Лінкі ўнівэрсальнага доступу

Нечаканы Скарына: загадкавая абарона ў Падуі

абноўлена

500 гадоў беларускага кнігадрукаваньня: новыя ацэнкі, новыя факты, новыя загадкі. Кожны дзень да 6 жніўня — чарговая частка цыклю.

5 лістапада 1512 году ў царкве Сьвятога Ўрбана ў Падуі сабралася на паседжаньне мэдычная калегія Падуанскага ўнівэрсытэту.

Заля «Tinello dei Dottori» ў біскупскім палацы Падуі, дзе ў XV-XVI стагодзьдзях праводзіліся экзамэны, і дзе 9 лістапада 1512 году Скарына ў прысутнасьці мясцовага кардынала здаў другі (больш цырыманіяльны) экзамэн на званьне доктара мэдыцыны. Тут першадрукару былі ўрачаныя дыплём і доктарская мантыя.
Заля «Tinello dei Dottori» ў біскупскім палацы Падуі, дзе ў XV-XVI стагодзьдзях праводзіліся экзамэны, і дзе 9 лістапада 1512 году Скарына ў прысутнасьці мясцовага кардынала здаў другі (больш цырыманіяльны) экзамэн на званьне доктара мэдыцыны. Тут першадрукару былі ўрачаныя дыплём і доктарская мантыя.

Адкрываючы паседжаньне віцэ-прыёр калегіі, доктар свабодных навук і мэдыцыны Тадэо Мусаці сказаў:

«Вашы дастойнасьці, спадары навукоўцы! Я склікаў Вашы вялебнасьці дзеля наступнай прычыны. У Падую прыбыў вельмі вучоны, але бедны малады чалавек, доктар свабодных навук, родам зь вельмі далёкіх краін, якія ляжаць на адлегласьці чатырох тысяч міль, а можа і больш, ад нашага слаўнага гораду. Прыбыў малады чалавек для таго, каб памножыць славу і бляск Падуі, а таксама квітнеючага сходу філёзафаў унівэрсытэту і нашай сьвятой калегіі. Ён просіць калегію на знак асаблівай міласьці дазволіць яму падвергнуцца выпрабаваньням у галіне мэдыцыны... Калі дазволяць Вашы вялебнасьці, я прадстаўляю Вам гэтага маладога чалавека. Завуць яго Францішак, ён сын нябожчыка Лукі Скарыны з Полацку, русін».

Калегія, як вядома, дазволіла, і на заўтра, 6 лістапада, Скарына здаў доктарскі экзамэн. Вось тут і пачынаюцца загадкі.

Паводле статуту Падуанскага ўнівэрсытэту, дактарантура доўжылася чатыры гады. Да экзамэнаў на званьне доктара мэдыцыны дапускалі толькі прэтэндэнта, які тры гады слухаў лекцыі, а пасьля яшчэ ня менш за год практыкаваў пад кіраўніцтвам вядомага лекара ў шпіталях Падуі.

Чаму Скарыну дапусьцілі да абароны без навучаньня ў дактарантуры?

Можна меркаваць, што гэтую асаблівую ласку яму аказалі як «secretarii regis Datiae» (Сакратара караля Даніі). Але калі ён быў «сакратаром караля», то чаму яго назвалі «бедным» і чаму сказалі, што ён прыбыў зь вельмі далёкіх краін, якія ляжаць на адлегласьці чатырох тысяч міль ад Падуі?

Адказу на гэтыя пытаньні пакуль няма.

Глядзець камэнтары (1)

Гэтая дыскусія закрытая.
XS
SM
MD
LG