Лінкі ўнівэрсальнага доступу

Праўладны экспэрт патлумачыў, чаму выбары ў Палату прадстаўнікоў будуць «вельмі важныя»


Пётра Пятроўскі, архіўнае фота

Лістападаўскія выбары ў Палату прадстаўнікоў будуць «вельмі важныя», бо новаму складу дэпутатаў давядзецца праводзіць канстытуцыйную мадэрнізацыю, сказаў у інтэрвію Нацыянальнаму прэс-цэнтру праўладны публіцыст Пётра Пятроўскі.

Пятроўскі, прадстаўлены як сустаршыня рэдакцыйнай рады расейскага парталу «Евразия. Эксперт», спасылаецца на кіраўніка Беларусі, які абвясьціў, што будзе альбо прынятая новая Канстытуцыя, альбо папраўкі да дзейнай, скіраваныя на ўзмацненьне заканадаўчай і судовай уладаў, а таксама органаў мясцовага самакіраваньня.

Паводле Пятроўскага, адбор кандыдатаў «ужо негалосна ідзе», і ён будзе «дастаткова прынцыповы і якасны».

«Калі казаць пра грамадзкія аб’яднаньні, прыйдзецца па некалькі разоў пераправяраць патэнцыйных кандыдатаў, якія ўмоўна „пойдуць па сьпісе“ пры дапамозе „Белай Русі“. Увага да біяграфіі кандыдатаў будзе пільная, таму што ад будучых дэпутатаў будуць чакаць ня толькі нейкага аўтарытэту, але і досыць бурнай дзейнасьці ў рамках і канстытуцыйнай рэформы, і заканатворчых спраў».

Праўладны публіцыст мяркуе, што Эўразьвяз адцягвае падпісаньне дамовы аб спрашчэньні візавага рэжыму зь Беларусьсю да заканчэньня парлямэнцкіх выбараў, каб пераканацца, што ў Палату прадстаўнікоў трапяць прадстаўнікі апазыцыі.

«Гэта пэўная форма дыпляматычнага ціску, якая дэманструе пэўнае бачаньне гэтымі таварышамі Беларусі», — лічыць ён.

Парлямэнцкія выбары-2019 у Беларусі. Што варта ведаць

Выбары ў Палату прадстаўнікоў сёмага скліканьня — ніжнюю палату Нацыянальнага сходу — пройдуць 17 лістапада. Датэрміновае галасаваньне будзе ісьці ад 12 да 16 лістапада.

  • Агулам у Палату прадстаўнікоў абіраецца 110 дэпутатаў. Дэпутаты ніжняй палаты выбіраюцца паводле выбарчых акругаў, а не партыйных сьпісаў. Праўладная «Белая Русь» прапаноўвала выбіраць прынамсі палову дэпутатаў паводле партыйных сьпісаў (як, напрыклад, ва Ўкраіне), але ўлады гэтую ідэю адхілілі.
  • Галасаваць на выбарах у Палату маюць права усе паўналетнія грамадзяне Беларусі. Галасаваньне добраахвотнае і ня можа быць прымусовым. Скардзіцца на прымус да галасаваньня можна ў пракуратуру ці ў райвыканкамы.
  • Цяперашнія выбары адбываюцца датэрмінова, хоць фармальна датэрміновымі ня лічацца. Тэрмін паўнамоцтваў дэпутатаў Палаты прадстаўнікоў — 4 гады. Але калі паміж выбарамі 2012 і 2016 гадоў прайшло 1449 дзён (3 гады, 11 месяцаў і 19 дзён), то паміж выбарамі 2016 і 2019-га пройдзе ўсяго 1162 дні (3 гады, 2 месяцы і 6 дзён).
  • Выбары ў Савет Рэспублікі — верхнюю палату Нацыянальнага сходу — адбудуцца 7 лістапада без удзелу звычайных беларусаў. Па 8 дэпутатаў ад вобласьці і яшчэ 8 ад Менску выберуць на абласных сходах дэпутаты гарадзкіх і раённых саветаў, яшчэ 8 дэпутатаў мае права прызначаць (але звычайна прызначае ня ўсіх) асабіста Аляксандар Лукашэнка.
  • Лукашэнка першапачаткова прапаноўваў правесьці выбары ў Палату на 7 лістапада — Дзень Кастрычніцкай рэвалюцыі. Старшыня ЦВК Лідзія Ярмошына тлумачыла, што гэтак ня варта рабіць. Урэшце на гэты дзень прызначылі выбары ў Савет Рэспублікі.
  • Фракцый у Палаце прадстаўнікоў няма. Апазыцыя амаль не трапляе ў Нацыянальны сход. Так, у Палаце прадстаўнікоў шостага скліканьня толькі 2 са 110 дэпутатаў — не прыхільнікі Лукашэнкі: Ганна Канапацкая з Аб’яднанай грамадзянскай партыі і беспартыйная Алена Анісім, старшыня Таварыства беларускай мовы. У Савеце Рэспублікі апазыцыі няма.
  • Нацыянальны сход дзейнічае з 1996 году — пасьля таго як Лукашэнка распусьціў Вярхоўны Савет XIII скліканьня. Выбары дэпутатаў Нацыянальнага сходу першага скліканьня не праводзіліся, Лукашэнка проста прызначыў туды ляяльных яму дэпутатаў Вярхоўнага Савету.
  • Нацыянальны сход амаль не распрацоўвае законапраектаў (часьцей гэта робяць міністэрствы і ведамствы) і амаль ніколі не галасуе супраць. Рэкорд шостага скліканьня Палаты прадстаўнікоў — 10 галасоў (9%) супраць звужэньня паўнамоцтваў сваёй палаты.
  • Краіны Заходняй Эўропы і ЗША не прызнавалі свабоднымі і дэмакратычнымі ніякія выбары і рэфэрэндумы ў Беларусі пасьля 1994 году. На ўсіх выбарах назіральнікі адзначалі шматлікія парушэньні, пасьля давалі рэкамэндацыі, але Лукашэнка прасіў яго «не павучаць».
  • На выбары 17 лістапада зьбіраюцца выстаўляць кандыдатаў прынамсі 7 апазыцыйных партыяў і шэраг рухаў. На ранейшых выбарах далёка ня ўсіх апазыцыянэраў рэгістравалі кандыдатамі або чальцамі выбарчых камісій.
  • Выбары каштуюць бюджэту каля 23 млн беларускіх рублёў. Лукашэнка кажа, што выбары «павінны прайсьці як сьвята», а Нацыянальны сход мае стаць «дыскусійнай пляцоўкай для дыялёгу дэпутатаў з рознымі поглядамі». Старшыню ЦВК Лідзію Ярмошыну «палохала цішыня» вакол выбараў, а 99% беларусаў лічаць, што ня могуць паўплываць на органы ўлады.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

Вам можа яшчэ спадабацца

XS
SM
MD
LG