Вялікая Брытанія выйдзе з ЭЗ не пазьней за 31 студзеня 2020 году, пасьля чаго паспрабуе заключыць з Брусэлем і іншымі краінамі пагадненьні аб свабодным гандлі. Пра гэта заявіла каралева Вялікай Брытаніі Лізавета II, выступаючы з троннай прамовай на адкрыцьці новай сэсіі брытанскага парлямэнту.
Галоўнымі тэмамі прамовы былі прыярытэты ўраду налета. Прамову для манарха традыцыйна рыхтуе кабінэт міністраў.
Сярод прыярытэтаў, якія таксама пазначыў кабінэт прэм’ер-міністра Борыса Джонсана — значны рост фінансаваньня Нацыянальнай сыстэмы аховы здароўя і рэформа іміграцыйнай сыстэмы.
Пасьля выступу Лізаветы II дэпутаты Палаты грамадаў пачнуць дэбаты ў пытаньнях, што тычацца зьместу троннай прамовы. Ужо 20 сьнежня, як чакаецца, на разгляд будзе прадстаўлены ўрадавы законапраект аб Brexit. 12 сьнежня ў Вялікай Брытаніі адбыліся парлямэнцкія выбары. Перамогу атрымала Кансэрватыўная партыя прэмʼера Борыса Джонсана — заўзятага прыхільніка Brexit.
