Лінкі ўнівэрсальнага доступу

Берасьцейцы выйшлі на чарговы пратэст супраць акумулятарнага заводу


Мітынг «Берасьцейцы супраць сьвінцу», архіўнае фота

На плошчы Леніна ў Берасьці 27 кастрычніка сабралося больш за 130 чалавек, якія незадаволеныя зьяўленьнем акумулятарнага заводу каля горада. Міліцыя папярэдзіла ўдзельнікаў аб тым, што акцыя несанкцыянаваная.

Людзі, якія сабраліся на чарговы пратэст у Берасьці абмяркоўвалі мітынг, які заплянаваны на 3 лістапада, паведамляе БелаПАН. Паведамленьне пра гэты мітынг берасьцейскім гарадзкім уладам даслаў кандыдат у дэпутаты Ўладзімір Мароз.

З пачатку пратэстаў у 2018 годзе праціўнікі акумулятарнага заводу падалі ў гарвыканкам заяўкі на 237 мітынгаў, 12 пікетаў і 16 дэманстрацый. Улады санкцыянавалі толькі адну акцыю, якая прайшла летась 29 красавіка.

Ці дазволяць мітынг 3 лістапада, пакуль невядома. Пасьля сустрэчы на плошчы, якая працягвалася прыкладна да 12.40, праціўнікі будаўніцтва завода прайшлі па цэнтральных вуліцах Берасьця — Пушкінскай і Савецкай да кінатэатра «Беларусь».

Пра затрыманьні інфармацыі няма, міліцыя толькі папярэдзіла прысутных аб тым, што акцыя несанкцыянаваная мясцовымі ўладамі.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трываюць ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG