Лінкі ўнівэрсальнага доступу

Літва настойвае на дадатковых захадах бясьпекі на Беларускай АЭС


Вучэньні на Беларускай АЭС

Дэлегацыя Эўрапейскай групы па наглядзе ў сфэры ядзернай бясьпекі сёлета ў сакавіку наведае Беларускую АЭС, паведаміў міністар замежных спраў Беларусі Уладзімер Макей па выніках перамоваў са сваім літоўскім калегам Лінасам Лінкявічусам.

Кіраўнік беларускага МЗС падкрэсьліў, што Менск настроены на «адкрытае абмеркаваньне ўсіх заклапочанасьцяў». Усе рэкамэндацыі будуць улічаныя і абмеркаваныя на ўзроўні адпаведных ведамстваў, цытуе міністра «Інтэрфакс».

Паводле Ўладзімера Макея, падчас перамоваў зь Лінасам Лінкявічусам былі зробленыя пэўныя крокі для таго, каб зьняць насьцярожанасць, якая прысутнічае ў літоўскім грамадзтве. У сваю чаргу кіраўнік МЗС Літвы адзначыў, што ў бакоў адрозьніваецца ацэнка ўзроўню бясьпекі БелАЭС.

«Мы сапраўды настойваем, каб былі прынятыя дадатковыя захады ў галіне бясьпекі. Бо бясьпека станцыі — гэта інтарэсы дзьвюх нашых дзяржаў і нашых грамадзянаў, таму тут мы павінны знайсьці агульнае разуменьне», — сказаў ён.

Беларусь вядзе будаўніцтва АЭС побач з Астраўцом на Горадзеншчыне паводле расейскага праекту «ВВЭР-1200». Генпадрадчыкам таксама зьяўляецца расейскае прадпрыемства «Атомстройэкспорт».

У Міністэрстве энэргетыкі Беларусі паведамлялі, што ўвод першага энэргаблёку заплянаваны цягам 2020 году, другога — у 2021-м.

Што варта ведаць пра БелАЭС

  • Беларуская АЭС ад 2011 году ўзводзіцца пад Астраўцом, што ў Горадзенскай вобласьці, у 22 км ад мяжы зь Літвой, у каля 50 км ад Вільні і 125 км ад Менску.

  • Запуск першага энэргаблёку запляналі на пачатак 2020 году, другога — на ліпень 2020-га. Першапачаткова запуск плянаваўся на 2018 год, Аляксандар Лукашэнка заяўляў, што тэрміны сарвала Расея.
  • Для яе будаўніцтва выбраны праект АЭС-2006 — тыпавы расейскі праект атамнай станцыі новага пакаленьня з выкарыстаньнем вода-вадзянога энэргетычнага рэактара ВВЭР-1200. Паводле такога ж праекту ў Расеі працуюць блёкі Новаваронескай АЭС і Ленінградзкай АЭС-2.
  • Астравецкая АЭС узводзіцца расейцамі — дзяржаўнай кампаніяй «Росатом» — за кошт крэдыту Расеі. Беларусь пазычыла да 10 млрд даляраў для фінансаваньня 90% кошту будаўніцтва двух энэргаблёкаў АЭС. Пагашэньне крэдыту пачынаецца праз 6 месяцаў з даты ўводу ў эксплёатацыю АЭС, але не пазьней за 1 красавіка 2021 году. Беларусь просіць Расею падоўжыць крэдыт на 10 гадоў.
  • На станцыі будуць два энэргаблёкі з рэактарамі ВВЭР-1200 (В-491) магутнасьцю да 1200 МВт кожны. То бок праектная магутнасьць АЭС — 2,4 тысячы МВт. Калі АЭС запрацуе на поўную магутнасьць, станцыя дасьць 18 мільярдаў кіляват-гадзін на год — палову таго, колькі цяпер спажывае Беларусь.
  • Літва ня раз ставіла пад сумнеў абраньне для будаўніцтва АЭС астравецкай пляцоўкі. Краіна называла 10 прычынаў не будаваць БелАЭС. Літва пратэстуе супраць БелАЭС на найвышэйшым дзяржаўным узроўні, выказвае пратэсты ў міжнародных структурах. Літву падтрымлівае прэзыдэнтка Эстоніі.
  • Пляцоўка Астравецкай АЭС была прызнаная небясьпечнай яшчэ ў 1993 годзе. Тады было знойдзена 7 прыдатных пляцовак, 15 умерана прыдатных і 6 непрыдатных. Астравецкая пляцоўка трапіла ў лік апошніх.
  • Улады і чыноўнікі Беларусі нясьпешна рэагуюць на паведамленьні пра інцыдэнты на будаўніцтве ўласнай атамнай станцыі. Звычайна пра здарэньні на БелАЭС афіцыйна расказваюць пасьля таго, як зьвесткі пра іх зьяўляюцца ў СМІ — так, пра падзеньне корпуса рэактара расказалі толькі пасьля міжнароднага ціску. Урэшце корпус, які ўпаў, замянілі (расейцы зьбіраюцца выкарыстаць яго на іншай АЭС). Новы выпадкова стукнулі аб слуп, але пашкоджаньняў ня выявілі, вырашылі не мяняць корпус другі раз.
  • Адпрацаванае ядзернае паліва зь БелАЭС застанецца ў Беларусі. Эколягі сьцьвярджаюць, што Беларусь выбірае самы дарагі і небясьпечны спосаб захоўваць адпрацаванае паліва з АЭС.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG