Людзі

Вызвалілі Дзяніса Мазько, праціўніка акумулятарнага заводу, якога з бацькам затрымалі нібыта за патроны і выбухоўку

​Праціўнік будаўніцтва акумулятарнага заводу пад Берасьцем Дзяніс Мазько вызвалены з ізалятару часовага ўтрыманьня Ленінскага РАУС Берасьця.

Як паведаміў БелаПАН праваабаронца Раман Кісьляк, Дзяніса Мазько вызвалілі 7 красавіка ў 19.00.

Дзяніс Мазько быў затрыманы ў ноч на 5 красавіка ў межах крымінальнай справы, распачатай у дачыненьні да ягонага бацькі Майсея Мазько паводле ч. 2 арт. 295 КК — «незаконныя дзеяньні з агнястрэльнай зброяй, боепрыпасах і выбуховых рэчывах».

ГЛЯДЗІЦЕ ТАКСАМА: «Расказваў, што за ім сочаць». Што вядома пра затрыманага з выбухоўкай берасьцейскага актывіста

2 красавіка ў Берасьці ў аўтамабілі «Фольксваген-Пасат», якім кіраваў Майсей Мазько, быў знойдзены пакет з патронамі, брыкетам невядомага рэчыва і прадметам, падобным на запал выбуховага прыстасаваньня. Майсей Мазько быў вызвалены з ІЧУ 6 красавіка а 1-й гадзіны ночы, але справы не спынілі.

«Дзяніс заяўляе, што ня мае ніякага дачыненьня да гэтых прадметаў, — сказаў Кісьляк. — Лічу, гэты пакет спэцыяльна падкінулі, каб дыскрэдытаваць мірны пратэст супраць акумулятарнага заводу. Той, хто зрабіў гэта, хоча выставіць нас перад краінай тэрарыстамі».

ГЛЯДЗІЦЕ ТАКСАМА: У Берасьці прайшла акцыя праціўнікаў акумулятарнага заводу. ФОТА

На думку праваабаронцы, улады ня хочуць, каб усе праціўнікі заводу былі на волі ў поўным складзе — ён адзначыў, што ў нядзелю быў затрыманы адзін зь лідэраў пратэсту Дзьмітры Бекалюк, а 5 красавіка спрабавалі затрымаць актывістку Тацяну Фесікаву (ёй стала блага, хуткая дапамога адвезла яе ў шпіталь).

Пратэсты супраць акумулятарнага заводу ў Берасьці. Што важна ведаць

Месцазнаходжаньне новага акумулятарнага заводу пад Берасьцем

  • Завод пабудавалі каля вёсак Хабы, Шчэбрын і Тэльмы-2, што пад Берасьцем. За два кілямэтры — рака Мухавец. Афіцыйная экалягічная экспэртыза прагназавала, што ўзьдзеяньне заводу на асяродзьдзе і чалавека будзе нязначнае. Аднак людзі ўсё роўна баяцца, што выкіды з заводу падарвуць ім здароўе.
  • Пратэсты супраць акумулятарнага заводу ў Берасьці трывалі ад пачатку 2018 году, калі людзі даведаліся пра будоўлю. Праціўнікі заводу лічаць вытворчасьць «бруднай» і небясьпечнай, заяўляюць пра парушэньні працэдураў будаўніцтва.
  • Актывісты сабралі больш за 37 тысяч подпісаў супраць заводу ды накіравалі іх у адміністрацыю Лукашэнкі ў лютым 2018 году. Аднак урадавая камісія ня выявіла парушэньняў у рэалізацыі праекту па будаўніцтве заводу.
  • У траўні 2018 году актывісты накіравалі ў адміністрацыю прэзыдэнта больш за 2,5 тысячы подпісаў за адстаўку чыноўнікаў Берасьця, бо тыя «ігнаруюць інтарэсы жыхароў Берасьцейскага рэгіёну і сьвядома заплюшчваюць вочы на шкоду ад заводу».
  • У верасьні 2018 году на будоўлі заводу выявілі парушэньні пажарнай бясьпекі.
  • У чэрвені 2019 году падчас пусканаладачных работ на заводзе зафіксавалі перавышэньне забруджвальных выкідаў у атмасфэрнае паветра.
  • 14 чэрвеня старшыня Берасьцейскага аблвыканкаму Анатоль Ліс прыпыніў будаўніцтва заводу да ліквідацыі выяўленых парушэньняў.
  • У ліпені 2019 праект акумулятарнага завода атрымаў адмоўнае заключэньне дзяржаўнай экалягічнай экспэртызы, У Мінпрыроды паведамілі, што прычынай стала прадстаўленьне недакладных дадзеных. У жніўні праектную дакумэнтацыю паўторна падалі на экспэртызу, але пазьней кампанія адклікала дакумэнты «па прычыне неабходнасьці ўсебаковага і больш поўнага адлюстраваньня інфармацыі аб унесеных зьменах».
  • 24 лютага 2020 году праектную дакумэнтацыю акумулятарнага завода пасьля карэкціроўкі зноў падалі на дзяржаўную экалягічную экспэртызу. Грамадзкая экспэртыза, якую даручаў правесьці Лукашэнка, правалілася.
  • 22 чэрвеня 2020 году Лукашэнка пааабяцаў правесьці рэфэрэндум наконт лёсу заводу пасьля прэзыдэнцкіх выбараў.
  • 15 сакавіка 2021 году завод увялі ў эксплюатацыю. У правядзеньні рэфэрэндуму актывістам адмовілі.