Лінкі ўнівэрсальнага доступу

Беларус з украінскім грамадзянствам: Ад мяне патрабавалі грошай, пагражаючы экстрадыцыяй


Былы беларускі бізнэсовец Цімафей Кахновіч, які пасьля некалькіх гадоў жыцьця ва Ўкраіне ў статусе палітычнага ўцекача атрымаў у 2016 годзе ўкраінскае грамадзянства, трапіў пад перасьлед паводле падазрэньня ў захоўваньні зброі.

29 сьнежня 2017 году праваахоўныя органы правялі ператрус у ягоным доме, і затрымалі спачатку як грамадзяніна Ўкраіны, а пазьней — як грамадзяніна Беларусі, якога вышукваюць беларускія праваахоўнікі паводле абвінавачаньняў у незаконнай прадпрымальніцкай дзейнасьці. Але суд адмовіў сьледчым у арышце Цімафея Кахновіча.

Кахновіч сьцьвярджае, што зброю яму падкінулі пад час ператрусу. Адпаведны відэазапіс абнародаваў украінскі журналіст Яўген Плінскі. Журналіст заяўляе, што праваахоўныя органы Беларусі і Ўкраіны нібыта маюць сьпіс з 25 былых беларускіх грамадзян, якія мусяць быць экстрадаваныя ў Беларусь, і Цімафей Кахновіч знаходзіцца ў гэтым сьпісе.

Украінская паліцыя пакуль што не камэнтуе сытуацыю.

У размове з карэспандэнтам Свабоды Цімафей Кахновіч распавёў пра сваю беларускую ды ўкраінскую гісторыю, і сказаў, што ўкраінскія праваахоўнікі патрабавалі ў яго выкуп за спыненьне справы пра экстрадыцыю спачатку ў памеры 300 тысяч, а пазьней — 50 тысяч даляраў.

— У Менску я быў уласьнікам кампаніі, якая працавала на рынку каштоўных папер. У пэўны пэрыяд часу гэтая дзейнасьць апынулася па-за законам, а мы — я і мае калегі — заўсёды выступалі супраць улады, падтрымлівалі кантакты з апазыцыяй і матэрыяльна дапамагалі сваімі ашчаджэньнямі. У 2006 годзе ў нас адбыліся ператрусы, адкрылі крымінальныя справы. Мне пашанцавала на той момант выехаць — спачатку ў Маскву, потым я пераехаў ва Ўкраіну. У 2007 годзе прайшоў усю працэдуру па атрыманьні статусу палітычнага ўцекача, а ўжо ў сярэдзіне 2016 годзе паводле ўказу прэзыдэнта атрымаў грамадзянства Ўкраіны. Ад самага пачатку я нічога не прыхоўваў ад украінскіх уладаў пра адкрытую крымінальную справу ў Беларусі, тым больш, што мяне абвясьцілі ў міжнародны вышук.

— Чым займаецеся цяпер ва Ўкраіне і чаму гэтая беларуская гісторыя зноў вярнулася ў вашае жыцьцё?

Нехта мяркуе, што ў мяне ёсьць сродкі, якімі я магу падзяліцца.

— Ва Ўкраіне я працую на рынку страхаваньня. А ў матэрыялах украінскай справы мясцовыя праваахоўнікі выкарысталі запыт Беларусі з 2008 году. Да гэтага часу я нікому ня быў патрэбны. Хаця, шчыра кажучы, на працягу усіх дзесяці гадоў майго знаходжаньня ва Ўкраіне мяне не аднойчы выклікалі ў праваахоўныя органы, і ўсё гэта завяршалася тлумачальнымі запіскамі. Я не прыхоўваўся і заўсёды прыходзіў і адказваў на ўсе пытаньні. Цяпер жа стае відавочным, навошта гэта рабілася. Нехта мяркуе, што ў мяне ёсьць сродкі, якімі я магу падзяліцца.

— Вам наўпрост прапанавалі адкупіцца?

— Далі зразумець. Бо размаўлялі ня толькі са мной, але і з маімі адвакатамі. Гэтая гісторыя цягнецца са жніўня, калі я наўпрост адмовіўся плаціць. А ў верасьні завялі справу, на падставе якой і прыйшлі зь ператрусам. Сьледчы мяркуе, што ў мяне ў доме захоўваюцца боепрыпасы, і на гэтай падставе суд даў санкцыю на ператрус. Пад час гэтага ператрусу мне падкінулі патроны, і гэта пацьвярджае відэафіксацыя.

— Вы лічыце гэты перасьлед палітычным ці эканамічным?

— Гэта вымаганьне хабару. На апошні момант яго памер зьнізілі да 50 тысяч даляраў, хаця яшчэ летам называлі суму 300 тысяч даляраў.

— Цяпер адчуваеце сябе ў бясьпецы?

Застрэлілі сабаку, дзіця ў стане стрэсу...

Я грамадзянін Украіны. Мяне незаконна затрымалі, незаконна ўтрымлівалі ў ізалятары амаль чатыры дні. Суд прыняў да ўвагі арыгінал майго пашпарту, пасьведчаньне аб шлюбе, аб нараджэньні маіх дзяцей, усю гісторыю атрыманьня ўкраінскага грамадзянства. І адмовіў пракуратуры ў маім арышце. Я цяпер на свабодзе, і мне ня вылучылі ніякіх абвінавачаньняў. Але я не адчуваю сябе ў бясьпецы. І ў мяне няма іншага выйсьця, як абараняць сябе ў межах прававога поля Ўкраіны, і разам з адвакатамі пісаць заявы пра незаконныя дзеяньні. Як можна маўчаць? Застрэлілі (пад час ператрусу — РС) сабаку, дзіця ў стане стрэсу пасьля наведваньня ўзброеных праваахоўнікаў, жонка усе гэтыя дні прыгнечаная. Адзіны шлях — прававы.

Беларускі апазыцыйны палітык Вячаслаў Сіўчык паведаміў карэспандэнту Свабоды, што ведае бізнэсоўца Цімафея Кахановіча.

«Супраць яго была ўчынена правакацыя. Ёсьць відэа, як яму падкідаюць патрон. Я магу выказаць толькі шкадаваньне, што такія гісторыі адбываюцца ва Украіне, бо ўкраінскі народ нам братні. І вось гэтыя правакацыі супраць беларусаў, якія зьдзяйсьняюцца прадстаўнікамі сілавых структур, гэта насамрэч вельмі кепска. А спадару Цімафею я пажадаў бы вытрымкі, каб перажыць гэтыя непрыемныя падзеі. Я спадзяюся, што пасьля таго як ва украінскіх мэдыях апублікавана гэта інфармацыя, ня будзе стаяць пытаньне пра яго дэпартацыю ў Беларусь. Гэта чалавек вядомы, нашы актывісты супрацоўнічаюць зь ім у Кіеве. І Украіна ня мае ніякага маральнага права выдаваць яго Беларусі. Ён зьяўляецца грамадзянінам Украіны. Але нават калі б ён ня быў украінскім грамадзянінам я не ўяўляю як гэта можна зрабіць, асабліва калі ўлічыць, што 22 студзеня будзе чарговая гадавіна забойства Міхася Жызьнеўскага на Майдане».

Ігар Лосік Кацярына Андрэева Ірына Слаўнікава Марына Золатава Ягор Марціновіч

Самае папулярнае

XS
SM
MD
LG