Лінкі ўнівэрсальнага доступу

Усё менш беларусаў за саюз з Расеяй, але такіх яшчэ больш за 50%, — Вардамацкі


Ілюстрацыйнае фота
Ілюстрацыйнае фота

Кіраўнік «Беларускай аналітычнай майстэрні» Андрэй Вардамацкі агучыў на Кангрэсе дасьледнікаў Беларусі 27 верасьня ў Вільні вынікі чарговага апытаньня беларусаў адносна стасункаў з Расеяй і Эўропай, расказвае «Эўрарадыё».

У жнівеньскім апытаньні, як сьцьвярджаецца, узялі ўдзел 1000 чалавек. Зь іх 54,5% былі за саюз Беларусі з Расеяй, 25% — за інтэграцыю з Эўропай, яшчэ 20,5% ня вызначыліся ці не хацелі адказваць.

Пры тым яшчэ ў студзені 2018 году за Расею было 63,9% апытаных, за Эўропу — 20,2%. У сярэдзіне 2017-га 41,7% адказалі «хутчэй у саюзе з Расеяй», 22,8% — «безумоўна, у саюзе з Расеяй». Адказ «хутчэй у Эўрапейскім зьвязе» далі 9,9% апытаных, «безумоўна, у Эўрапейскім зьвязе» — 4,2%.

Падзеньне «папулярнасьці» ідэі саюзу з Расеяй адбываецца на тле плянаў па паглыбленьня інтэграцыі.

Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі», як прызнаў беларускі бок, няма кампэнсацыі «падатковага манэўру», бюджэт разьлічылі безь яе.

У канцы 2018 году расейскі прэм’ер Дзьмітрый Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.

Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «Шантажаваць марна. Разумею намёкі — уступайце ў склад Расеі. Гэтага ня будзе ніколі».

Беларускія і расейскія ўлады распрацоўваюць пагадненьні аб інтэграцыі, якія Лукашэнка і Ўладзімір Пуцін маюць падпісаць 8 сьнежня. Але самі дакумэнты не публікуюць і падрабязнасьцей не раскрываюць.

Камэнтаваць тут можна праз Facebook. Калі вы ў Беларусі, любы камэнтар можа быць падставай для перасьледу з боку ўладаў

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG