Лінкі ўнівэрсальнага доступу

Сьвятлана Ціханоўская турэмнікам: «Перастаньце зьдзекавацца з майго мужа»


Сьвятлана Ціханоўская, архіўнае фота

Кандыдатка ў прэзыдэнты Беларусі Сьвятлана Ціханоўская расказала Tut.by, што ейнага мужа, зьняволенага аўтара блогаў «Страна для жизни» Сяргея Ціханоўскага, перавялі ў камэру з 15 людзьмі, якія патрабуюць «доказаў» супраць «чутак пра нізкі сацыяльны статус».

«У аўторак Сяргей выйшаў з карцара, — расказала Сьвятлана Ціханоўская. — А ў сераду ў яго быў адвакат, і муж расказаў, што пасьля карцара яго павялі ня ў тую камэру, у якой ён знаходзіўся раней, а ў камэру на 15 чалавек, і тыя зьняволеныя зноў адмовіліся яго прымаць, і зноў запатрабавалі „доказаў“ супраць чутак аб нібыта „нізкім сацыяльным статусе“. Толькі тады яго зьмясьцілі ў камэру аднаго. Ноччу супрацоўнік СІЗА яго некалькі разоў будзіў, даваў указаньні пераходзіць з аднаго спальнага месца на іншае.

Складана назваць разумныя падставы для такога стаўленьня, але я думаю, што гэта рэакцыя на тое, што на мінулым тыдні ў судзе разглядаліся скаргі Ціханоўскага на СІЗА.

Я веру, што Сяргея такімі мэтадамі ня зламаць. Але ён пастаўлены ў такія ўмовы, што пад пагрозай яго здароўе і жыцьцё. Я зьвяртаюся да ўсіх, ад каго гэта залежыць: перастаньце зьдзекавацца з майго мужа і ціснуць на яго!»

Адвакат Ціханоўскага Віктар Мацкевіч расказаў, што на гэтым тыдні бачыў Ціханоўскага штодзень. Сытуацыя з карцарам і непрыманьнем іншымі зьняволенымі «ідзе па коле», кажа адвакат. Умовы для Сяргея Ціханоўскага становяцца толькі горшымі: сустрэчы зь ім, таксама як працэсуальныя дзеяньні, перанесьлі ў пакой для спатканьняў вязьняў з роднымі, дзе немагчыма захаваць адвакацкую тайну і тайну сьледзтва. Гэта турэмнікі тлумачаць «эпідэмічнай сытуацыяй».

Ціханоўская падала ў Сьледчы камітэт заяву аб спатканьні з мужам — кажа, гэтая сустрэча патрэбна яшчэ і як з даверанай асобай кандыдата ў прэзыдэнты. Адвакат жа падаў скаргі ва ўпраўленьне Дэпартамэнту выкананьня пакараньняў Менску і менскую пракуратуру.

Таксама адвакат абяцае падаць «хадайніцтва да органа расьсьледаваньня аб вызваленьні Ціханоўскага праз тое, што ягонае ўтрыманьне пад вартай не адпавядае мэтам расьсьледаваньня, носіць характар жорсткага і бесчалавечнага абыходжаньня».

Затрыманьні Ціханоўскага і яго прыхільнікаў. Што трэба ведаць

  • Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
  • У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
  • Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.

Пахвілінна. Як адбылося затрыманьне Ціханоўскага ў Горадні >>

  • У Twitter-акаўнце Ціханоўскага «Страна для жизни» зьявілася відэа, на якім бачна, як мужчына ў скураной куртцы, падчас мітусьні на пікеце ў Горадні, дапамагае легчы на зямлю чалавеку ў міліцэйскай форме.
  • Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся ў некалькіх мэтрах ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміў пра крымінальную справу за «гвалт супраць міліцыянтаў».
  • Ціханоўскага маюць трымаць за кратамі прынамсі да дня прэзыдэнцкіх выбараў.
  • Вядома пра наступных затрыманых у «справе Ціханоўскага»:
  1. Сяргей Ціханоўскі
  2. Яўген Разьнічэнка
  3. Зьміцер Фурманаў
  4. Уладзімер Навумік
  5. Вяргілій Ушак
  6. Аляксандар Арановіч
  7. Васіль Баброўскі
  8. Арцём Сакаў
  9. Уладзімер Кніга

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG