Патрульная паліцыя Роўненскай вобласьці затрымала грамадзяніна Беларусі, які кіраваў грузавым аўтамабілем у стане алькагольнага ап’яненьня і ствараў на дарозе аварыйныя сытуацыі.
На небясьпечныя паводзіны грузавіка на міжнароднай трасе «Кіеў-Чоп» у паліцыю паскардзіліся некалькі іншых кіроўцаў, а калі паліцэйскія спрабавалі спыніць беларуса на стацыянарным пасту патрульнай службы, той пачаў уцякаць, зрабіўшы манэўр у бок патрульнага — яму ледзь удалося адскочыць, каб ня трапіць пад грузавік.
Паліцэйскія пачалі перасьлед беларускага грузавіка на службовых аўтамабілях з сыгнальнымі знакамі, патрабуючы спыніцца. У адказ кіроўца некалькі разоў ішоў на таран паліцэйскіх аўтамабіляў, каб пазьбегнуць блякаваньня грузавіка.
Калі патрульныя машыны змаглі заблякаваць і спыніць грузавік, высьветлілася, што кіроўца — грамадзянін Беларусі, колішні супрацоўнік ДАІ. Як сьцьвярджаюць у патрульнай службе Роўненскай вобласьці, беларус паводзіў сябе нахабна і агрэсіўна, пагражаючы ўкраінскім паліцэйскім і абражаючы Ўкраіну і ўкраінскіх грамадзянаў. Патрульныя вымушаныя былі надзець затрыманаму кайданкі.
У прэсавай службе патрульнай паліцыі Роўненскай вобласьці Свабодзе паведамілі, што ў беларуса былі відавочныя прыкметы алькагольнага ап’яненьня, але той адмовіўся праходзіць адпаведную праверку на месцы здарэньня і ў мэдычнай установе:
«Мы маем адпаведны відэазапіс, які перададзены ў суд. Мы вырашылі яго не публікаваць, бо там усё ператварылася б на суцэльнае „піканьне“ — затрыманы ўвесь час мацюкаўся».
На беларуса склалі тры адміністратыўныя пратаколы — за парушэньне правілаў выкарыстаньня зьнешніх асьвятляльных прыбораў пры пачатку руху і зьмене ягонага кірунку, аб кіраваньні ў стане алькагольнага ап’яненьня і за невыкананьне патрабаваньня паліцэйскіх аб спыненьні транспартнага сродку.
Па выніках вывучэньня матэрыялаў справы, суд пазбавіў беларуса права на кіраваньне транспартнымі сродкамі, забраў пасьведчаньне кіроўцы і прызначыў штраф у памеры 10 200 грыўняў (прыблізна 450 даляраў у эквіваленце).
У сваю чаргу беларус зьвярнуўся ў паліцыю з заявай аб нанясеньні яму цялесных пашкоджаньняў у часе затрыманьня, што не пацьвердзіла судова-мэдычная экспэртыза. Апроч таго, беларус заявіў, што патрульныя паліцэйскія выкралі ў яго 5 тысяч эўра. Паліцыя зараз правярае гэтую інфармацыю. У выпадку, калі яна не пацьвердзіцца, беларуса пакараюць яшчэ і за ілжывыя сьведчаньні.
Паводле інфармацыі Свабоды, грузавік зь беларускім нумарам рэгістрацыі належаў кампаніі Girteka Logistics, якая пасьля гэтага здарэньня накіравала ва Ўкраіну іншага свайго кіроўцу, які прадоўжыць выкананьне рэйсу.
Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў