«Сядзелі за півам і вырашылі так зрабіць. Калі наша апазыцыя проста стухла, то чаму не?» — музыка Алесь Таболіч, лідэр пэган-мэтал-гурту Znich, абвясьціў пра збор людзей у сваю ініцыятыўную групу.
Алесь кажа, што ён у пашпарце таксама «Аляксандар Рыгоравіч».
«Спачатку я сьцебануўся, я звычайна жартую, а пасьля, калі атрымалася, што апазыцыі ў нас няма, я паразмаўляў са сваімі сябрамі зь беларускай тусоўкі. Яны кажуць, табе ж ужо 40 гадоў, цябе зваць Аляксандар Рыгоравіч, дык балятуйся. Я падумаў: а чаму не? Сядзелі за півам і вырашылі так зрабіць. Калі наша апазыцыя проста стухла, то чаму не? Чаму не другі Аляксандар Рыгоравіч?»
Алесь Таболіч будзе спрабаваць зарэгістраваць сваю ініцыятыўную групу.
«Я за парлямэнцкую рэспубліку, без усялякіх прэзыдэнтаў і верхаводаў. Людзі павінны самі выбіраць тое, што ім трэба. Таму, калі паводле закону кожны чалавек можа балятавацца, то чаму і не? Гэта ўсё адбылося спантанна. Я чалавек звонку, непартыйны, не ўваходжу ў нейкую арганізацыю, з культурніцкай пазыцыяй. Але калі Аляксандар Рыгоравіч ідзе на выбары, то чаму не?»
У адным са сваіх пастоў у «Фэйсбуку» музыка напісаў таксама «І я кандыдат... яшчэ хто??? Чым я горшы за Канапацкую?))))».
«Ні Канапацкую, ні Караткевіч, ні Гайдукевіча я не ўспрымаю ўсур’ёз, бо гэта „кішэнныя“ людзі. Бо ніхто зь іх не сказаў пра тое, што адбываецца ў нас цяпер. Яны зьяўляюцца тады, калі ім трэба балятавацца ў парлямэнт ці на прэзыдэнта. А тое, што ў іх там грошы ці сваякі-бізнэсоўцы, усім гэта ўсё роўна. Найперш людзі павінны быць ідэйныя і зь нейкай пазыцыяй. А тут яны проста піяраць свае дэкальтэ ці мэрсэдэс. Гэта рэальна псэўдапрэзыдэнты. Чалавек павінен быць з народу. А гэтыя не народныя, падстаўныя».
Паводле музыкі, за яго падпісваюцца сваякі, «рокенрольнікі». Калі набярэцца неабходная колькасьць, то ён зьбіраецца падаць дакумэнты на рэгістрацыю.
«Адзінае, што часу засталося — адзін дзень. Таму калі атрымаецца, то атрымаецца. А калі не, то можа, так і трэба, як кажуць беларусы. Калі мяне зарэгіструюць, тады будзем размаўляць. Але ініцыятыва пайшла з народу, а не ад мяне».
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў