Лінкі ўнівэрсальнага доступу

Урад Беларусі апублікаваў пляны на другую палову году. Выбары прэзыдэнта ў іх не ўлічылі


Дом ураду ў Менску, ілюстрацыйнае фота
Дом ураду ў Менску, ілюстрацыйнае фота

Савет міністраў Беларусі зацьвердзіў сабе плян працы на другое паўгодзьдзе 2020 году. Дакумэнт апублікавалі на Pravo.by 11 ліпеня.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

Ужо 21 ліпеня ўрад плянуе разгледзець напрамкі сацыяльна-эканамічнага разьвіцьця Беларусі да 2025 году і «канцэптуальныя асновы» прагнозу на 2021 год і на 2021–23 гады.

Праз два дні пасьля прэзыдэнцкіх выбараў, 11 жніўня ў плянах ураду — пытаньне аб выніках сацыяльна-эканамічнага разьвіцьця Беларусі за першую палову 2020 году. Праз тыдзень — разгляд працы ў імпартазамяшчэньні.

Сам факт прэзыдэнцкіх выбараў і магчымай зьмены кіраўніка дзяржавы ў дакумэнце ніяк ня згадваецца. Напрыклад, 15 верасьня ўрад плянуе разглядаць, як выканалі даручэньне кіраўніка дзяржавы завяршыць будаўніцтва і рэканструкцыю малочных і сьвінагадоўчых комплексаў.

Пры тым прэзыдэнт Беларусі, згодна з Канстытуцыяй, можа па ўласным жаданьні прызначаць і звальняць чальцоў ураду — міністраў і віцэ-прэм’ераў, старшыняў камітэтаў (са згоды Палаты прадстаўнікоў і прэм’ер-міністра). Звычайна ў Беларусі цырымонія ўступленьня на пасаду праходзіць празь месяц (ад 10 да 33 дзён) пасьля прэзыдэнцкіх выбараў.

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG