Лінкі ўнівэрсальнага доступу

Ярмошына назвала «сьцёбам» скаргу студэнткі ў суд на Лукашэнку


Лідзія Ярмошына, архіўнае фота

Лідзія Ярмошына пракамэнтавала скаргу ў суд на Аляксандра Лукашэнку, якую 20-гадовая студэнтка напісала ў сувязі ў «датэрміновасьцю» парлямэнцкіх выбараў.

Ейныя словы пра гэта з прэс-канфэрэнцыі 14 жніўня перадаюць Tut.by і «Эўрарадыё».

​«Яна ж і кажа, што гэта пэрформанс. Гэта сьцёб, — заявіла Лідзія Ярмошына пра скаргу на Лукашэнку. — Яна выдатна разумела, што аспрэчыць гэты ўказ немагчыма і, сапраўды, гэта і не прадугледжана законам. Ну, прарэклямавалася сама і [прарэклямавала] гэтую ідэю. Тым больш, пісала не сама: сама сказала, што юрысты дапамагалі. Агулам, добра, калі маладыя людзі праяўляюць цікавасьць да палітыкі. Значна горш, калі яны абыякавыя».

Сапраўды, студэнтка Лізавета казала, што тэкст звароту быў «калектыўнай творчасьцю», і казала пра «пэрфоманс». Але не лічыла гэта жартамі: слова «пэрфоманс» ужыла, бо ня верыла, што суд стане па сутнасьці разглядаць скаргу на Лукашэнку, і хацела «паказаць узровень дэмакратыі ў Беларусі» і «паказаць, што дзіры ў нас ёсьць нават у Канстытуцыі».

Дзяўчына не зьбіралася рэклямаваць сябе, наадварот, прасіла не называць яе прозьвішча і не публікаваць здымкі твару. Зварот панесла ў суд менавіта яна, бо ёй пакуль 20 гадоў — калі б выбары прызначылі «плянава», ёй ужо споўніўся б 21 год і яна магла б балятавацца ў дэпутаты, а з датэрміновымі выбарамі ня можа.

Ярмошына таксама згадала, што падобныя скаргі паступалі ад Беларускага хэльсынскага камітэту:

«Скаргі прысьвечаныя прызначэньню выбараў, як яны лічаць, датэрміноваму роспуску парлямэнту і прызначэньню выбараў у гэтым годзе, на 10 месяцаў раней гранічнага тэрміну, а не ў наступным, 2020-м», — расказала Ярмошына пра скаргі БХК.

Парлямэнцкія выбары-2019 у Беларусі. Што варта ведаць

Выбары ў Палату прадстаўнікоў сёмага скліканьня — ніжнюю палату Нацыянальнага сходу — пройдуць 17 лістапада. Датэрміновае галасаваньне будзе ісьці ад 12 да 16 лістапада.

  • Агулам у Палату прадстаўнікоў абіраецца 110 дэпутатаў. Дэпутаты ніжняй палаты выбіраюцца паводле выбарчых акругаў, а не партыйных сьпісаў. Праўладная «Белая Русь» прапаноўвала выбіраць прынамсі палову дэпутатаў паводле партыйных сьпісаў (як, напрыклад, ва Ўкраіне), але ўлады гэтую ідэю адхілілі.
  • Галасаваць на выбарах у Палату маюць права усе паўналетнія грамадзяне Беларусі. Галасаваньне добраахвотнае і ня можа быць прымусовым. Скардзіцца на прымус да галасаваньня можна ў пракуратуру ці ў райвыканкамы.
  • Цяперашнія выбары адбываюцца датэрмінова, хоць фармальна датэрміновымі ня лічацца. Тэрмін паўнамоцтваў дэпутатаў Палаты прадстаўнікоў — 4 гады. Але калі паміж выбарамі 2012 і 2016 гадоў прайшло 1449 дзён (3 гады, 11 месяцаў і 19 дзён), то паміж выбарамі 2016 і 2019-га пройдзе ўсяго 1162 дні (3 гады, 2 месяцы і 6 дзён).
  • Выбары ў Савет Рэспублікі — верхнюю палату Нацыянальнага сходу — адбудуцца 7 лістапада без удзелу звычайных беларусаў. Па 8 дэпутатаў ад вобласьці і яшчэ 8 ад Менску выберуць на абласных сходах дэпутаты гарадзкіх і раённых саветаў, яшчэ 8 дэпутатаў мае права прызначаць (але звычайна прызначае ня ўсіх) асабіста Аляксандар Лукашэнка.
  • Лукашэнка першапачаткова прапаноўваў правесьці выбары ў Палату на 7 лістапада — Дзень Кастрычніцкай рэвалюцыі. Старшыня ЦВК Лідзія Ярмошына тлумачыла, што гэтак ня варта рабіць. Урэшце на гэты дзень прызначылі выбары ў Савет Рэспублікі.
  • Фракцый у Палаце прадстаўнікоў няма. Апазыцыя амаль не трапляе ў Нацыянальны сход. Так, у Палаце прадстаўнікоў шостага скліканьня толькі 2 са 110 дэпутатаў — не прыхільнікі Лукашэнкі: Ганна Канапацкая з Аб’яднанай грамадзянскай партыі і беспартыйная Алена Анісім, старшыня Таварыства беларускай мовы. У Савеце Рэспублікі апазыцыі няма.
  • Нацыянальны сход дзейнічае з 1996 году — пасьля таго як Лукашэнка распусьціў Вярхоўны Савет XIII скліканьня. Выбары дэпутатаў Нацыянальнага сходу першага скліканьня не праводзіліся, Лукашэнка проста прызначыў туды ляяльных яму дэпутатаў Вярхоўнага Савету.
  • Нацыянальны сход амаль не распрацоўвае законапраектаў (часьцей гэта робяць міністэрствы і ведамствы) і амаль ніколі не галасуе супраць. Рэкорд шостага скліканьня Палаты прадстаўнікоў — 10 галасоў (9%) супраць звужэньня паўнамоцтваў сваёй палаты.
  • Краіны Заходняй Эўропы і ЗША не прызнавалі свабоднымі і дэмакратычнымі ніякія выбары і рэфэрэндумы ў Беларусі пасьля 1994 году. На ўсіх выбарах назіральнікі адзначалі шматлікія парушэньні, пасьля давалі рэкамэндацыі, але Лукашэнка прасіў яго «не павучаць».
  • На выбары 17 лістапада зьбіраюцца выстаўляць кандыдатаў прынамсі 7 апазыцыйных партыяў і шэраг рухаў. На ранейшых выбарах далёка ня ўсіх апазыцыянэраў рэгістравалі кандыдатамі або чальцамі выбарчых камісій.
  • Выбары каштуюць бюджэту каля 23 млн беларускіх рублёў. Лукашэнка кажа, што выбары «павінны прайсьці як сьвята», а Нацыянальны сход мае стаць «дыскусійнай пляцоўкай для дыялёгу дэпутатаў з рознымі поглядамі». Старшыню ЦВК Лідзію Ярмошыну «палохала цішыня» вакол выбараў, а 99% беларусаў лічаць, што ня могуць паўплываць на органы ўлады.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG