Лінкі ўнівэрсальнага доступу

Актывістку аштрафавалі за тое, што прыкавала сябе ланцугом да слупа ў цэнтры Менску

абноўлена

Алена Талстая

Суд Цэнтральнага раёну аштрафаваў на 1020 рублёў сустаршыню руху салідарнасьці «Разам» Алену Талстую за акцыю на Кастрычніцкай плошчы Менску 25 сакавіка. Пастанову вынесла судзьдзя Вікторыя Шабуня.

Увечары 25 сакавіка актывістка на Кастрычніцкай плошчы прыкавала сябе ланцугом да вазона з кветкамі. Гэтак Талстая пратэставала супраць:

  • затрыманьняў на мітынгу-канцэрту на Дзень Волі 24 сакавіка ў Менску;
  • абмежаваньня палітычных свабодаў у Беларусі.

Да суду Алена Талстая тры дні трымала галадоўку ў ізалятары часовага ўтрыманьня. У судзе актывістка паведаміла, што ў ізалятары ёй не давалі магчымасьці пісаць скаргі і заявы.

Алена Талстая вінаватай сябе не прызнала. Падчас працэсу сьведкі-міліцыянты блыталіся ў паказаньнях. Абаронца актывісткі прасіла суд апраўдаць яе, бо, на думку адвакаткі, складу адміністрацыйнага правапарушэньня не было.

Пры затрыманьні 25 сакавіка міліцыянты забралі ў Алены Талстой бел-чырвона-белы сьцяг. Куды ён потым падзеўся, высьветліць не ўдалося. Міліцыянт, які забраў сьцяг, адмовіўся адказваць на гэтае пытаньне.​

Што важна ведаць пра Дзень Волі — 2019

  • 1 сакавіка — Аляксандар Лукашэнка вусна забараніў сьвяткаваць Дзень Волі канцэртам на стадыёне «Дынама», як таго хацелі арганізатары #БНР100 — кажа: «Ідзіце на Бангалёр».
  • 23 сакавіка ў Горадні — канцэрт у Калоскім парку з удзелам Зьмітра Вайцюшкевіча, Лявона Вольскага, гуртоў Nizkiz, «Крама», «Дай дарогу!» і Dzieciuki. Ад 3 да 5 тысяч гледачоў.
  • 23–24 сакавіка — акцыі беларусаў у Варшаве, Вільні, Кіеве, Нью-Ёрку, Празе ды іншых гарадах.
  • 24 сакавіка ў Менску — мітынг-канцэрт у Кіеўскім сквэры з удзелам «Дай дарогу», N.R.M., «Разьбітага сэрца пацана» ды іншых. Ад 1500 (паводле міліцыі) да 5–7 тысячаў (паводле арганізатараў) гледачоў. Затрыманыя Натальля Басалыга-Гарачка і Зьміцер Дашкевіч.
  • 25 сакавіка ў Гомлі — акцыя памяці герояў БНР.
  • 25 сакавіка ў Віцебску — адзіночны пікет Барыса Хамайды, які расцанілі як «парушэньне парадку ўтрыманьня населеных пунктаў».
  • 25 сакавіка ў розных гарадах — людзі вывешвалі бел-чырвона-белыя сьцягі на заклік арганізатараў #БНР101, уладам не спадабалася.
  • 25 сакавіка ў Менску на Кастрычніцкай плошчы — акцыя Алены Талстой (прыкавала сябе да слупа), затрыманьні палітыкаў і мінакоў. Праз тры гадзіны вызваленыя ўсе, акрамя Талстой, пратаколаў аб парушэньнях не складалі.
  • 25 сакавіка ў Менску на пешаходных вуліцах — затрыманьні музыкаў (Аракелян, Вайцюшкевіч, Варашкевіч і Вольскі), якія анансавалі, што зьбіраюцца прагуляцца і ўзяць з сабой музычныя інструмэнты. Пасьля затрыманьня дзясяткі людзей сьпявалі хорам песьні Вольскага, міліцыя пагражала затрыманьнямі і гвалтам. Праз тры гадзіны музыкі вызваленыя.
  • 25 сакавіка ў розных гарадах — салюты ў гонар Дня Волі.

Што яшчэ пачытаць, паслухаць, паглядзець пра БНР

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG