Як піша агенцтва Dpa, Літва будуе новую вайсковую і матэрыяльна-тэхнічную інфраструктуру для салдатаў NATO на сваёй вайсковай базе Рукла.
Міністэрства абароны Літвы паведамляе аб новых адміністрацыйных і жылых будынках, спартовых і трэнавальных аб’ектах, а таксама мэдыцынскім цэнтры і вайсковай кухні, якія павінны быць пабудаванымі ў наступныя гады. У цяперашні час база выкарыстоўваецца для разьмяшчэньня літоўскіх і нямецкіх падразьдзяленьняў і будаўнічыя работы зьяўляюцца сумесным літоўска-нямецкім праектам, гаворыцца ў заяве Мінабароны Літвы.
Пасьля завяршэньня цэнтар зможа разьмясьціць да 3000 салдатаў. Будаўнічыя работы павінны быць выкананыя ў пэрыяд з 2025-га па 2027 год, ацэначны кошт каля 300 мільёнаў эўра.
Будаўніцтва пастаяннай базы матэрыяльна-тэхнічнага забесьпячэньня, якое плянуецца завяршыць у сакавіку 2025 году, ужо напалову скончылі. Кантынгент вайскоўцаў нямецкага Бундэсвэру ўзначальвае шматнацыянальную баявую групу NATO ў Рукле з 2017 году. Яна складаецца з прыблізна 1600 салдатаў, палова зь іх нямецкія, разьмешчаныя ў Літве для абароны ўсходняга флянгу альянсу і стрымліваньня Расеі.
NATO вырашыла павялічыць сваю доўгатэрміновую прысутнасьць у Літве ў адказ на поўнамаштабнае ўварваньне Расеі ва Ўкраіну. Урэшце Нямеччына плянуе разьмясьціць у краіне брыгаду з 4000 чалавек.
Гэта прызначана для ўмацаваньня патрэб бясьпекі партнэра па NATO, які мяжуе з расейскім эксклявам Калінінградзкай вобласьцю і саюзьнікам Расеі Беларусьсю, піша Dpa.
«Мы праводзім грунтоўную рэканструкцыю вайсковай інфраструктуры Літвы. Наша мэта — пабудаваць паўнавартасную інфраструктуру для сіл саюзьнікаў і літоўскіх вайскоўцаў. Гэта абавязаньні Літвы ў падтрымцы як боку, які прымае. Разьвіцьцё інфраструктуры таксама непазьбежна для павелічэньня баявой моцы літоўскіх узброеных сіл і больш эфэктыўнай нацыянальнай абароны», — кажа міністар нацыянальнай абароны Літвы Арвідас Анушаўскас.
