Лінкі ўнівэрсальнага доступу

Партыя БНФ: Склад участковых камісій не дазваляе правесьці сумленныя выбары


Падлік галасоў на мясцовых выбарах у Менску, 2018 год

«Склад участковых камісіяў не дазваляе правесьці сумленныя выбары. Даверу гэтаму складу камісіяў няма. Таксама ня можа быць даверу з боку грамадзтва да вынікаў, якія гэтыя камісіі будуць агучваць», — сьцьвярджае ўправа Партыі БНФ у заяве, распаўсюджанай 24 чэрвеня.

УЖЫВУЮ Выбары-2020. Як праходзіць прэзыдэнцкая кампанія падчас пандэміі

«Фармаваньне ўчастковых камісіяў для выбараў прэзыдэнта прайшло антыдэмакратычна і несумленна. Улады беспадстаўна адхілілі кандыдатуры ад дэмакратычных партыяў і грамадзянскай супольнасьці, сфармаваўшы камісіі ў цалкам падкантрольным складзе. Адмоўлена ва ўключэньні ў склад камісіяў сотням вылучэнцаў Партыі БНФ, ГА БНФ «Адраджэньне», іншых партыяў і рухаў, а таксама шматлікім прадстаўнікам мясцовых супольнасьцяў, што былі вылучаныя самімі выбарнікамі праз збор подпісаў», — адзначаецца ў заяве.

Паводле інфармацыі партыі, «ад непадкантрольных адміністрацыі людзей татальна зачышчаныя ўчастковыя камісіі ў Менску», «без абмеркаваньня ці з хлусьлівымі тлумачэньнямі былі адхіленыя кандыдатуры старшыні Партыі БНФ Рыгора Кастусёва, намесьніка старшыні партыі Аляксея Янукевіча, кіраўніка сталічнай арганізацыі БНФ Зьмітра Касьпяровіча, які мае досьвед выкрыцьця фальсыфікацыяў падчас працы ў выбарчай камісіі на мінулых выбарах прэзыдэнта».

«Улада робіць усё, каб цалкам выключыць беларускі народ з працэсу арганізацыі і правядзеньня выбараў, – лічыць Партыя БНФ. – Стэрыльныя выбарчыя камісіі створаныя зь відавочнай мэтай: забясьпечыць вынікі выбараў, патрэбныя для цяперашняй уладнай групоўкі. Такое фармаваньне камісіяў, асабліва ва ўмовах грамадзкага абуджэньня ды пільнай увагі беларусаў да палітычных працэсаў у краіне, ёсьць дэманстратыўным грэбаваньнем уладай сумленнасьцю ды законнасьцю».

Партыя БНФ патрабуе «правядзеньня сапраўды свабодных, сумленных і дэмакратычных выбараў дзеля гарантаваньня бясьпекі і дабрабыту беларускага народу і абароны ды ўмацаваньня дзяржаўнай незалежнасьці краіны».

«Дзеля фіксацыі парушэньняў пры фармаваньні ўчастковых выбарчых камісіяў» управа Партыі БНФ «падрыхтуе і падасьць скаргі на фармаваньне камісіяў у дзевяць судоў ува ўсіх дзевяці раёнах сталіцы». Арганізацыйным структурам Партыі БНФ на месцах «прапанавана падрыхтаваць адпаведныя скаргі ў раённыя і гарадзкія суды, дзеля чаго ім будзе дадзеная арганізацыйная і мэтадычная падтрымка».

Раней штаб прэтэндэнта на пасаду прэзыдэнта Віктара Бабарыкі паведаміў, што ўвайсьці ў склад участковых камісіяў для выбараў прэзыдэнта адмоўлена амаль усім з больш чым 3500 удзельнікаў ініцыятывы «Честные люди».

Прэзыдэнцкія выбары — 2020 у Беларусі. Што важна ведаць

  • Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
  • 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
  • Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
  • ЦВК зарэгістраваў 15 ініцыятыўных груп з 55 заявак.
  • Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
  • 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
  • 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
  • 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
  • 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
  • Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.

Камэнтаваць тут можна праз Facebook. Нам таксама можна напісаць на адрас radiosvaboda@gmail.com

XS
SM
MD
LG