Лінкі ўнівэрсальнага доступу

Берасьцейскія пратэстоўцы заявілі, што будуць вылучаць свайго кандыдата ў прэзыдэнты


Дзям’ян Лепясевіч на акцыі праціўнікаў акумулятарнага заводу 28 кастрычніка 2018 году.

Ініцыятыўная група берасьцейцаў, якія пратэстуюць супраць будаўніцтва акумулятарнага заводу, зьбіраецца вылучыць свайго кандыдата на выбарах прэзыдэнта Беларусі. Ужо названае імя верагоднага прэтэндэнта: Дзям’ян Лепясевіч — адзін зь лідэраў пратэстоўцаў.

Сам Дзям’ян Лепясевіч у інтэрвію Свабодзе заявіў, што ініцыятыўная група будзе вывучаць наконт гэтага грамадзкую думку.

«Хочам нешта зьмяніць у гэтай краіне»

«Мы як ініцыятыўная група зьвяртаемся да народу Рэспублікі Беларусь з пытаньнем-прапановай: мы хочам вылучыць свайго кандыдата на прэзыдэнта, каб нешта зьмяніць у гэтай краіне. Таму што, як мы бачым, у нас закон не працуе абсалютна. Усё робіцца не на карысьць здаровага сэнсу, а на карысьць нечых незразумелых інтарэсаў.

Калі народ выявіць сваё жаданьне і падтрымае нашую ідэю, то мы сядзем за круглы стол і прымем такое рашэньне аб вылучэньні. Маральна мы гатовыя — каб ня былі гатовыя, мы б такога не казалі. Ісьці папулісцкімі мэтадамі мы не зьбіраемся, мы спачатку спытаем у грамадзтва, у народу яго думку, а потым будзем прымаць рашэньне канчаткова», — сказаў Свабодзе Дзям’ян Лепясевіч.

Прадстаўнікі ініцыятыўнай групы плянуюць высьвятляць думку людзей праз інтэрнэт.

«Спытаем праз сацыяльныя сеткі, праз інтэрнэт, гэтага цалкам дастаткова. Калі нехта арганізуе сацапытаньне, будзем яму толькі ўдзячныя. У нас часу дастаткова, ніхто нікуды не сьпяшаецца і ні да чога не абавязвае — гэта дыялёг з грамадзтвам», — кажа Дзям’ян Лепясевіч.

Лепясевіч кажа, што на гэты крок іх падштурхнула будаўніцтва акумулятарнага заводу каля Берасьця.

«Мы зьвяртаемся, але дзеяньняў у адказ у межах закону ад уладаў ня маем. Ёсьць толькі адна адгаворка — мы вам усё адказалі. Наша заява — гэта не барацьба супраць заводу. Мы ўзьнялі цэлы пласт праблемаў, без вырашэньня якіх у нас разьвіцьця зусім ніякага быць ня можа», — кажа спадар Лепясевіч.

Хто такі Лепясевіч

Дзям’ян Лепясевіч — адзін зь лідэраў групы берасьцейцаў, якія пратэстуюць супраць заводу. Ён мае тэхнічную адукацыю і зьвяртае ўвагу на розныя супярэчнасьці ў справе будаўніцтва заводу. Пратэстоўцы прыслухоўваюцца-да ягонай думкі.

Лепясевіч удзельнічаў у многіх акцыях па «кармленьні галубоў», што праходзяць у цэнтры Берасьця па нядзелях. У кастрычніку мінулага году за ўдзел у такой акцыі ён быў затрыманы і аштрафаваны на 245 рублёў.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG