Лінкі ўнівэрсальнага доступу

Берасьцейца замест суду даставілі з ізалятару ў лякарню


Архіўнае фота. Мітынг «Берасьцейцы супраць сьвінцу» — супраць пабудовы акумулятарнага заводу «АйПаўэр»
Архіўнае фота. Мітынг «Берасьцейцы супраць сьвінцу» — супраць пабудовы акумулятарнага заводу «АйПаўэр»

Удзельніка пратэстаў супраць будаўніцтва акумулятарнага заводу ў Берасьці Канстанціна Астапука даставілі ў чыгуначны шпіталь Берасьця.

Ад пятніцы Канстанцін Астапук знаходзіўся ў ізалятары часовага ўтрыманьня, пасьля таго як быў затрыманы за непадпарадкаваньне супрацоўнікам міліцыі.

8 кастрычніка яго меліся судзіць, аднак замест суду завезьлі ў лякарню.

«Кладуць мяне ў лякарню, бо пасьля ізалятару баліць жывот. Два дні ў ізалятар да мяне прыяжджала „хуткая“, бо было дрэнна. Мусілі везьці ў суд, але перадумалі, суд будзе пасьлязаўтра. Вінавацяць мяне і ў тым, што выступіў па ўсіх каналах супраць намесьніка начальніка Ленінскага РАУС Мікалая Самасюка. Думаю, будуць помсьціць, што я расказаў пра гутарку зь ім», — кажа Канстанцін Астапук.

Пра «прафіляктычную гутарку» зь Мікалаем Самасюком Канстанцін Астапук расказваў прэсе 1 кастрычніка, пасьля таго, як быў перанесены першы суд над ім і блогерам Сяргеем Пятрухіным за выхад на плошчу 30 верасьня. Астапук кажа, што міліцэйскі начальнік яму пагражаў турмой.

Суд над Канстанцінам Астапуком за непадпарадкаваньне міліцыі падчас затрыманьня на акцыі 30 верасьня прызначаны на 10 кастрычніка а 9:30.

Сёньня чакаюцца яшчэ суды над трыма пратэстоўцамі супраць акумулятарнага заводу ў Берасьці.

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем
Месцазнаходжаньне новага акумулятарнага заводу пад Берасьцем
  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG