага ўнівэрсытэту.
Афіцыйная статыстыка: 171 новы выпадак каранавірусу ў Беларусі, чатыры сьмерці
Міністэрства аховы здароўя паведамляе пра 65 953 выпадкі каранавіруса ў Беларусі з пачатку эпідэміі.
За суткі каранавірусам захварэлі 171 чалавек, чатыры чалавекі загінулі. З пачатку эпідэміі зарэгістравана 65 053 выпадкі каранавіруса ў Беларусі.
На 18 ліпеня паправіліся і выпісаныя 57 856 чалавек.
Правялі 1 183 007 тэстаў.
З пачатку ліпеня Міністэрства аховы здароўя агучвае прыкладна аднолькавую колькасьць новых выпадкаў каранавіруса ў суткі: у межах 150-190 выпадкаў.
Што дае Беларусі сяброўства ў Сусьветнай арганізацыі здароўя. Разьбіраемся
Беларусь — сябра Сусьветнай арганізацыі здароўя з 1994 году. САЗ ухваляла ня ўсе дзеяньні Беларусі, напрыклад, выказвалася супраць правядзеньня параду ў Менску 9 траўня сёлета. Свабода паглядзела, чым карыснае сяброўства ў САЗ.
Паводле экс-міністра аховы здароўя Беларусі (1997–2001) Ігара Зелянкевіча, «сяброўства ў САЗ адпавядае інтарэсам у міжнародным супрацоўніцтве для Беларусі», але трэба падзяляць удалыя і няўдалыя праекты САЗ.
«Апошнім часам прафэсіяналізм з боку САЗ падае, бо да кіраўніцтва прыйшлі мэнэджары, і мы бачым менш выказваньняў прафэсіяналаў. Чаму б САЗ не зрабіць пазачарговую асамблею з нагоды каранавірусу, выпрацаваць рэкамэндацыі? Гэта б была дапамога для кіраўнікоў дзяржаў», — кажа Ігар Зелянкевіч.
І пералічвае ўдалыя праекты САЗ у Беларусі.
«Мы бачым, што САЗ абвясьціла барацьбу з гульнявой залежнасьцю, а ў нас ёсьць гэтыя гульнявыя аўтаматы, значыць, трэба задумацца, зразумець, што гэта хвароба. Ці САЗ зрабіў рэзалюцыю аб шкодзе алькаголю, а ў нас прадаюць алькаголь на запраўках. Ёсьць каштоўныя і лягічныя рэчы, а ёсьць праколы», — падсумоўвае Ігар Зелянкевіч.
У Менску людзі сталі менш карыстацца транспартам
У беларускай сталіцы шосты месяц скарачаецца аб’ём пасажырскіх перавозак. Перавозкі аўтобусным транспартам скараціліся на 17%, электрычным транспартам і мэтрапалітэнам — на 20%. Гэта можа быць зьвязана з пандэміяй каранавірусу і пераходам людзей на дыстанцыйную працу.
Увесь мінулы год аб’ём пасажырскіх перавозак увесь час рос: плюс 4,4% у параўнаньні з 2018 годам. Але са студзеня перавозкі пачалі зьмяншацца, паведамляе БелаПАН са спасылкай на Белстат.
Такім чынам, за паўгода аб’ём перавозак аўтобусамі скараціўся на 17% у параўнаньні з такім жа пэрыядам у мінулым годзе, перавозкі тралейбусамі і мэтрапалітэнам скараціліся на 20%, авіяперавозкі — на 45,8%.
Вытворцы мяса ў ЗША пачалі чысьціць паветра на заводах, каб перамагчы каранавірус
Дзьве найбуйнейшыя мясаперапрацоўчыя кампаніі ў ЗША паведамілі, што ўсталявалі абсталяваньне ачысткі паветра на некаторых сваіх прадпрыемствах для абароны супрацоўнікаў ад каранавірусу, паведамляе Reuters.
Кампанія JBS USA, якая ўваходзіць у чацьвёрку найбуйнейшых вытворцаў ялавічыны ў ЗША, паведаміла, што пачала выкарыстаньне ўльтрафіялетавага выпраменьваньня для абеззаражаньня паветра. Кампанія Tyson Foods — вытворца ялавічыны, сьвініны і мяса птушкі — заявіла, што праводзіць інтэнсіўныя дасьледаваньні адносна ўльтрафіялетавага выпраменьваньня на некаторых сваіх заводах.
Пакуль невядома, ці дазваляюць гэтыя тэхналёгіі зьнішчаць каранавірус.
За час пандэміі COVID-19 у ЗША захварэлі больш за 16 тысяч супрацоўнікаў мясаперапрацоўчай галіны, 86 з іх памерлі.
САЗ зафіксавала рэкордны рост COVID-19 за дзень
Сусьветная арганізацыя здароўя паведамляе пра рэкордны рост колькасьці новых выпадкаў каранавірусу за дзень — 259,8 тысяч выпадкаў за 18 ліпеня. Мінулы максымум быў 17 ліпеня — 237,7 тысяч чалавек.
Больш за ўсё выпадкаў COVID-19 выявілі ў ЗША — 71,4 тысячы чалавек за содні. За ЗША ідуць Бразылія (45,4 тысяч) і Індыя (34,8 тысяч). Апроч гэтага, рост выпадкаў каранавірусу зафіксаваны ў Паўднёва-Афрыканскай Рэспубліцы, Кіргізіі, Калюмбіі і Мэксыцы.
За мінулыя суткі COVID-19 стаў прычынай сьмерці больш за 7 тысяч хворых.
Больш за 66 тысяч выпадкаў, 499 памерлых. Афіцыйная статыстыка COVID-19 у Беларусі на 19 ліпеня
Паводле Міністэрства аховы здароўя, на 19 ліпеня ў Беларусі:
- агулам 66 095 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 499 памерлі; з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 58 204 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 142 выпадкі і прызналі яшчэ 4 сьмерці,
- такім чынам, колькасьць «актыўных выпадкаў» — 7392;
- ад пачатку эпідэміі ў краіне зрабілі 1 193 162 тэстаў, 10 155 — за апошнія суткі;
Прызналі паўтысячы сьмерцяў з пачатку эпідэміі. Афіцыйная статыстыка COVID-19 у Беларусі на 20 ліпеня
Паводле Міністэрства аховы здароўя, на 20 ліпеня ў Беларусі:
- агулам 66 213 чалавекі са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 503 памерлі; з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 58 290 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 118 выпадкаў і прызналі яшчэ 4 сьмерці, выпісалі 86 чалавек;
- такім чынам, колькасьць «актыўных выпадкаў» — 7420; «актыўных выпадкаў» стала больш на 28 (цягам мінулага тыдня «актыўных выпадкаў» станавілася менш на некалькі сотняў на дзень, за выключэньнем панядзелка);
- ад пачатку эпідэміі ў краіне зрабілі 1 199 317 тэстаў, 6155 за дзень, зь якіх станоўчы вынік далі 1,92%;
- колькі пацыентаў у цяжкім стане ці на штучнай вэнтыляцыі лёгкіх, а таксама колькі хворых выпісалі дамоў на «амбуляторнае лячэньне», не паведамляюць.
Гэтым лічбам выказваюць недавер валянтэры і некаторыя мэдыкі, лічбы зьдзіўляюць знаёмых з законамі матэматычнай статыстыкі.
Колькасьць хворых на COVID-19 у Гішпаніі вырасла ўтрая, калі аслабілі абмежаваньні
Заражэньне каранавірусам у Гішпаніі вырасла з васьмі выпадкаў на 100 000 жыхароў пад канец чэрвеня, калі скончылася надзвычайнае становішча ў краіне, да 27 на 100 000.
Пра гэта паведамляе агенцтва Reuters, спасылаючыся на афіцыйную інфармацыю Міністэрства здароўя Гішпаніі 20 ліпеня.
Дзяржаўнае рэгуляваньне цэнаў на маскі і антысэптыкі ў Беларусі падоўжылі да 4 кастрычніка
Міністэрства антыманапольнага рэгуляваньня і гандлю Беларусі падоўжыла да 4 кастрычніка 2020 году дзяржаўнае рэгуляваньне цэнаў на ахоўныя маскі і дэзынфэкцыйныя сродкі.
Дзяржаўнае рэгуляваньне цэнаў на маскі і антысэптыкі было ўведзенае 7 красавіка на фоне павышанага попыту з прычыны пандэміі каранавірусу.
З мэтай дзяржаўнага рэгуляваньня цэнаў на маскі і сродкі дэзынфэкцыі для вытворцаў Міністэрства гандлю ўвяло гранічны нарматыў рэнтабэльнасьці (ня большы за 10%), для імпартэраў уведзена лімітавая максымальная надбаўка (ня большая за 10%). Гранічную максымальную гандлёвую надбаўку (з улікам аптовай надбаўкі) да адпускной цаны вытворцы (імпартэра) на гэтыя тавары вызначылі ў памеры 15%.
Каранавірус: спатканьні зь беларускімі вязьнямі аднаўляюцца з 1 жніўня
Міністэрства ўнутраных справаў Беларусі анансавала 21 ліпеня вяртаньне ад 1 жніўня кароткіх спатканьняў ва ўстановах пэнітэнцыярнай сыстэмы — у турмах і ізалятарах, а таксама «лячэбна-працоўных прафілякторыях».
Рашэньне аб аднаўленьні спатканьняў прынялі, «зыходзячы з санітарна-эпідэміялягічай сытуацыі». Дэпартамэнт выкананьня пакараньняў запэўнівае, што такія «радыкальныя захады», як забарона спатканьняў, «дазволілі своечасова мінімізаваць пагрозу распаўсюду каранавіруснай інфэкцыі».
Пры тым пасьля 1 жніўня захаваюцца пэўныя прафіляктычныя захады: нашэньне масак будзе абавязковым на спатканьнях, людзей з падвышанай тэмпэратурай (а таксама тых, хто адмовіцца яе мераць) і з сымптомамі рэсьпіраторных захворваньняў на спатканьні ня пусьцяць.
Нібыта з прычыны каранавірусу ў беларускіх турмах таксама адмаўляліся прымаць перадачы, але ў сярэдзіне чэрвеня прыём перадачаў аднавілі.
Яшчэ 135 выпадкаў і 4 прызнаныя сьмерці. Афіцыйная статыстыка COVID-19 у Беларусі на 21 ліпеня
Паводле Міністэрства аховы здароўя, на 21 ліпеня ў Беларусі:
- агулам 66 348 чалавек са станоўчым тэстам на COVID-19 (у іх лік уваходзяць тыя, хто паправіўся і хто памёр);
- 507 памерлі; з памерлых усе, як піша міністэрства, былі «з шэрагам хранічных захворваньняў» і каранавіруснай інфэкцыяй (шматлікія родзічы памерлых кажуць, што гэта ня так — паміралі і без хранічных хваробаў);
- 58 592 пацыентаў паправіліся і выпісаныя пасьля COVID-19;
- гэта значыць, за дзень выявілі яшчэ 135 выпадкаў і прызналі яшчэ 4 сьмерці (такую колькасьць сьмерцяў называюць чацьвёрты дзень запар), выпісалі 302 чалавек;
- такім чынам, колькасьць «актыўных выпадкаў» — 7249; «актыўных выпадкаў» стала менш на 171;
- ад пачатку эпідэміі ў краіне зрабілі 1 202 214 тэстаў, 2897 за дзень, зь якіх станоўчы вынік далі 4,66% (на мінулым тыдні паведамлялі пра 10 тысяч тэстаў на дзень, 20 ліпеня паведамілі пра 6155, 21 ліпеня гомельскі мэдык расказаў, што перад прыездам Аляксандра Лукашэнкі загадалі зрабіць дадатковую тысячу экспрэс-тэстаў для «актыву вобласьці», зь якім сустракаўся Лукашэнка).
«Турыстаў няма, заробкі ня тыя». Як беларускія рамесьнікі выжываюць падчас пандэміі каранавірусу
У Віцебску, нягледзячы на каранавірус, 29-ы раз адгрымеў «Славянскі базар». На фэст прыяжджае шмат беларускіх і замежных майстроў, для якіх гэта прывабная пляцоўка для гандлю. Сёлета рамесьнікаў на вуліцах гораду было ў некалькі разоў менш.
Мы пацікавіліся, як ім удаецца выжываць ва ўмовах пандэміі каранавірусу, калі Беларусь засталася без турыстаў. Чытайце рэпартаж па спасылцы.